ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ສປປ ລາວ ພົບປະອະດີດການນຳຫວຽດນາມ

ເຜີຍ​ແຜ່​ໂດຍ​: moderator ເວ​ລາ: 23/09/2024 11:27:12 ຈຳ​ນວນ​​ຢ້ຽມ​ຊົມ 186 ຄັ້ງ ​

      ເນື່ອງ​ໃນ​ໂອ​ກາດຢ້ຽມ​ຢາມ ລັດ​ຖະ​ກິດ ສ​ສ ຫວຽດ​ນາມ ແຕ່​ວັນ​ທີ 10-13 ກັນ​ຍາ 2024, ໃນຕອນ​ບ່າຍ ວັນ​ທີ 11 ກັນ​ຍາ ຜ່ານມາ ສະ​ຫາຍ ທອງ​ລຸນ ສີ​ສຸ​ລິດ ເລ​ຂາ​ທິ​ການ​ໃຫຍ່ ປະ​ທານ​ປະ​ເທດ ສ​ປ​ປ ລາວ ໄດ້​ພົບ​ປະ​ກັບສະ​ຫາຍ ນົງ​ ດຶກ​ແມັງ ອະ​ດີດ​ເລ​ຂາ​ທິ​ການ​ໃຫຍ່ ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ ສະ​ໄໝ 9, 10; ສະ​ຫາຍ ເຈືອງ​ ເຕິນ​ຊາງ ອະ​ດີດປະ​ທານ​ປະ​ເທດ ສ​ສ ຫວຽດ​ນາມ ແລະ ສະ​ຫາຍ ຫງວຽນ ມິງ​ຈຽດ ອະ​ດີດ​ປະ​ທານ​ປະ​ເທດ ສ​ສ ຫວຽດ​ນາມ; ສະ​ຫາຍໄດ້​ສະ​ແດງ​ຄວາມ​ປິ​ຕິ​ຊົມ​ຊື່ນ ທີ່​ໄດ້​ພົບ​ປະ​ກັບ​ບັນ​ດາ​ສະ​ຫາຍ ອະ​ດີດ​ການ​ນຳ​ຫວຽດ​ນາມ ຜູ້​ເປັນ​​ມິດ​ສະ​ຫາຍ​ອ້າຍ​ນ້ອງອັນ​ແທ້​ຈິງ​​ຕະຫຼອດ​ມາ ຂອງ​ພັກ, ລັດ ແລະ ປະ​ຊາ​ຊົນ ລາວ​ບັນ​ດ​າ​ເຜົ່າ; ຕີ​ລາ​ຄາ​ສູງ​ຕໍ່​ການ​ສະ​ໜັບ​ສະ​ໜູນ ແລະ ຄວາມ​ຮັກ​ແພງ​ແບບ​ມິດ​ສະ​ຫາຍ​ອັນ​ແທ້​ຈິງ ຂອງ​ບັນ​ດາ​ສະ​ຫາຍ ອະ​ດີດ​ການ​ນຳ​ຂັ້ນ​ສູງ​ຂອງ​ ຫວຽດ​ນາມ ໄດ້​ໃຫ້​ແກ່ ລາວ ກໍ​ຄື ​ນ້ຳໃຈເສຍຍ​ສະ​ຫຼະ ແລະ ການ​ປະ​ກອບ​ສ່ວນ​ອັນ​ໃຫຍ່ຫຼວງ ຂອງ​ບັນ​ດາ​ສະ​ຫາຍ ​ໃນ​ການ​ປົກ​ປັກ​ຮັກ​ສາ, ເພີ່ມ​ພູນ​ຄູນ​ສ້າງ ສາຍ​ພົວ​ພັນ​ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມື​ຮອບ​ດ້ານ ລາວ-ຫວຽດ​ນາມ. ໃນ​ໂອ​ກາດ​ດັ່​ງ​ກ່າວ, ສະ​ຫາຍ ທອງ​ລຸນ ສີ​ສຸ​ລິດ ໄດ້​ຝາກ​ຄຳ​ຢື້​ຢາມ​ຖາມ​ຂ່າວ​ອັນ​ສະ​ໜິດ​ສະ​ໜົມ, ເຕັມ​ໄປ​ດ້ວຍ​ໄມ​ຕີ​ຈິດ​ມິດ​ຕະ​ພາບ ຖານ​ມິດ​ສະ​ຫາຍ ອ້າຍ​ນ້ອງ ຂອງບັນ​ດາ​ສະ​ຫາຍອະ​ດີດ​ການ​ນຳ​ຂັ້ນ​ສູງ​ຂອງ​ລາວ ມາ​ຍັງ​ບັນ​ດາ​ສະ​ຫາຍອະ​ດີດ​ການ​ນຳ ຫວຽດ​ນາມ ມາ​ນະ​ໂອ​ກາ​ດ​ນີ້, ສະ​ຫາຍ ທອງ​ລຸນ ສີ​ສຸ​ລິດ ສະ​ແດງ​ຄວາມ​ປິ​ຕິ​ຊົມ​ຊື່ນ ແລະ​ ເຊື່ອ​ໝັ້ນ​ວ່າ ພາຍ​ໃຕ້​ການ​ນຳ​ພາ​ອັນ​ສະຫຼາດ​ສ່ອງ​ໃສ​ຂອງ​ພັກ ກອມ​ມູ​ນິດ​ຫວຽດ​ນາມ, ປະ​ເທດ​ຊາດ ຫວຽດ​ນາມ ຈະ​ນັບ​ມື້​ນັບ​ໄດ້​ຮັບ​ການ​ພັດ​ທະ​ນາ​ຢ່າງ​ບໍ່​ຢຸດ​ຢັ້ງ, ເປັນ​ເຈົ້າ​ຕົນ​ເອງ, ວັດ​ທະ​ນາ​ຖາ​ວອນ ເຮັດ​ໃຫ້ປະ​ຊາ​ຊົນຫວຽດ​ນາມ​ອ້າຍ​ນ້ອງ ນັບ​ມື້ ກິນ​ອີ່ມ​ນຸ່ງ​ອຸ່ນ ແລະ ມີ​ຄວາມ​ຜາ​ສຸກ; ພ້ອ​ມ​ກັນ​ນັ້ນ ສະ​ຫາຍໄດ້​ສະ​ແດງ​ຄວາມ​ປິ​ຕິ​ຊົມ​ຊື່ນ ຕໍ່​ຜົນ​ສຳ​ເລັດ​ໃນ​ການ​ສ້າງ​ສາ​ພັດ​ທະ​ນາ​ປະ​ເທດ​ຊາດ ທີ່​ພັກ, ລັດ ແລະ ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ ຍາດ​ມາ​ໄດ້​​ໄລ​ຍະ​ຜ່ານ​ມາ, ໃນ​ນັ້ນ ແມ່ນ​ການ​ປະ​ກອບ​ສ່ວນ​ຂອງ​ບັນ​ດາ​ສະ​ຫາຍອະ​ດີດ ການ​ນຳ​ຂັ້ນ​ສູງ​ຂອງ​ພັກ, ລັດ ຫວຽດ​ນາມ.

