ສະຫາຍເລຂາທິການໃຫຍ່, ປະທານປະເທດ ສປປ ລາວ ຕ້ອນຮັບ ການເຂົ້າຢ້ຽມຂໍ່ານັບຂອງ ຄະນະຜູ້ແທນຂັ້ນສູງພັກແຮງງານເກົາຫຼີ.

ເຜີຍ​ແຜ່​ໂດຍ​: moderator ເວ​ລາ: 30/03/2024 12:25:41 ຈຳ​ນວນ​​ຢ້ຽມ​ຊົມ 386 ຄັ້ງ ​

        ໃນຕອນບ່າຍ ຂອງ​ ວັນ​ທີ 29 ມີນາ 2024 ທີ່ ສໍານັກງານຫ້ອງວ່າການສູນກາງພັກ, ສະຫາຍ ທອງລຸນ ສີສຸລິດ, ​ເລຂາທິການ​ໃຫຍ່ ​ຄະນະ​ບໍລິຫານ​ງານ​ສູນ​ກາງ ​ພັກ ປປ ລາວ​, ປະທານປະເທດ ແຫ່ງ ສປປ ລາວ ໄດ້ຕ້ອນ​ຮັບ​ການ​ເຂົ້າ​ຢ້ຽມ​ຂໍ່ານັບ ​ຂອງ ​ສະຫາຍ ກິມຊອງນາມ, ກຳ​ມະ​ການສໍາຮອງ​ກົມ​ການ​ເມືອງ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກແຮງງານເກົາຫຼີ ພ້ອມດ້ວຍຄະນະ ໃນໂອກາດເດີນທາງມາ​ຢ້ຽມຢາມ  ແລະ ເຮັດວຽກຢູ່ ສ​ປ​ປ ລາວ ໃນລະຫວ່າງ​ວັນ​ທີ 28-31 ມີນາ 2024.

       ສະຫາຍ ທອງລຸນ ສີສຸລິດ ​ໄດ້ສະ​ແດງຄວາມຊົມເຊີຍ ແລະ ຍິນ​ດີ​ຕ້ອນ​ຮັບ​ ຢ່າງ​ອົບ​ອຸ່ນ ຕໍ່​ການ​ມາ​ຢ້ຽມ​ຢາມ ສປປ ​ລາວ ຂອງ ​ຄະ​ນະ​ຜູ້​ແທນ​ຂັ້ນ​ສູງ​ພັກ​ແຮງ​ງານ​ເກົາ​ຫຼີ ໃນ​ຄັ້ງ​ນີ້, ເຊິ່ງເປັນການປະກອບສ່ວນສໍາຄັນເຂົ້າໃນການ ເພີ່ມພູນຄູນສ້າງ ສາຍພົວພັນມິດຕະພາບ ແລະ ການ​ຮ່ວມ​ມື ອັນ​ເປັນ​ມູນ​ເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ສປປ ລາວ-ສປປ ເກົາຫຼີ. ໃນ​ໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ແຈ້ງສະພາບ ພົ້ນເດັ່ນ ຂອງ ພັກ-ລັດລາວ ໃຫ້ ຄະນະຊາບ, ໂດຍສະເພາະ ​ຜົນສໍາເລັດການຈັດຕັ້ງປະຕິບັດມະຕິ ກອງປະຊຸມໃຫຍ່ ສະໄໝທີ XI ຂອງພັກ ປປ ລາວ ໃນໄລຍະເຄິ່ງສະໄໝຜ່ານມາ, ການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມແຫ່ງຊາດ 5 ປີ ຄັ້ງທີ 9, ຜົນສໍາເລັດການປະຕິບັດ 2 ວາລະແຫ່ງຊາດ, ການກະກຽມດໍາ ເນີນກອງປະຊຸມ 3 ຂັ້ນ ເພື່ອກ້າວສູ່ການດໍາເນີນກອງປະຊຸມໃຫຍ່ ສະໄໝທີ XII ຂອງ ພັກ ປປ ລາວ ໃນຕົ້ນປີ 2026. ພ້ອມນັ້ນ, ສະຫາຍ ຍັງໄດ້ແຈ້ງ ໃຫ້ຝ່າຍແຂກ ຊາບກ່ຽວກັບ ຜົນສໍາເລັດໃນການເຄື່ອນໄຫວວຽກ ງານການຕ່າງປະເທດຂອງ ພັກ-ລັດ ລາວ ໃນໄລຍະຜ່ານມາ ກໍຄື ການເປັນປະທານໝູນວຽນອາຊຽນ ແລະ ການເປີດ ປີທ່ອງທ່ຽວຂອງ ສປປ ລາວ ໃນປີນີ້, ຫວັງວ່າ ພັກ-ລັດຖະບານ ສປປ ເກົາຫຼີ ຈະສືບຕໍ່ໃຫ້ການສະໜັບສະໜູນ ການເປັນປະທານດັ່ງກ່າວຂອງ ສປປ ລາວ ໃນຄັ້ງນີ້.

