ທ່ານ ວາລະໄຊ ເລັ່ງສະຫວັດ, ຮອງຫົວໜ້າ ຄະນະພົວພັນຕ່າງປະເທດສູນກາງພັກ ໄປຢ້ຽມຢາມ ແລະ ເຮັດວຽກຢູ່ ຣາຊະອານາຈັກ ກຳປູເຈຍ

ເຜີຍ​ແຜ່​ໂດຍ​: moderator ເວ​ລາ: 03/09/2024 15:39:45 ຈຳ​ນວນ​​ຢ້ຽມ​ຊົມ 215 ຄັ້ງ ​

     ຄະນະຜູ້ແທນ ຄະນະພົວພັນຕ່າງປະເທດສູນກາງ ພັກປະຊາຊົນ ປະຕິວັດລາວ ນໍາໂດຍ ທ່ານ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ເດີນທາງຢ້ຽມຢາມ ແລະ ເຮັດວຽກຢູ່ ຣາຊະອານາຈັກກຳປູເຈຍ ແຕ່ວັນທີ 29 ສິງຫາ ເຖິງ ວັນທີ 1 ກັນຍາ 2024. ໂອກາດດັ່ງກ່າວ, ໃນວັນທີ 30 ສິງຫາ 2024, ທ່ານ ວາລະໄຊ ເລັ່ງສະຫວັດ ໄດ້ນຳພາຄະນະ ເຂົ້າຢ້ຽມຂໍ່ານັບ ພະນະທ່ານ ປຣາກ ໂຊຄຸນ, ກຳມະການກົມການເມືອງສູນກາງພັກ, ຮອງປະທານສະພາສູງ ຜູ້ທີໜຶ່ງ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ກຳປູເຈຍ, ເຊິ່ງໃນ​ການ​ພົບ​ປະ​ຄັ້ງ​ນີ້, ຝ່າຍລາວໄດ້ແຈ້ງ ຜົນການພົບປະເຮັດວຽກລະຫວ່າງ ສອງ ຄະນະພົວພັນຕ່າງປະເທດສູນກາງພັກ ລາວ-ກຳປູເຈຍ, ລາຍງານ​ສະພາບ​ພົ້ນ​ເດັ່ນພາຍ​ໃນ, ພ້ອມທັງໄດ້​ນຳເອົາຄວາມຢື້ຢາມຖາມຂ່າວຈາກ ຫົວໜ້າຄະນະພົວພົວຕ່າງປະເທດສູນກາງພັກ ປະຊາຊົນ ປະຕິວັດລາວ ເຖິງ ພະນະທ່ານ ປຣາກ ໂຊຄຸນ ແລະ ໄດ້ຖືໂອກາດດັ່ງກ່າວ ເຊື້ອເຊີນ ພະນະທ່ານ ມາຢ້ຽມຢາມ ສປປ ລາວ ໃນທ້າຍປີ 2024.