        ບັນ​ດາ​ສະ​ຫາຍອະ​ດີດ​ກາ​ນ​ນຳ​ຂັ້ນ​ສູງ ຂອງ​ຫວຽດ​ນາມ ໄດ້​ສະ​ແດງ​ຄວາມ​ຂອບ​ໃ​ຈ ຕໍ່​ໄມ​ຕີ​ຈິດ​ມິດ​ຕະ​ພາບ​ເພື່ອນ​ສະ​ຫາຍ ອັນ​ແທ້​ຈິງ ຂອງ​ສະ​ຫາຍ ທອງ​ລຸນ ສີ​ສຸ​ລິດ; ບັນ​ດາ​ສະ​ຫາຍ ອະ​ດີດ​ການ​ນຳ ຫວຽດ​ນາມ ກໍ​ໄດ້​ຝາກ​ຄຳ​ຢື້​ຢາມ​ຖາມ​ຂ່າວ ເຖິງ​ບັນ​ດາ​ສະ​ຫາຍ ອະ​ດີດ​ການ​ນຳ​ຂັ້ນ​ສູງ ຂອງ​ພັກ, ລັດ ລາວ ພ້ອມ​ທັງ​ຕິດ​ຕ​າມ ແລະ ເອົາ​ໃຈ​ໃສ່ ໃນ​ການ​ເສີມ​ຂະ​ຫຍາຍ​ສາຍ​ພົວ​ພັນ​ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ພິ​ເສດ ແລະ​ ການ​ຮ່ວມ​ມື​ຮອບ​ດ້ານ​ລະ​ຫວ່​າງ ລາວ-ຫວຽດ​ນາມ ໄລ​ຍະ​ຜ່ານ​ມາ.

