ຄະນະຜູ້ແທນຂັ້ນສູງພັກກອມມູນິດຍີປຸ່ນ ຢ້ຽມຢາມ ແລະ ເຮັດວຽກ ຢູ່ ສປປ ລາວ.

ເຜີຍ​ແຜ່​ໂດຍ​: editor ເວ​ລາ: 15/02/2024 15:46:29 ຈຳ​ນວນ​​ຢ້ຽມ​ຊົມ 531 ຄັ້ງ ​

        ໃນຕອນເຊົ້າຂອງ ວັນທີ 23 ທັນວາ 2023 ທີ່ ສຳນັກງານ ຫ້ອງວ່າການສູນກາງພັກ, ສະຫາຍ ທອງລຸນ ສີສຸລິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ສະຫາຍ ຊິອິ ຄາຊູໂອະ, ປະທານ ຄະນະບໍລິຫານງານ ພັກກອມມູນິດຍີປຸ່ນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 22-24 ທັນວາ 2023. 

        ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ​ຢ່າງ​ອົບ​ອຸ່ນ​ ຕໍ່ການມາຢ້ຽມຢາມ ສປປ ລາວ ຂອງຄະນະ, ເຊິ່ງເປັນການຢ້ຽມຢາມຄັ້ງທໍາອິດ, ອັນໄດ້ເປັນການປະກອບສ່ວນສໍາຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ພັກ ປປ ລາວ ແລະ ພັກກອມມູນິດຍີປຸ່ນ ກໍ່​ຄື ປະຊາຊົນສອງຊາດ ລາວ-ຍີປຸ່ນ; ສະຫາຍເລຂາທິການໃຫຍ່ ໄດ້ແຈ້ງສະພາບພົ້ນເດັ່ນຂອງ     ພັກ-ລັດ ລາວ ໃຫ້ຄະນະຊາບ, ໂດຍສະເພາະ ຜົນສໍາເລັດໃນການຈັດຕັ້ງຜັັນຂະຫຍາຍມະຕິກອງປະຊຸມໃຫຍ່ ສະໄໝທີ XI ຂອງ ພັກ ປປ ລາວ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9, ການປະຕິບັດ 2 ວາລະແຫ່ງຊາດ, ເຊິ່ງເປັນວຽກຈຸດສຸມ ແລະ ສືບຕໍ່ໃນປັດຈຸບັນ. ພ້ອມນັ້ນ, ສະຫາຍ ທອງລຸນ ສີສຸລິດ ຍັງໄດ້ແຈ້ງໃຫ້ຝ່າຍຍີປຸ່ນ ຊາບ ກ່ຽວກັບ ຜົນສໍາເລັດໃນການເຄື່ອນໄຫວວຽກງານການຕ່າງປະເທດຂອງພັກ-ລັດ ລາວ ໃນໄລຍະຜ່ານ  ມາ, ກໍ່ຄື ການກະກຽມເປັນປະທານອາຊຽນຂອງ ສປປ ລາວ ໃນປີ 2024 ແລະ ຫວັງວ່າ ພັກກອມມູນິດຍີປຸ່ນ ຈະສະໜັບສະໜູນການເປັນປະທານອາຊຽນດັ່ງກ່າວ ຂອງ ສປປ ລາວ. ສະຫາຍ ທອງລຸນ ສີສຸລິດ ໄດ້ສະແດງຄວາມຂອບໃຈ ຕໍ່ ປະຊາຊົນຍີປຸ່ນ ທີ່ໄດ້ໃຫ້ການຊ່ວຍເຫຼືອ, ສະໜັບສະໜູນ ພາລະກິດປະຕິວັດຂອງ ພັກ ປປ ລາວ ໃນເມື່ອກ່ອນ ກໍ່ຄື ການສ້າງສາພັດທະນາປະເທດຊາດຂອງ ສປປ ລາວ ໃນປະຈຸບັນ.