     ຕອນບ່າຍ ຂອງວັນທີ 29 ສິງຫາ 2024, ທ່ານ  ວາລະໄຊ ເລັ່ງສະຫວັດ ພ້ອມຄະນະ ໄດ້ພົບປະ ແລະ ເຮັດວຽກ ກັບ ທ່ານ ແກັມ ສົມບັດ, ຮອງຫົວໜ້າຄະນະພົວພັນຕ່າງປະເທດສູນກາງ ພັກປະຊາຊົນ ກຳປູເຈຍ ທີ່ ສຳນັກງານສູນກາງພັກ, ສອງຝ່າຍ ໄດ້ແຈ້ງໃຫ້ກັນຊາບ ສະພາບການພົ້ນເດັ່ນພາຍໃນຂອງ 2 ພັກ, 2 ປະເທດ, ແລກປ່ຽນທັດສະນະ ຕໍ່ບັນຫາພົ້ນເດັ່ນສາກົນ, ພາກພື້ນ ແລະ ປຶກສາຫາລືກ່ຽວກັບການພົວພັນຮ່ວມມືສອງຝ່າຍ ແລະ ເອກະພາບກັນກ່ຽວກັບ ທິດທາງການຮ່ວມມືໃນຕໍ່ໜ້າ; ທ່ານ ວາລະໄຊ ເລັ່ງສະຫວັດ ໄດ້ສະແດງຄວາມປິຕິຊົມຊື່ນ ແລະ ສະແດງຄວາມຂອບໃຈ ຕໍ່ ການຕ້ອນຮັບຢ່າງອົບອຸ່ນ, ຊົມເຊີຍ ຕໍ່ບັນດາຜົນສໍາເລັດອັນສຳຄັນທີ່ ປະຊາຊົນ ກຳປູເຈຍ ຍາດມາໄດ້ໃນຕະຫຼອດໄລຍະຜ່ານມາ, ເຊື່ອໝັ້ນວ່າ ພາຍໃຕ້ການນໍາພາຂອງ ພັກປະຊາຊົນ ກໍາປູເຈຍ, ພັກ, ລັດຖະບານ ແລະ ປະຊາຊົນ ກຳປູເຈຍ ຈະສືບຕໍ່ຍາດໄດ້ຜົນສໍາເລັດ ໃໝ່ ໃຫຍ່ຫຼວງກວ່າເກົ່າ; ພ້ອມນັ້ນ ຍັງໄດ້ຕີລາຄາສູງ ຕໍ່ ສາຍ​ພົວພັນ​ມິດຕະພາບ ອັນ​ເປັນ​ມູນ​ເຊື້ອ​ທີ່​ດີງາມ ລະ​ຫ່ວາງ 2 ພັກ ກໍ່ຄື ສອງ ຄະນະພົວພັນຕ່າງປະເທດສູນກາງພັກ ລາວ- ກໍາປູ​ເຈຍ ທີ່ນັບມື້ໄດ້​ຮັບ​ການເພີ່ມພູນຄູນສ້າງ ແລະ​ເສີມ​ຂະຫຍາຍ​​ຢ່າງ​ບໍ່​ຢຸດ​ຢັ້ງ, ນຳ​ເອົາ​ຜົນ​ປະ​ໂຫຍ​ດ​ຕົວ​ຈິງ​ມາ​ສູ່ ປະຊາຊົນ​ສອງ​ປະ​ເທດ, ປະກອບສ່ວນ​ເຂົ້າ​​ໃນ​ພາລະກິດ​ສັນຕິພາບ, ສະຖຽນ​ລະ​ພາບ, ການ​ຮ່ວມ​ມື​ ​ເພື່ອ​ການ​ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ. ​

    ໃນ​ໂອກາດດັ່ງກ່າວ, ທ່ານ ​ວາລະໄຊ ເລັ່ງສະຫວັດ ຍັງໄດ້​ສະ​ແດງ​ຄວາມ​ຂອບ​ໃຈ ​ແລະ ຮູ້​ບຸນ​ຄຸນ​ເປັນ​ຢ່າງ​ສູງ ຕໍ່ ​ພັກ, ລັດ​ຖະບານ ​ແລະ ປະຊາຊົນ  ​ກໍາປູ​​ເຈຍ ທີ່​ໄດ້​ໃຫ້ການ​ສະໜັບສະໜູນ ແລະ ຊ່ວຍ​ເຫລືອ ​ແກ່ ​ພັກ, ລັດ ​ແລະ ປະຊາຊົນ​ລາວ ຕະຫລອດ​ໄລຍະ​ຜ່ານ​ມາ, ​ຍິນດີຮ່ວມ​ກັບ ຄະນະພົວພັນຕ່າງປະເທດສູນກາງ ພັກປະຊາຊົນ ກຳປູ​ເຈຍ ​ໃນ​ການ​ປົກ​ປົກ​ຮັກສາ ​ແລະ ​ເພີ່ມ​ພູນ​ຄູນ​ສ້າງ  ສາ​ຍພົວພັນ​ມິດຕະພາບ​ ອັນ​ດີງາມ ໃຫ້ໄດ້​ຮັບ​ການ​ພັດທະນາ​ຍິ່ງໆ​ຂື້ນ.