       ບັນ​ດາ​ສະ​ຫາຍ ອະ​ດີດ​ການ​ນຳ ຂັ້ນ​ສູງ​ຂອງ ຫວຽດ​ນາມ ຍັງຈົດ​ຈຳ​ເຖິງ​ນ້ຳ​ໃຈ​ໄມ​ຕີ​ຈິດ​ ອັນ​ສະ​ໜິດ​ສະ​ໜົມ ຕໍ່​ກັບ​ປະ​ເທດ​ຊາດ ກໍ​ຄື ປະ​ຊາ​ຊົນ ​ລ​າວອ້າຍ​ນ້ອງ, ພ້ອມ​ທັງ​ສະ​ແດ​ງ​ຄວາມ​ຂອບ​ໃຈ ຕໍ່​ການ​ສະ​ໜັບ​ສະ​ໜູນ​ອັນ​ລ້ຳ​ຄ່າ​ຂອງ​ພັກ, ລັດ ແລະ ປະ​ຊາ​ຊົນລາວ ບັນ​ດາ​ເຜົ່າ ​ທີ່​ມີ​ຕໍ່​ຫວຽດ​ນາມ ແລະ ສະ​ເໜີ​ໃຫ້ ສອງ​ຝ່າຍ ສືບ​ຕໍ່​ເສີມ​ຂະ​ຫຍາຍ​ສາຍ​ພົວ​ພັນ ມິດ​ຕະ​ພາບ​ແບບ​ພິ​ເສດ ຫວຽດ​ນາມ-ລາວ ໃຫ້​ໄດ້​ຮັບ​ການ​ຍົກ​ສູງ ປະ​ສິດ​ທິ​ພາບ​ການ​ຮ່ວມ​ມື ກໍ​ຄື ການ​ຈັດ​ຕັ້ງ​ຜັນ​ຂະ​ຫຍາຍ​ປະ​ສິດ​ທິ​ພາບ​ ບັນ​ດາ​ຂໍ້​ຕົກ​ລົງ, ບົດ​ບັນ​ທຶກ ລະ​ຫວ່າງ ສອງ​ພັກ, ສອງ​ລັດ ພ້ອມ​ທັງ​ເນັ້ນ​ໜັກ​ເຖິງ​ການ​ສື​ບ​ຕໍ່​ເອົາ​ໃຈ​ໃສ່​ໃນ​ການ​ສຶກ​ສາ ແລະ ໂຄ​ສະ​ນາ​ໃຫ້​ປະ​ຊາ​ຊົນ​ສອງ​ປະ​ເທດ ເປັນ​ຕົ້ນ​ແມ່ນ​ໄວ​ໜຸ່ມ ໃຫ້​ຮັບ​ຮູ້​ເຖິງ​ມູນ​ເຊື້ອ​ ການ​ພົວ​ພັນ​ແບບ​ພິ​ເສດ​ທີ່​ຫາ​ຍາກ ແບບມີ 1 ບໍ່​ມີ 2 ໄວ້​ຕະຫຼອດ​ໄປ, ຊ່ວຍ​ເຫຼືອ​ກັນພັດທະນາປະເທດຊາດຂອງຕົນ ໃຫ້ນັບມື້ນັບເຂັ້ມແຂງ ໃນ​ເງື່ອນ​ໄຂ​ເຊື່ອມ​ໂຍງ​ສາ​ກົນ, ເດີນຕາມແນວທາງຂອງ ພັກ, ລັດ​ຂອງ​ສອງ​ປະ​ເທດ ເພື່ອໃຫ້ສົມກັບການເສຍສະຫຼະອັນສູງສົ່ງ, ໃຫຍ່ຫຼວງ ຂອງບັນດາຮຸ່ນການນຳ ແລະ ບັນ​ດານັກຮົບປະຕິວັດ ຂອງສອງຊາດພວກເຮົາ.

(ຂ່າວ-ພາບ: ກຕທ)

---