        ໃນໂອກາດດັ່ງກ່າວ, ສະຫາຍ ຊິອິ ຄາຊູໂອະ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ພ້ອມທັງ ໄດ້ແຈ້ງໃຫ້ຊາບ ສະພາບພົ້ນເດັ່ນພາຍໃນພັກກອມມູນິດຍີປຸ່ນ ເປັນຕົ້ນແມ່ນ ຜົນສຳເລັດໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ 28 ຂອງພັກ ໃນໄລຍະຜ່ານມາ, ໂດຍສະເພາະ ໄດ້ຊຸກຍູ້ ແລະ ສ້າງເງື່ອນໄຂໃຫ້ແກ່ ປະຊາຊົນ ຊາວຜູ້ອອກແຮງງານຍີປຸ່ນ ໃຫ້ມີວຽກເຮັດງານທໍາ, ການສ້າງພະນັກງານການນໍາໜຸ່ມນ້ອຍ ເພື່ອປະກອບສ່ວນເຂົ້າໃນການເຄື່ອນໄຫວຕ່າງໆຂອງພັກ ຕາມມະຕິຂອງຂອງປະຊຸມໃຫຍ່ ຄັ້ງທີ 28 ໄດ້ວາງອອກ; ແຈ້ງໃຫ້ຊາບກ່ຽວກັບການຂຸ້ນຂ້ຽວກະກຽມດໍາເນີນກອງປະຊຸມໃຫຍ່ ຄັ້ງທີ 29 ຂອງພັກ ໃນຕົ້ນປີ 2024 ແລະ ບາງເນື້ອໃນສໍາຄັນທີ່ຈະຮັບຮອງເອົາໃນກອງປະຊຸມໃຫຍ່ຄັ້ງທີ 29 ຂອງພັກ ໂດຍສະເພາະ ແຜນການພັດທະນາສັງຄົມ ບົນພື້ນຖານຄວາມສາມັກຄີ ຂອງສະມາຊິກພັກ ແລະ ປະຊາຊົນພາຍໃນປະເທດຍີ່ປຸ່ນ ເພື່ອສ້າງສັງຄົມຍີ່ປຸ່ນໃຫ້ຈະເລີນຮຸ່ງເຮືອງ. ພ້ອມນັ້ນ, ສະຫາຍ ຊິອິ ຄາຊູໂອະ ຍັງໄດ້ສະແດງຄວາມຊົມເຊີຍບັນດາຜົນສໍາເລັດໃນດ້ານຕ່າງໆ ທີ່ປະຊາຊົນລາວ ພາຍໃຕ້ການນໍາພາ ຂອງ ພັກປະຊາຊົນ ປະຕິວັດລາວ ຍາດມາໄດ້ໃນການສ້າງສາ ພັດທະນາປະເທດຊາດ, ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ສະໄໝທີ XI ຂອງພັກ, ຍິນດີສືບຕໍ່ເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ພັກກອມມູນິດຍີປຸ່ນ ແລະ ພັກປະຊາຊົນ ປະຕິວັດລາວ ເພື່ອປະກອບສ່ວນຊຸກຍູ້ການພົວພັນຮ່ວມມື ລະຫວ່າງ ສອງປະເທດ ໂດຍສະເພາະ ການຊ່ວຍເຫຼືອລາວເກັບກູ້ລະເບີດບໍ່ທັນແຕກ ຢູ່ ສ ປປ ລາວ ແລະ ອື່ນໆ, ອວຍພອນການເປັນປະທານໝູນວຽນອາຊຽນ ຂອງ ສ ປປ ລາວ ໃນປີ 2024.

