ຄະນະຜູ້ແທນ ພັກ ປປ ລາວ ເຂົ້າຮ່ວມກອງປະຊຸມເວທີປຶກສາຫາລື ຂອງ ບັນດາຝ່າຍສະໜັບສະໜູນການຕໍ່ສູ້ຕ້ານການປະຕິບັດໃນສະໄໝໃໝ່ ຂອງລັດທິລ່າເມືອງຂື້ນແບບໃໝ່ ທີ່ນະຄອນຫຼວງມົດສະກູ, ສະຫະພັນຣັດເຊຍ
ເຜີຍແຜ່ໂດຍ: moderator ເວລາ: 21/02/2024 12:42:25 ຈຳນວນຢ້ຽມຊົມ 209 ຄັ້ງ ຄະນະຜູ້ແທນພັກ ປປ ລາວ ນໍາໂດຍ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເວທີປຶກສາຫາລືຂອງບັນດາຝ່າຍສະໜັບສະໜູນການຕໍ່ສູ້ຕ້ານການປະຕິບັດໃນສະໄໝໃໝ່ ຂອງ ລັດທິລ່າເມືອງຂື້ນແບບໃໝ່, ພາຍໃຕ້ຫົວຂໍ້: “ເພື່ອເສລີພາບ ຂອງບັນດາຊາດ” (For the Freedom of Nations), ເຊິ່ງໄດ້ຈັດຂື້ນໃນວັນທີ 14-17 ກຸມພາ 2024, ທີ່ນະຄອນຫຼວງມົດສະກູ, ສະຫະພັນຣັດເຊຍ, ໂດຍການເປັນເຈົ້າພາບຂອງພັກຣັດເຊຍເອກະພາບ, ມີຄະນະຜູ້ແທນຈາກພັກການເມືອງ ຫຼາຍກວ່າ 60 ພັກ ຈາກ 50 ກວ່າປະເທດໃນຂົງເຂດອາຊີ, ອາຟຣິກາ, ອາເມຣິກາລາຕິນ ແລະ ເອີຣົບ ເຂົ້າຮ່ວມ.
ກອງປະຊຸມເວທີປຶກສາຫາລືດັ່ງກ່າວ ເປັນຂໍ້ລິເລີ່ມຂອງ ພັກຣັດເຊຍເອກະພາບ ທີ່ໄດ້ຈັດຂຶ້ນເປັນຄັ້ງທຳອິດ ແລະ ເປັນກອງປະຊຸມສ້າງຕັ້ງກົນໄກດັ່ງກ່າວ, ເຊິ່ງເປັນຂະບວນການແບບບໍ່ເປັນທາງການ ຂອງບັນດາພັກການເມືອງ ແລະ ກຳລັງທາງສັງຄົມ ທີ່ມີເປົ້າໝາຍຕໍ່ສູ້ຕ້ານລັດທິລ່າເມືອງຂຶ້ນແບບໃໝ່ ກໍຄື ອະດີດປະເທດລ່າຫົວເມືອງຂື້ນ ທີ່ເວລາໃດກໍ່ພະຍາຍາມຮັກສາການຄອບງໍາໂລກ ເພື່່ອຜົນປະໂຫຍດຂອງພວກເຂົາ ໂດຍບໍ່ຄໍານຶງເຖິງບັນດາປະເທດສ່ວນໃຫຍ່ຂອງໂລກ ໂດຍສະເພາະບັນດາປະເທດກໍາລັງພັດທະນາ, ເຊິ່ງເປັນການບັ່ນທອນເອກະລາດ, ອຳນາດອະທິປະໄຕ, ສິດທິໃນການປົກຄອງຕົນເອງ ຂອງປະຊາຊົນ ຢູ່ປະເທດຕ່າງໆ ແລະ ກໍ່ໃຫ້ເກີດຄວາມບໍ່ສະເໝີພາບ ແລະ ບໍ່ຍຸຕິທໍາ ໃນໂລກ.