          ທ່ານ ແກັມ ສົມບັດ ໄດ້ສະແດງຄວາມຊົມເຊີຍ ຕໍ່ ການມາຢ້ຽມຢາມ ຂອງຄະນະໃນຄັ້ງນີ້, ເຊິ່ງມີຂຶ້ນໃນທາມກາງບັນຍາກາດ ທີ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ພວມສືບຕໍ່ໄດ້ຮັບການເສີມຂະຫຍາຍ ແລະ ພັດທະນາໃນທ່ວງທ່າອັນໜັກແໜ້ນ,  ຕີລາຄາສູງ ຕໍ່ການຊີ້ນຳ-ນໍາພາຂອງ ພັກ, ລັດ ລາວ ​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ປະ​ເທດລາວ ກໍຄື ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ່ XI ຂອງພັກ, ຊົມ​ເຊີຍ​ຕໍ່​ຜົນສຳ​ເລັດ​ອັນ​ໃຫຍ່​ຫລວງ ​ທີ່ ​ພັກ, ລັດຖະບານ ​ແລະ ປະຊາຊົນ ລາວ ຍາດ​ມາ​ໄດ້​ໃນ​ໄລຍະ​​ຜ່ານ​ມາ, ​​ເຊື່ອໝັ້ນວ່າ ພາຍໃຕ້ການນໍາພາຂອງ ພັກປະຊາຊົນ ປະຕິວັດລາວ, ປະຊາຊົນລາວ ຈະສືບຕໍ່ຍາດໄດ້ຜົນສໍາເລັດອັນໃໝ່, ໃຫຍ່ຫຼວງກວ່າເກົ່າ ໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI, ກະກຽມດໍາເນີນກອງປະຊຸມ 3 ຂັ້ນ ເພື່ອກະກຽມດໍາເນີນ ກອງປະຊຸມໃຫຍ່ ຄັ້ງທີ XII ຂອງພັກ, ເຮັດສໍາເລັດບົດບາດ, ໜ້າທີ່ ປະທານມູນວຽນ ASEAN ແລະ AIPA ໃນປີ 2024, ​ພ້ອມທັງ ໄດ້ຢືນຢັນ​ວ່າ ພັກ, ລັດຖະບານ ​ແລະ ປະຊາຊົນ ກໍາປູ​ເຈຍ ຈະ​​ເຮັດ​ສຸດ​ຄວາມ​ສາມາດ​ຂອງ​ຕົນ​ຮ່ວມ​ກັບ ​ພັກ, ລັດ ​ແລະ ປະຊາຊົນລາວ ບັນດາ​ເຜົ່າ ໃນການສືບຕໍ່ປົກ​ປັກ​ຮັກສາ ​ແລະ ​ເສີມ​ຂະຫຍາຍ ສາຍ​ພົວພັນ​ມິດຕະພາບ​ ອັນ​ເປັນມູນເຊື້ອດີງາມ ​ແລະ ປູກຈິດສຳນຶກ ​ໃຫ້​ຄົນ​ຮຸ້ນ​ຫລັງສືບຕໍ່​​ປົກ​ປັກ​ຮັກສາ ​ສາຍ​ພົວພັນ​ອັນດີງາມ​​​ໃຫ້​ຍືນ​ຍົງ​ຄົງ​ຕົວຕະຫລອດ​ໄປ.

​    ໃນ​ໄລຍະ​ຢ້ຽມຢາມ, ນອກ​ຈາກ ພົບປະ​​ເຮັດ​ວຽກ​ຢູ່ ພະນົມ​ເປັນ​​ແລ້ວ, ຄະນະ ​ຍັງ​ໄດ້​​ໄປ ພົບປະເຮັດວຽກກັບ ເລຂາພັກແຂວງ, ຄະນະນໍາແຂວງ ສຽມຣຽບ ແລະ ທັດສະນະສຶກສາສະຖານທີ່ທ່ອງທ່ຽວ​ທາງ​ປະຫວັດສາດ, ວັດທະນະທຳ ​ແລະ ທຳ​ມະ​ຊາດຈຳນວນໜຶ່ງຢູ່ ​ແຂວງ ສຽ​ມ​ລຽບ ​ອີກ​ດ້ວຍ.

---