        ສອງຝ່າຍ ຕີລາຄາສູງຕໍ່ອຸດົມການຂອງທັງສອງພັກ ໂດຍຍຶດຫມັ້ນແນວທາງປົກປັກຮັກສາສັນຕິພາບ ເພື່ອສ້າງສະພາບແວດລ້ອມທີ່ອຳນວຍໃຫ້ແກ່ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ;ຍິນດີສືບຕໍ່ເພີ່ມທະວີການພົວພັນຮ່ວມມື ເພື່ອເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ສອງພັກ ໂດຍສະເຫນີໃຫ້ມີ ການຄົ້ນຄວ້າສ້າງຕັ້ງກົນໄກ ການແລກປ່ຽນ ແລະ ການຮ່ວມມື ລະຫວ່າງ ສອງພັກ ເພື່ອປະກອບສ່ວນເຂົ້າໃນການຊຸກຍູ້ການພົວພັນຮ່ວມມື ລະຫວ່າງ ສອງປະເທດ ຍີປຸ່ນ-ລາວ, ລາວ-ຍີປຸ່ນ ໃຫ້ໄດ້ຮັບການພັດທະນາຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ລາວ-ຍີ່ປຸ່ນ ໃຫ້ນັບມື້ຫຼາຍຂຶ້ນ.

        ໃນວັນດຽວກັນ, ສະຫາຍ ບຸນທອງ ຈິດມະນີ, ກໍາມະການກົມການເມືອງ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໄດ້ພົບປະເຮັດວຽກກັບ ສະຫາຍ ຊິອິ ຄາຊູໂອະ, ເຊິ່ງສອງຝ່າຍ ໄດ້ແຈ້ງໃຫ້ກັນຊາບກ່ຽວກັບ ສະພາບການພົ້ນເດັ່ນ ແລະ ການເຄື່ອນໄຫວຂອງແຕ່ລະພັກ ໃນໄລຍະຜ່ານມາ, ປຶກສາຫາລື ແລະ ເປັນເອກະພາບກັນ ກ່ຽວກັບ ທິດທາງການຮ່ວມມື ໃນຕໍ່ໜ້າ ໂດຍສະເພາະ ການເພີ່ມທະວີການຮ່ວມມື ແລະ ແລກປ່ຽນການຢ້ຽມຢາມໄປມາຫາສູ່ກັນ ລະຫວ່າງ ສອງພັກ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນ ມິດຕະພາບ ອັນເປັນມູນເຊື້ອ ລະຫວ່າງ 2 ພັກ ກໍ່ຄື ການພົວພັນຄູ່ຮ່ວມຍຸດທະສາດ ລະຫວ່າງ ສອງປະເທດ ລາວ-ຍີ່ປຸ່ນ ໃຫ້ໄດ້ຮັບການພັດທະນາຍິ່ງໆ, ທັງເປັນການປະກອບສ່ວນເຂົ້າໃນພາລະກິດເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ. ນອກນັ້ນ, ສອງຝ່າຍ ຍັງໄດ້ແລກປ່ຽນຄໍາຄິດເຫັນ     ກ່ຽວກັບ ສະພາບພາກພື້ນ ແລະ ສາກົນຈໍານວນໜຶ່ງ ທີ່ສອງຝ່າຍມີຄວາມສົນໃຈຮ່ວມກັນ.

        ໃນໂອກາດການຢ້ຽມຢາມດັ່ງກ່າວ, ຄະນະຜູ້ແທນ ຍັງໄດ້ພົບປະເຮັດວຽກສອງຝ່າຍກັບ ຄະນະນໍາ ກະຊວງການຕ່າງປະເທດ ເພື່ອແລກປ່ຽນຄໍາຄິດເຫັນກ່ຽວກັບ ການເສີມຂະຫຍາຍສາຍພົວພັນ ອາຊຽນ-ຍີປຸ່ນ ກໍ່ຄື ການກະກຽມເປັນປະທານກອງປະຊຸມອາຊຽນຂອງ ສປປ ລາວ ໃນປີ 2024.

        ພ້ອມນັ້ນ, ໃນໂອກາດດັ່ງກ່າວ ຄະນະ ຍັງໄດ້ໄປຢ້ຽມຢາມພື້ນຖານການຜະລິດ, ແຫຼ່ງທ່ອງທ່ຽວວັດທະນະທໍາ, ທໍາມະຊາດ ແລະ ປະຫວັດສາດ ຈໍານວນໜຶ່ງ ຢູ່ ນະຄອນຫຼວງວຽງຈັນ ແລະ ແຂວງວຽງຈັນ.

---