ການພົວພັນພິເສດ ລາວ-ຫວຽດນາມ ນັບມື້ໄດ້ຮັບການພັດທະນາຢ່າງບໍ່ຢຸດຢັ້ງ
ເຜີຍແຜ່ໂດຍ: admin ເວລາ: 11/03/2022 11:09:48 ຈຳນວນຢ້ຽມຊົມ 462 ຄັ້ງ ໂດຍ: ສີວັນ
ໂດຍຕອບສະໜອງຄໍາເຊີນຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ, ສະຫາຍ ຫງວຽນຊວັນຟຸກ ແລະ ພັນລະຍາ ພ້ອມດ້ວຍຄະນະການນໍາຂັ້ນສູງແຫ່ງ ສສ ຫວຽດນາມ ໄດ້ເດີນທາງມາຢ້ຽມຢາມ ສັນຖະວະໄມຕີ ສປປລາວ ຢ່າງເປັນທາງການ ລະຫວ່າງວັນທີ 9-10 ສິງຫານີ້.
ນີ້ແມ່ນການຢ້ຽມຢາມ ລາວ ເປັນຄັ້ງທໍາອິດຂອງ ສະຫາຍ ຫງວຽນຊວັນຟຸກ ໃນຖານະເປັນປະທານປະເທດ ສສ ຫວຽດນາມ ສະໃໝ 2021-2026. ການຢ້ຽມຢາມຄັ້ງນີ້ ເປັນການປະກອບສ່ວນຢັ້ງຢືນແນວທາງການຕ່າງປະເທດຂອງສອງປະເທດ ຫວຽດນາມ - ລາວ, ຖືສໍາຄັນການປົກປັກຮັກສາ ແລະ ພັດທະນາຢ່າງບໍ່ຢຸດຢັ້ງ ການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ລາວ, ລາວ - ຫວຽດນາມ, ປະກອບສ່ວນເຂົ້າໃນການພົວພັນນັບມື້ເລິກເຊິ່ງ, ມີຄວາມເຊື່ອໝັ້ນ ລະຫວ່າງ ການນໍາຂັ້ນສູງຂອງສອງພັກ, ສອງລັດ ໃນອາຍຸການໃໝ່.
ການພົວພັນທີ່ສະໜິດແໜ້ນ ແລະ ຊື່ສັດບໍລິສຸດຜຸດຜ່ອງ.
ລາວ-ຫວຽດນາມ ເປັນປະເທດບ້ານໄກ້ເຮືອນຄຽງ, ມີສາຍພູຫຼວງ ແລະ ສາຍນໍ້າລໍາເຊຕິດຈອດກັນຍາວຢຽດແຕ່ເໜືອເຖິງໃຕ້, ການພົວພັນສະໜິດແໜ້ນຖານອ້າຍນ້ອງ ລະຫວ່າງ 2 ຊາດ ໄດ້ກໍາເນີດເກີດຂຶ້ນ ແລະ ເພີ່ມພູນຄູນສ້າງໃນປະຫວັດສາດຫຼາຍພັນປີ ແຫ່ງການສ້າງສາ ແລະ ປົກປັກຮັກສາປະເທດຊາດ. ພິເສດ ໃນກວ່າ 8 ທົດສະວັດຜ່ານມາ, ການພົວພັນອັນເປັນມູນເຊື້ອທີ່ດີງາມ, ຄວາມສະໜິດສະໜົມທີ່ບໍລິສຸດຜຸດຜ່ອງ ລະຫວ່າງ ປະຊາຊົນສອງປະເທດ ຫວຽດນາມ - ລາວ ໂດຍແມ່ນປະທານ ໂຮ່ຈິມິນ ຜູ້ນໍາທີ່ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ຜູ້ນໍາທີ່ແສນເຄົາລົບຮັກ ໄດ້ຮ່ວມກັນກໍ່ຕັ້ງ ຊຶ່ງບັນດາການນໍາແຕ່ລະຮຸ່ນຂອງສອງພັກ, ສອງລັດ ແລະ ປະຊາຊົນສອງຊາດ ເພີ່ມພູນຄູນສ້າງນັບມື້ພັດທະນາດີຂຶ້ນຢ່າງບໍ່ຢຸດຢັ້ງ ກາຍເປັນຊັບສົມບັດທີ່ລໍ້າຄ່າຂອງສອງຊາດ ແລະ ເປັນກົດເກນແຫ່ງການພັດທະນາລວມຂອງສອງປະເທດ ລາວ - ຫວຽດນາມ ບົນເສັ້ນທາງພັດທະນາປະເທດຊາດ ທີ່ວັດທະນາຖາວອນ, ປະຊາຊົນກິນອີ່ມນຸ່ງອຸ່ນ ແລະ ຜາສຸກ.
