ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ພົບປະກັບ ຫົວໜ້າຄະນະພົວພັນຕ່າງປະເທດ ສູນກາງພັກກອມມູນິດຫວຽດນາມ

ເຜີຍ​ແຜ່​ໂດຍ​: admin ເວ​ລາ: 11/03/2022 11:12:02 ຈຳ​ນວນ​​ຢ້ຽມ​ຊົມ 661 ຄັ້ງ ​

ສະຫາຍ ທອງສະຫວັນ ພົມວິຫານ ກໍາມະການສູນກາງພັກ ຫົວໜ້າຄະນະພົວພັນຕ່າງ ປະເທດສູນກາງພັກປະຊາຊົນ ປະຕິວັດລາວ ພ້ອມດ້ວຍຄະນະ ໄດ້ຕ້ອນຮັບ ແລະ ພົບປະເຮັດ ວຽກກັບ ສະຫາຍ ເລ ຮວາຍຈຸງ ກໍາມະການສູນກາງພັກ ຫົວໜ້າຄະນະພົວພັນຕ່າງປະເທດສູນ ກາງພັກກອມມູນິດຫວຽດນາມ ພ້ອມດ້ວຍຄະນະໃນ​ວັນ​ທີ 9 ສິງ​ຫາ 2021 ທີ່​ນະ​ຄອນຫຼວງວຽງ​ຈັນ, ໃນໂອກາດຕິດຕາມຄະນະຜູ້ແທນຂັ້ນສູງຂອງ ພັກ, ລັດ ສສ ຫວຽດນາມ ນໍາໂດຍ ສະຫາຍ ຫງວຽນຊວັນຟຸກ ປະທານປະເທດ ແຫ່ງ ສສ ຫວຽດນາມ ພ້ອມພັນລະຍາ ມາຢ້ຽມຢາມສັນຖະ ວະໄມຕີ ສປປ ລາວ ຢ່າງເປັນທາງການ.

ໃນການພົບປະຄັ້ງນີ້, ສອງຝ່າຍໄດ້ແຈ້ງໃຫ້ກັນຊາບ ສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ; ແລກປ່ຽນບາງທັດສະນະຕໍ່ ສະພາບການຂອງພາກພື້ນ, ສາກົນ ແລະ ບາງບັນຫາ ທີ່ສອງຝ່າຍມີຄວາມສົນໃຈຮ່ວມກັນ; ຕີລາຄາຄືນ ການພົວພັນຮ່ວມມືລະຫວ່າງ ສອງພັກ ກໍຄືລະຫວ່າງ ສອງຄະນະພົວພັນຕ່າາງປະເທດສູນກາງພັກ ລາວ-ຫວຽດນາມ ໃນໄລຍະຜ່ານມາ ແລະ ປຶກສາຫາລືກ່ຽວກັບທິດທາງແຜນການຮ່ວມມືໃນຕໍ່ໜ້າ. ສອງຝ່າຍ ຕ່າງກໍໄດ້ສະແດງ ຄວາມຊົມເຊີຍ ແລະ ຕີລາຄາສູງ ຕໍ່ຜົນສໍາເລັດຂອງການພັດທະນາເສດຖະກິດ-ສັງຄົມຂອງແຕ່ລະ ປະເທດ ໃນສະພາບຄວາມຫຍຸ້ງຍາກຂອງການແຜ່ລະບາດເຊື້ອພະຍາດໂຄວິດ-19, ກໍຄື ຄວາມເອົາໃຈໃສ່ ໃນການຊີ້ນໍາ-ນໍາພາຂອງ ພັກ, ລັດຖະບານ ໃນການວາງບັນດາມາດຕະການຕ່າງໆ ກໍຄືການຮ່ວມມື, ສະໜັບສະໜູນຊ່ວຍເຫຼືອກັນ ໃນວຽກງານປ້ອງກັນ ​ແລະ ສະກັດກັ້ນການ ແຜ່ລະບາດຂອງພະຍາດດັ່ງກ່າວ; ຕີລາຄາສູງຕໍ່ການພົວພັນຮ່ວມມືລະຫວ່າງ ສອງພັກ ​ແລະ ສອງ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ລາວ-ຫວຽດນາມ ທີ່ສືບຕໍ່ໄດ້ຮັບການເພີ່ມພູນຄູນສ້າງ ດ້ວຍຫຼາຍຮູບການທີ່ແທດເໝາະກັບສະພາບການໃນປັດຈຸບັນຢ່າງມີປະສິດທິຜົນ, ອັນໄດ້ເປັນການປະ ກອບສ່ວນສໍາຄັນເຂົ້າໃນການຈັດຕັ້ງຜັນຂະຫຍາຍ ຂໍ້ຕົກລົງລະຫວ່າງການນໍາຂັ້ນສູງຂອງສອງພັກ, ສອງລັດ ກໍຄືຂໍ້ຕົກລົງການຮ່ວມມືຂອງ ສອງຄະນະ​ພົວພັນ​ຕ່າງປະ​ເທດ​ສູນກາງ​ພັກ ລາວ-ຫວຽດນາມ ໄລຍະສົກປີ 2021–2025, ໂດຍສະເພາະການເປັນໃຈກາງປະສານສົມທົບກັນຢ່າງແໜ້ນແຟ້ນ ໃນການປະກອບສ່ວນເຂົ້າໃນຜົນສໍາເລັດຂອງກອງປະຊຸມໃຫຍ່ຜູ້ແທນທົ່ວປະເທດຂອງແຕ່ລະພັກ ກໍຄື ກອງປະຊຸມວິດີໂອທາງໄກ ແຈ້ງຜົນສໍາເລັດຂອງກອງປະຊຸມດັ່ງກ່າວ, ການສົນທະນາທາງໄກລະ ຫວ່າງສອງເລຂາທິການໃຫຍ່, ການກະກຽມໃຫ້ແກ່ການຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການຂອງ ສະຫາຍເລຂາທິການໃຫຍ່ ປະທານປະເທດແຫ່ງ ສປປ ລາວ ໃນບໍ່ດົນ ຜ່ານມາ ກໍຄືການຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການຂອງ ສະຫາຍປະທານປະ ເທດແຫ່ງ ສສ ຫວຽດນາມ ໃນຄັ້ງນີ້.