ບັນດາຜູ້ແທນກອງປະຊຸມ ໄດ້ລົງເລິກປຶກສາຫາລືໃນບັນດາຫົວຂໍ້ສະເພາະທີ່ກ່ຽວຂ້ອງ ໂດຍໄດ້ຍົກໃຫ້ເຫັນພື້ນຖານ ແລະ ບັນດາຮູບການປະຕິບັດໃນສະໄໝໃໝ່ ຂອງລັດທິລ່າເມືອງຂຶ້ນແບບໃໝ່ ແລະ ແນວທາງ, ມາດຕະການໃນການຕ້ານການປະຕິບັດໃນສະໄໝໃໝ່ ຂອງລັດທິລ່າເມືອງຂຶ້ນແບບໃໝ່ ໂດຍສະເພາະໃນຂົງເຂດການເມືອງ, ກົດໝາຍ, ເສດຖະກິດ, ການເງິນ, ຂໍ້ມູນຂ່າວສານ ແລະ ມະນຸດສະທໍາ (ການສຶກສາ, ວິທະຍາສາດ, ວັດທະນະທໍາ, ການແພດ, ກິລາ ແລະ ອື່ນໆ), ການແຊກແຊງທີ່ຜິດກົດໝາຍຈາກພາຍນອກ ເຂົ້າໃນກິດຈະການພາຍໃນ ຂອງບັນດາລັດ ແລະ ບົດບາດ ຂອງພັກການເມືອງທີ່ມີຄວາມຮັບຜິດຊອບ ເພື່ອຮັບປະກັນເສລີພາບທີ່ແທ້ຈິງ ຂອງບັນດາຊາດ.
ໃນໂອກາດເຂົ້າຮ່ວມກອງປະຊຸມຄັ້ງນີ້, ຫົວໜ້າຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນ, ສະແດງການສະໜັບສະໜູນຂໍ້ລິເລີ່ມ ຂອງພັກຣັດເຊຍເອກະພາບ ໃນການສ້າງຕັ້ງກົນໄກປຶກສາຫາລືຄັ້ງນີ້; ຍົກໃຫ້ເຫັນແນວທາງນະໂຍບາຍຂອງ ພັກ-ລັດ ສປປ ລາວ ທີ່ຄັດຄ້ານທຸກຮູບແບບ ຂອງການປະຕິບັດໃນສະໄໝໃໝ່ ຂອງລັດ ທິລ່າເມືອງຂຶ້ນແບບໃໝ່ ທີ່ຂັດກັບທ່າອ່ຽງ ຂອງຍຸກສະໄໝ, ການປົກປັກຮັກສາອໍານາດອະທິປະໄຕ ແລະ ຄວາມເປັນເອກະລາດແຫ່ງຊາດ, ການຍົກສູງບົດບາດ ແລະ ເພີ່ມທະວີຄວາມສາມັກຄີກັນ ຂອງບັນດາພັກການເມືອງ; ພັກ ປປ ລາວ ຈະຮ່ວມກັບພັກຣັດເຊຍເອກະພາບ ແລະ ພັກການເມືອງບັນດາປະເທດຈາກພາກພື້ນຕ່າງໆຂອງໂລກ ເພື່ອສືບຕໍ່ຂະບວນການເພື່ອເສລີພາບ ຂອງບັນດາຊາດ.
ກອງປະຊຸມຄັ້ງນີ້ ໄດ້ປະສົບຜົນສຳເລັດຢ່າງຈົບງາມ ແລະ ໄດ້ເປັນເອກະພາບຮັບຮອງເອົາຖະແຫຼງການສຸດທ້າຍຂອງກອງປະຊຸມ ແລະ ການສ້າງຕັ້ງຄະນະປະຈໍາ ຂອງກອງປະຊຸມເວທີປຶກສາຫາລືດັ່ງກ່າວ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20