ພັກ-ລັດຖະບານ ແຫ່ງ ສປປ ລາວ ໄດ້ປະດັບຫຼຽນຍ້ອງຍໍໃຫ້ແກ່ບຸກຄົນ ແລະ ກົມກອງລວມໝູ່ ຂອງກະຊວງປ້ອງກັນປະເທດຫວຽດນາມ
ເຜີຍແຜ່ໂດຍ: moderator ເວລາ: 27/02/2024 08:36:24 ຈຳນວນຢ້ຽມຊົມ 154 ຄັ້ງ ໃນວັນທີ 25 ກຸມພາ 2024, ຢູ່ສໍານັກງານສະຖານເອກອັກຄະລັດຖະທູດ ສປປ ລາວ ທີ່ນະຄອນຫຼວງຮ່າໂນ້ຍ, ສສ ຫວຽດນາມ, ໂດຍໄດ້ຮັບການມອບໝາຍຈາກ ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຄະນະພົວພັນຕ່າງປະເທດສູນກາງພັກ ໄດ້ສົບທົບກັບ ສະຖານເອກອັກຄະລັດຖະທູດ ຈັດພິທີປະດັບຫຼຽນໄຊ ແລະ ຫຼຽນກາ ຈາກ ພັກ, ລັດຖະບານ ແຫ່ງ ສປປ ລາວ ໃຫ້ແກ່ ກົມກອງ ແລະ ບຸກຄົນຂອງ ຄະນະຮັກສາ, ເບິ່ງແຍງສຸຂະພາບພະນັກງານສູນກາງ ແລະ ໂຮງໝໍສູນກາງກອງທັບ 108, ກະຊວງປ້ອງກັນປະເທດຫວຽດນາມ.
ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ຕາງໜ້າໃຫ້ ພັກ ແລະ ລັດຖະບານ ແຫ່ງ ສປປ ລາວ ປະ ດັບຫຼຽນໄຊອິດສະຫຼະຊັ້ນ III ໃຫ້ແກ່ 2 ກົມກອງ, ບຸກຄົນ 1 ສະຫາຍ; ປະດັບຫຼຽນໄຊມິດຕະພາບ ໃຫ້ແກ່ 2 ກົມກອງ, ບຸກຄົນ 3 ສະຫາຍ ແລະ ປະດັບຫຼຽນກາມິດຕະພາບ ໃຫ້ແກ່ ບຸກຄົນ 2 ສະ ຫາຍ.
ໃນພິທີ ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການປະກອບສ່ວນ ຂອງກົມກອງ ແລະ ບຸກຄົນ ຂອງ ຄະນະຮັກສາ, ເບິ່ງແຍງສຸຂະພາບພະນັກງານສູນກາງ ແລະ ໂຮງໝໍສູນກາງກອງທັບ 108, ສສ ຫວຽດນາມ ທີ່ໄດ້ປະກອບສ່ວນສໍາຄັນ ທາງດ້ານທຶນຮອນ, ເຫື່ອແຮງ ແລະ ສະຕິປັນຍາ ເຂົ້າໃນການປິ່ນປົວ, ຮັກສາສຸຂະພາບຂອງ ການນໍາຂັ້ນສູງ ພັກ, ລັດ ສາທາລະນະລັດ ປະຊາທິປະໄຕ ປະຊາຊົນລາວ ຕະຫຼອດໄລຍະຜ່ານມາ, ທັງເປັນເສນາທິການດ້ານວິຊາການ ໃຫ້ກົມການເມືອງ, ຄະນະເລຂາທິການສູນກາງພັກກອມມູນິດຫວຽດນາມ ແລະ ໄດ້ປະສານສົມທົບກັບ ຫ້ອງວ່າການສູນກາງພັກ ແລະ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ໃນການຊີ້ນໍາຢ່າງໃກ້ຊິດ, ທັນການ ແລະ ມີປະສິດທິຜົນ ຕໍ່ບັນດາພະແນກການ, ໂຮງໝໍສູນກາງກອງທັບ 108 ແລະ ບັນດາໂຮງໝໍ ທີ່ຮັບຜິດຊອບການປິ່ນປົວ ແລະ ຮັກສາສຸຂະພາບພະນັກງານການນຳ ພັກ, ລັດ ກໍ່ຄື ເບິ່ງແຍງສຸຂະພາບ ແລະ ຮັບປະກັນທາງດ້ານສາທາລະນະສຸກ ໃຫ້ ການນໍາຂັ້ນສູງຂອງພັກ, ລັດ ລາວ ໄປຢ້ຽມຢາມ ສສ ຫວຽດນາມ ກໍ່ຄື ບັນດາການນໍາຂັ້ນສູງ ພັກ, ລັດ ຫວຽດນາມ ມາຢ້ຽມຢາມ ສປປ ລາວ; ສົ່ງຄະນະແພດຊ່ຽວຊານ ເພື່ອແລກປ່ຽນ ແລະ ຖ່າຍທອດບົດຮຽນໃນການຮັບມືກັບພະຍາດລະບາດ, ກວດ ແລະ ປິ່ນປົວສຸຂະພາບ ໃຫ້ການນໍາຂັ້ນສູງ ພັກ, ລັດລາວ, ໃຫ້ການຊ່ວຍເຫຼືອເຄື່ອງມືອຸປະກອນການແພດ, ຢາປິ່ນປົວພະຍາດໃຫ້ ສປປ ລາວ, ເຊິ່ງເປັນການປະກອບສ່ວນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽນາມ ໃຫ້ນັບມື້ແຕກດອກອອກຜົນຍິ່ງໆຂື້ນ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20