        ສະຫາຍ​ເລຂາທິການ​ໃຫຍ່ ທອງລຸນ ສີສຸລິດ ​ໄດ້​ສະ​ແດງ​ຄວາມປິ​ຕິ​ຍິນ​ດີ ​ທີ່​ເຫັນ​ວ່າ​ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ລາວ-ສປປ ເກົາຫຼີ ທີ່ ປະ​ທານ ໄກ​ສອນ ພົມ​ວິ​ຫານ ແລະ ປະ​ທານ ກິມ​ອິນ​ຊຸງ ໄດ້ຮ່ວມ​ກັນ​ສ້າງ​ຂື້ນມາ​ ໃນເມື່ອ 50 ປີກ່ອນ ສືບຕໍ່ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍຂຶ້ນຢ່າງບໍ່​ຢຸດຢັ້ງ ແລະ ໄດ້ສະແດງຄວາມຂອບໃຈຕໍ່ ພັກ, ລັດ ແລະ ປະຊາຊົນ ສປປ ເກົາຫຼີ ທີ່ໄດ້ໃຫ້ການສະໜັບສະໜູນແກ່ ພາລະກິດການຕໍ່ສູ້ປົດປ່ອຍຊາດຂອງລາວ ໃນເມື່ອກ່ອນ ກໍ່ຄື ພາລະກິດປົກປັກຮັກສາ ແລະ ສ້າງສາ ພັດທະນາປະເທດຊາດ ໃນປັດຈຸບັນ.

        ສະຫາຍ ກິມຊອງນາມ ​​ໄດ້ສະ​ແດງ​ຄວາມ​ຂອບ​ໃຈ ​​​ຕໍ່ການຕ້ອນຮັບອັນອົບອຸ່ນ, ພ້ອມທັງ ໄດ້ແຈ້ງໃຫ້ຊາບ ກ່ຽວກັບ ສະພາບພົ້ນເດັ່ນຂອງ ພັກ, ລັດ ສປປ ເກົາຫຼີ ໃນຜ່ານມາ, ໂດຍສະເພາະ ຜົນສຳເລັດໃນການຈັດຕັ້ງ ຜັນຂະຫຍາຍ ມະຕິກອງປະຊຸມໃຫຍ່ ສະໄໝທີ VIII ຂອງພັກ, ຜົນສຳເລັດ ໃນການສ້າງສາ ພັດທະນາເສດຖະ  ກິດ-ສັງຄົມ ສປປ ເກົາຫຼີ ໃນຕະຫຼອດໄລຍະຜ່ານມາ ພາຍໃຕ້ການນໍາພາອັນເຂັ້ມແຂງ ແລະ ເດັດດ່ຽວຂອງ ພັກແຮງ ງານເກົາຫຼີ, ພ້ອມທັງຍັງໄດ້ນຳ​ເອົາ​ຄວາມ​ຢ້ຽມຢາມ​ຖາມ​ຂ່າວອັນອົບອຸ່ນຂອງ ​ສະຫາຍ ກິມເຈິງອູນ, ເລຂາທິການ ໃຫຍ່ ພັກແຮງງານເກົາຫຼີ ມາ​ຍັງ​ ສະຫາຍເລ​ຂາ​ທິ​ການ​ໃຫ​ຍ່ ທອງລຸນ ສີສຸລິດ ແລະ ການນຳຂັ້ນສູງພັກ-ລັດລາວ; ສະ​ແດ​ງຄວາມຊົມ​ເຊີຍ ຕໍ່ບັນດາຜົນ​ສຳ​ເລັດ​ ທີ່ປະ​ຊາ​ຊົນ​ລາວພາຍໃຕ້ການຊີ້ນໍາ-ນໍາພາອັນຖືກຕ້ອງ ແລະ ສະຫຼາດ ສ່ອງໃສຂອງ ພັກ ປປ ລາວ ຍາດ​ມາ​ໄດ້ໃນ​ການ​ຈັດ​ຕັ້ງ​ຜັນ​ຂະ​ຫຍາຍ​​ ມະ​ຕິ​ກອງ​ປະ​ຊຸມ​ໃຫ່​ຍ​ ສະໄໝ​ທີ XI ຂອງ​ພັກ, ການສ້າງສາພັດທະນາປະເທດຊາດ ຕາມທິດສັງຄົມນິຍົມ, ເຮັດ​ໃຫ້​ ສປປ ລາວ ​ມີ​ຄວາມມັ່ງຄັ່ງ, ເຂັ້ມແຂງ, ປະຊາ ຊົນຮັ່ງມີຜາສຸກ, ສັງຄົມມີຄວາມປອງດອງ, ປະຊາທິປະໄຕ, ຍຸດຕິທໍາ ແລະ ສີວິໄລ.

