ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ອີກໍ ປານຟິນລອບ, ຮອງປະທານສະມາຄົມມິດຕະພາບ ຣັດເຊຍ-ລາວ

ເຜີຍ​ແຜ່​ໂດຍ​: editor ເວ​ລາ: 09/12/2022 14:35:10 ຈຳ​ນວນ​​ຢ້ຽມ​ຊົມ 1155 ຄັ້ງ ​

ໃນວັນ​ທີ 7 ທັນວາ 2022, ທີ່ ສຳນັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ອີກໍ ປານຟິນລອບ, ຮອງປະທານສະມາຄົມມິດຕະພາບ ຣັດເຊຍ-ລາວ ພ້ອມດ້ວຍຄະນະ ໃນໂອກາດເດີນທາງມາເຂົ້າຮ່ວມພິທີເປິດອະນຸສາວະລີນັກບີນທະຫານ ອະດີດສະຫະພາບໂຊວຽດ ລະຫວ່າງ ວັນທີ 3-10 ທັນວາ 2022 ຢູ່ ສປປ ລາວ.

ໃນໂອກາດັ່ງກ່າວ, ທ່ານ ທອງສະຫວັນ ພົມວິຫານ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕີລາຄາສູງຕໍ່ການຢ້ຽມຢາມ ແລະ ເຮັດວຽກ ຢູ່ ສປປ ລາວ ຖືເປັນການປະກອບສ່ວນສຳຄັນເຂົ້າໃນການຮັດແໜ້ນແລະເພີ່ມພູນຄູນສ້າງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ຂອງ ສອງປະເທດ ແລະ ປະຊາຊົນສອງຊາດລາວ ແລະ ຣັດເຊຍໃຫ້ນັບມື້ໄດ້ຮັບການພັດທະນາ ແລະ ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ພ້ອມນີ້, ຍັງໄດ້ຊົມເຊີຍຕໍ່ການພົວພັນຮ່ວມມື ລະຫວ່າງ ສະມາຄົມມິດຕະພາບ ລາວ-ຣັດເຊຍ ແລະ ຣັດເຊຍ-ລາວ ທີ່ໄດ້ພົວພັນຮ່ວມມືກັນມາແຕ່ດົນນານ ແລະ ໄດ້ຮັບການເສີມຂະຫຍາຍໃນແຕ່ລະໄລຍະ, ສອງສະມາຄົມມິດຕະພາບໄດ້ມີການຮ່ວມມື,ແລກປ່ຽນຂໍ້ມູນຂ່າວສານ ແລະ ຈັດກິດຈະກຳຮ່ວມກັນໃນໂອກາດວັນສຳຄັນຕ່າງໆຂອງສອງປະເທດ. ພ້ອມນັ້ນຍັງໄດ້ເຮັດບົດບາດສຳຄັນໃນການເປັນຂົວຕໍ່, ສະໜັບສະໜູນ ແລະ ຊຸກຍູ້ການພົວພັນດ້ານລັດຂອງສອງປະເທດ, ໂດຍສະເພາະຂົງເຂດເສດຖະກິດ-ການຄ້າ,ການລົງທຶນ, ການສຶກສາ, ການທ່ອງທ່ຽວ,ວັດທະນະທຳ ແລະ ຂົງເຂດອື່ນໆໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ.

ທ່ານ ອີກໍ ປານຟິນລອບ, ຮອງປະທານສະມາຄົມມິດຕະພາບ ຣັດເຊຍ-ລາວ ໄດ້ສະແດງ ຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນ, ແຈ້ງຈຸດປະສົງຂອງການມາຢ້ຽມຢາມ ແລະ ເຮັດວຽກຢູ່ ສປປ ລາວ ແລະ ແຈ້ງສະພາບການພົ້ນເດັ່ນ ໃຫ້ສະຫາຍຫົວໜ້າ ຄຕພ ຊາບ. ພ້ອມນັ້ນຍັງໄດ້ສະແດງຄວາມໝາຍໝັ້ນທີ່ ຈະສືບຕໍ່ເຮັດໜ້າທີ່ ແລະ ບົດບາດ ໃນການປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ຂອງ ສອງປະເທດ ແລະ ປະຊາຊົນສອງຊາດລາວ ແລະ ຣັດເຊຍ ໃຫ້ມີບາດກ້າວໃໝ່.