ສອງຝ່າຍ ເຫັນດີເປັນເອກະພາບກ່ຽວກັບທິດທາງແຜນການຮ່ວມມືໃນຕໍ່ໜ້າ ໂດຍສະເພາະ ການສືບຕໍ່ພົບປະແລກປ່ຽນຄະນະຜູ້ແທນຂັ້ນຕ່າງໆນໍາກັນ; ປະຕິບັດກົນໄກແລກປ່ຽນສະພາບການ ພາກພື້ນ ແລະ ສາກົນນໍາກັນໃຫ້ເປັນປະຈໍາ, ບໍ່ວ່າຈະເປັນການພົບປະໂດຍກົງ, ຜ່ານໂທສະສັບ ແລະ ວິດີໂອທາງໄກ; ສືບຕໍ່ຕິດຕາມຊຸກຍູ້ ບັນດາຄະນະຂອງສູນກາງພັກ, ກະຊວງ, ຂະແໜງການ ແລະ ທ້ອງຖິ່ນຂອງສອງປະເທດ ໃນການຈັດຕັ້ງປະຕິບັດ ຂໍ້ຕົກລົງລະຫວ່າງ ການນໍາຂັ້ນສູງຂອງ ສອງພັກ, ສອງລັດ, ເປັນຕົ້ນການຝຶກອົບຮົມ ແລະ ບໍາລຸງສ້າງພະນັກງານການນໍາ, ພະນັກງານນໍາພາ-ຄຸ້ມຄອງ ໃຫ້ແກ່ ພັກປະຊາຊົນ ປະຕິວັດລາວ; ການປະສານສົມທົບໃນການຈັດກອງປະຊຸມສໍາມະນາທິດສະດີ ຄັ້ງທີ VIII ກໍຄືການກະກຽມດ້ານຕ່າງໆໃຫ້ແກ່ການຢ້ຽມຢາມ ແລະ ພົບປະກັນ ລະຫວ່າງການ ນໍາຂັ້ນສູງຂອງ ສອງພັກ ລາວ-ຫວຽດນາມ ໃນຕໍ່ໜ້າ. ພ້ອມນັ້ນ, ສອງຝ່າຍຍັງໄດ້ເປັນເອກະພາບ ທີ່ຈະຮ່ວມກັນກະກຽມຈັດກິດຈະກໍາຕ່າງໆເພື່ອສະເຫຼີມສະຫຼອງ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໃນປີ 2022.

ສອງຝ່າຍ ຕີລາຄາສູງຕໍ່ການພົບປະໃນຄັ້ງນີ້, ​ເຖິງ​ວ່າ​ຈະມີເວລາ​ອັນ​ສັ້ນໆ, ແຕ່ການພົບປະ ແມ່ນມີເນື້ອໃນອຸດົມສົມບູນ ແລະ ໜັກແໜ້ນ ພາຍໃຕ້ບັນຍາກາດອັນສະໜິດສະໜົມ, ມີ​ໄມ​ຕິ​ຈິດ​ມິດຕະພາບ ແລະ ຄວາມ​ສາມັກຄີ​ພິ​ເສດ ຖານສະຫາຍອ້າຍນ້ອງ ດ້ວຍ​ຜົນ​ສໍາ​ເລັດອັນ​ຈົບງາມ ​ຊຶ່ງການພົບປະເປີດສາກ ແລະ ສຳຄັນໃນຄັ້ງນີ້ ຈະເປັນການປະກອບສ່ວນສໍາຄັນເຂົ້າໃນການເພີ່ມ ພູນ​ຄູນ​ສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໂດຍສະເພາະ ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ ໃຫ້ນັບມື້ນັບກ້າວສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ.

ຂ່າວ: ກົມ ອາຊີ, ປາຊີຟິກ ແລະ ອາຝຣິກາ

---