ວັນທີ 5 ກັນຍາ ປີ 1962, ຫວຽດນາມ - ລາວ ໄດ້ຮັບການສ້າງຕັ້ງສາຍພົວພັນການທູດ ແລະ ກາຍເປັນຂີດໝາຍໄໝ່ແຫ່ງການພົວພັນ ລະຫວ່າງ ສອງປະເທດ. ໂອກາດທີ່ ສະຫາຍ ຫງວຽນຝູຈ້ອງ ເລຂາທິການໃຫຍ່ ປະທານປະເທດຫວຽດນາມ ມາຢ້ຽມຢາມ ສປປ ລາວ ລະຫວ່າງເດືອນກຸມພາ 2019, ສອງຝ່າຍ ລາວ - ຫວຽດນາມ ໄດ້ເຫັນດີເປັນເອກະພາບຍົກ “ການພົວພັນທີ່ເປັນມູນເຊື້ອ” ຂຶ້ນເປັນ “ການພົວພັນທີ່ເປັນມູນເຊື້ອທີ່ຍິ່ງໃຫຍ”. ນີ້ແມ່ນຂີດໝາຍທີ່ມີຄວາມໝາຍປະຫວັດສາດສໍາຄັນ, ສ້າງບາດກ້າວບຸກທະລຸໃໝ່ໃນການພົວພັນຮ່ວມມື ລະຫວ່າງ ສອງປະເທດ. 59 ປີແຫ່ງການສ້າງຕັ້ງການພົວພັນທາງການທູດ ແລະ 44 ປີວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ສອງຊາດ ລາວ - ຫວຽດນາມ ຊຶ່ງແມ່ນການພົວພັນທີ່ສະໜິດແໜ້ນໝັ້ນຄົງ ລະຫວ່າງ ສອງປະເທດ. ການຮ່ວມມືລະຫວ່າງ ສອງປະເທດນັບມື້ອຸດົມສົມບູນ, ຫຼາຍຮູບຫຼາຍສີ ຊຶ່ງໄດ້ຮັບການປັບປຸງ, ຍົກສູງຂຶ້ນທັງທາງດ້ານປະລິມານ ແລະ ຄຸນນະພາບ.
ຫວຽດ - ລາວ ມີການຮ່ວມມືກັນໃນຫຼາຍຂົງເຂດ ບົນພື້ນຖານຄວາມໝັ້ນຄົງແຫ່ງການພົວພັນທາງດ້ານການເມືອງທີ່ໄວ້ໃຈ, ສະໜິດແໜ້ນ, ແທດຈິງ, ການພົວພັນເສດຖະກິດຂອງສອງປະເທດ ກໍນັບມື້ເລິກເຊິ່ງ. ປັດຈຸບັນ, ຫວຽດນາມ ລົງທຶນຢູ່ ລາວ 413 ໂຄງການ ດ້ວຍຍອດຈໍານວນເງິນລົງທຶນ 4,22 ຕື້ໂດລາ, ເພີ່ມຂຶ້ນປະມານ 30% ເມື່ອທຽບກັບປີ 2010. ໂຄງການໃຫຍ່ໆ ໄດ້ສໍາເລັດ ແລະ ມີປະສິດທິຜົນສູງ, ການຜະລິດທຸລະກິດໄດ້ຮັບຜົນກໍາໄລ, ສ້າງວຽກເຮັດງານທໍາໃຫ້ຜູ້ອອກແຮງງານລາວເປັນຈໍານວນຫຼວງຫຼາຍ, ປະກອບສ່ວນຢ່າງຕັ້ງໜ້າໃນການພັດທະນາຂອງສອງປະເທດ. ໄລຍະສົກປີ 2016-2021, ຍອດຈໍານວນການຄ້າ ລະຫວ່າງ ສອງປະເທດ ບັນລຸປະມານ 4,8 ຕື້ໂດລາ, ຜະລິດຕະພັນການຄ້າມີການເພີ່ມຂຶ້ນໂດຍພື້ນຖານ ຊຶ່ງມາເຖິງປັດຈຸບັນ ບັນລຸກວ່າ 1 ຕື້ໂດລາ ແລະ ມີບາດກ້າວຂະຫຍາຍຕົວຢ່າງຕັ້ງໜ້າ. ບັນດາກົນໄກນະໂຍບາຍກ່ຽວກັບພາສີອາກອນນໍາເຂົ້າ - ສົ່ງອອກສໍາລັບສິນຄ້າສົ່ງອອກຂອງສອງປະເທດ ແມ່ນສືບຕໍ່ໄດ້ຮັບການປະຕິບັດຢ່າງເປີດກວ້າງ.