         ໃນໂອກາດດັ່ງກ່າວ, ທ່ານ ຫົວ​ໜ້າ​ຄະ​ນະ​ພົ​ວ​ພັນ​ຕ່າງ​ປະ​ເທດ​ສູນ​ກາງ​ພັກ ​ໄດ້ຕາງ​ໜ້າ​ລັດ​ຖະ​ບານ ​ແຫ່ງ ສ​ປ​ປ ລາວ​​ ປະດັບຫຼຽນ​ໄຊ​ມິດຕະພາບ ໃຫ້​ແກ່​ ທ່ານ ໂຊໂກລິນ ວະລາດີມີຣ ເລໂອນິດາວິຈ, ປະທານສະມາຄົມມິດຕະພາບ ຣັດເຊຍ-ລາວ ແລະ ຫຼຽນກາມິດຕະພາບ ໃຫ້ແກ່ ທ່ານ ກາຣຶນນອບ ເຊີເກ ເວຍແຊສລາວເວີວິສ, ກຳມະການ ສະມາຄົມມິດຕະພາບ ຣັດເຊຍ-ລາວ, ຮອງຜູ້ອຳນວຍການບໍລິສັດ MK ເພື່ອສະແດງຄວາມຮູ້ບຸນຄຸນ ແລະ ຕອບແທນຜົນງານອັນພົ້ນເດັ່ນໃນການ​ປະ​ກອ​ບ​ສ່ວນ​ ​ເພີ່ມ​ພູນ​ຄູນ​ສ້າງສາຍພົວພັນມິດຕະພາບ ແລະ ການ​ຮ່ວມມື ລະຫວ່າງ ສປປ ລາວ ແລະ ສ.ຣັດເຊຍ.

ໃນວັນດຽວກັນ ສອງສະມາຄົມມິດຕະພາບ ລາວ-ຣັດເຊຍ ແລະ ສະມາຄົມມິດຕະພາບ ຣັດເຊຍ-ລາວ ໄດ້ຈັດກອງປະຊຸມພົບປະສອງຝ່າຍ, ຝ່າຍລາວນໍາໂດຍ ທ່ານ ສຈ.ປອ ບໍ່ແສງຄຳ ວົງດາລາ, ອະດີດກຳມະການສູນກາງພັກ, ອະດີດລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ປະທານສະມາຄົມມິດຕະພາບ ລາວ-ຣັດເຊຍ ແລະ ຝ່າຍຣັດເຊຍ ນຳໂດຍ ທ່ານ ໂຊໂກລິນ ວະລາດີມີຣ ເລໂອນິດາວິຈ, ປະທານສະມາຄົມມິດຕະພາບ ຣັດເຊຍ-ລາວ. ໃນ​ກອງປະຊຸມພົບປະສອງຝ່າຍໄດ້ ຕີລາຄາການພົວພັນຮ່ວມມືໃນໄລຍະຜ່ານມາ ເຫັນວ່າການພົວພັນຮ່ວມມື ມີການຂະຫຍາຍຕົວ, ສອງຝ່າຍໄດ້ມີການແລກປ່ຽນຂໍ້ມູນຂ່າວສານ, ແລກປ່ຽນການຢ້ຽມຢາມເຊິ່ງກັນ ແລະ ກັນ ແລະ ໄດ້ແຈ້ງສະພາບການພົ້ນເດັ່ນການພັດທະນາ ເສດຖະກິດ-ສັງຄົມ ຂອງ ແຕ່ລະປະເທດໃຫ້ກັນຊາບ ແລະ ວາງແຜນທິດທາງໃນຕໍ່ໜ້າ ຂອງ ສອງສະມາຄົມມິດຕະພາບ.

ນອກຈາກພົບປະເຮັດວຽກ ແລະ ຢ້ຽມຂໍ່ານັບການນໍາ, ຄະນະຜູ້ແທນສະມາຄົມມິດຕະພາບ ຣັດເຊຍ-ລາວ ໄດ້ເຂົ້າຮ່ວມພິທີເປີດອານຸສາວະລີນັກບິນທະຫານອະດີດສະຫະພາບໂຊວຽດ ຢູ່ ນະຄອນຫຼວງວຽງຈັນ ແລະ ແຂວງຊຽງຂວາງ.

---