        ສອງຝ່າຍໄດ້ຕີລາຄາສູງ ຕໍ່ອຸດົມການ ແລະ ການພົວພັນຮ່ວມມືຂອງສອງພັກ, ສອງລັດ ທີ່ໄດ້ຜ່ານແປວ ໄຟປະຕິວັດ ແລະ ການທົດສອບນານາປະການ ໃນໄລຍະ 50 ປີຜ່ານມາ, ເຊິ່ງປີນີ້ ແມ່ນຄົບຮອບ 50 ປີ ແຫ່ງການ ພົວພັນການທູດຂອງສອງປະເທດ, ສອງຝ່າຍ ຍິນດີສືບຕໍ່ເພີ່ມທະວີ ແລະ ເສີມຂະຫຍາຍສາຍພົວພັນການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໃນໄລຍະໃໝ່ ເພື່ອນໍາເອົາຜົນປະໂຫຍດ ຕົວຈິງ ມາສູ່ ປະຊາຊົນ ສອງຊາດ ລາວ-ສປປ ເກົາຫຼີ ໃຫ້ນັບມື້ຫຼາຍຂຶ້ນ.

​​        ໃນ​ວັນ​ດຽວກັນ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວ​ພັນ​ຕ່າງ​ປະ​ເທດ​ສູນ​ກາງພັກ ປປ ລາວ ໄດ້ພົບປະເຮັດວຽກສອງຝ່າຍ ກັບ ສະຫາຍ​ ກິມຊອງນາມ, ກໍາມະການສໍາຮອງກົມການ ເມືອງ, ຫົວໜ້າຄະນະພົວພັນຕ່າງປະເທດສູນກາງພັກແຮງງານເກົາຫຼີ ເຊິ່ງ ສອງຝ່າຍ ໄດ້ແຈ້ງ ໃຫ້ກັນຊາບສະພາບ ພົ້ນເດັ່ນ ແລະ ການເຄື່ອນໄຫວຂອງແຕ່ລະພັກ ໃນໄລຍະຜ່ານມາ ແລກປ່ຽນຄໍາຄິດເຫັນ ກ່ຽວກັບ ສະພາບພາກພື້ນ ແລະ ສາກົນ ຈໍານວນໜຶ່ງ, ປຶກສາຫາລື ແລະ ເປັນເອກະພາບກັນກ່ຽວກັບ ທິດທາງການ ຮ່ວມມື ສອງຝ່າຍ ໃນຕໍ່ ໜ້າ, ໂດຍສະເພາະ ການເພີ່ມທະວີການຮ່ວມມື ແລະ ແລກປ່ຽນບົດຮຽນດ້ານຕ່າງໆນໍາກັນ, ການແລກປ່ຽນການ ຢ້ຽມຢາມ ແລະ ໄປມາຫາສູ່ກັນ ຂອງສອງຝ່າຍ, ການຈັດກິດຈະກໍາຕ່າງໆ ໃນໂອກາດສະເຫຼີມ ສະຫຼອງວັນສ້າງຕັ້ງ ສາຍພົວພັນການທູດ ຄົບຮອບ 50 ປີ ແລະ ອື່ື່ນໆ ເພື່ອປະກອບສ່ວນ ເຂົ້າໃນການເສີມຂະຫຍາຍ ສາຍພົວພັນ ມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ສປປ ເກົາຫຼີ ທັງເປັນການປະກອບສ່ວນເຂົ້າ ໃນພາລະກິດ ເສີມສ້າງສັນຕິພາບ, ມິດຕະພາບ ແລະ ການຮ່ວມ ມືເພື່ອການພັດທະນາ ໃນພາກພື້ນ ແລະ ໃນໂລກ.

        ພ້ອມນັ້ນ, ໃນໂອກາດດັ່ງກ່າວ, ຄະນະ ຍັງໄດ້ຢ້ຽມຢາມພື້ນຖານການຜະລິດ, ແຫຼ່ງທ່ອງທ່ຽວວັດທະນະທໍາ ແລະ ປະຫວັດສາດ ຈໍານວນໜຶ່ງ ຢູ່ ນະຄອນຫຼວງວຽງຈັນ ແລະ ແຂວງວຽງຈັນ.

---