ຫຼາຍຂົງເຂດຮ່ວມມືຢ່າງມີຈຸດສຸມ ຊຶ່ງສອງປະເທດ ຫວຽດນາມ - ລາວ ໃຫ້ຄວາມສໍາຄັນເຊັ່ນ: ການຮ່ວມມືຝຶກອົບຮົມສັບພະຍາກອນມະນຸດຂະແໜງຄົມມະນາຄົມ, ການຂົນສົ່ງ ແລະ ການກໍ່ສ້າງ, ຮ່ວມມືໃນຂົງເຂດອຸດສາຫະກໍາພະລັງງານ ແລະ ອື່ນໆ.
ການຮ່ວມມືດ້ານການສຶກສາ-ບໍາລຸງສ້າງ ແລະ ພັດທະນາສັບພະຍາກອນມະນຸດໃຫ້ແກ່ ສປປລາວ, ສອງຝ່າຍ ໄດ້ເອົາໃຈໃສ່ເປັນພິເສດ ໃນການຍົກສູງຄຸນນະພາບ, ປະສິດທິຜົນການຮ່ວມມືໃນຂົງເຂດການສຶກສາ - ບໍາລຸງສ້າງການພັດທະນາແຫຼ່ງສັບພະຍາກອນ.
ແຜນການຍົກສູງຄຸນນະພາບ ແລະ ປະສິດທິຜົນການຮ່ວມມື ຫວຽດນາມ - ລາວ ໃນຂົງເຂດການສຶກສາ ແລະ ພັດທະນາແຫຼ່ງສັບພະຍາກອນມະນຸດ ໃນໄລຍະປີ 2011-2020, ໄດ້ສ້າງການຫັນປ່ຽນຢ່າງຕັ້ງໜ້າສໍາລັບວຽກງານບໍາລຸງສ້າງແຫຼ່ງສັບພະຍາກອນມະນຸດໃຫ້ແກ່ລາວ, ຊຸກຍູ້ວຽກງານສິດສອນວິຊາຊີບ ໂດຍການສະໜອງບັນດາອຸປະກອນຮັບໃຊ້ໃຫ້ແກ່ວຽກງານສິດສອນວິຊາຊີບຂອງລາວ.
ໃນຮອບ 5 ປີຜ່ານມາ, (2016-2020) ຫວຽດນາມ ໄດ້ບໍາລຸງສ້າງບຸກຄະລາກອນໃຫ້ແກ່ລາວເກືອບ 20.000 ຄົນ. ປັດຈຸບັນ, ຈໍານວນນັກສຶກສາລາວ ທີ່ກໍາລັງສຶກສາຮໍ່າຮຽນຢູ່ ຫວຽດນາມ ແມ່ນ ປະມານ 16.664 ຄົນ ແລະ ນັກສຶກສາຫວຽດນາມ ທີ່ກໍາລັງຮຽນຢູ່ ລາວ ປະມານ 300 ຄົນ.
ການເຄື່ອນໄຫວພົວພັນການທູດປະຊາຊົນ ແມ່ນໄດ້ຮັບຄວາມເອົາໃຈໃສ່ເປັນປົກກະຕິ ຈາກການນໍາສອງປະເທດ, ຈັດກິດຈະກໍາການເຄື່ອນໄຫວແລກປ່ຽນວັດທະນະທໍາ, ສິລະປະ, ປະກອບສ່ວນເພີ່ມທະວີຄວາມຮັບຮູ້ເຂົ້າໃຈ ລະຫວ່າງ ປະຊາຊົນສອງຊາດ ນໍາເອົາການພົວພັນຮ່ວມມື ຫວຽດນາມ - ລາວ ນັບມື້ເຂົ້າສູ່ລວງເລິກ.
ປະຫວັດສາດ ແລະ ມູນເຊື້ອຂອງສອງປະເທດ ຫວຽດນາມ - ລາວ, ພວກເຮົາເຊື້ອໝັ້ນວ່າ: ການຢ້ຽມຢາມສັນຖະວະໄມຕີຢູ່ ລາວ ຂອງສະຫາຍ ຫງວຽນຊວັນຟຸກ ພ້ອມດ້ວຍຄະນະຂັ້ນສູງຄັ້ງນີ້ ຈະສືບຕໍ່ປະກອບສ່ວນປັບປຸງຢ່າງແໜ້ນແຟ້ນກວ່າເກົ່າ ຄວາມສາມັກຄີພິເສດ ລະຫວ່າງ ສອງຊາດ, ສ້າງບາດກ້າວແຫ່ງການສ້າງສາ, ພັດທະນາເສດຖະກິດ - ສັງຄົມ ກໍຄືຕໍ່ສູ້ເອົາຊະນະພະຍາດໂຄວິດ - 19 ໃຫ້ໝົດໄປ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20