ສະມາຄົມມິດຕະພາບ ລາວ - ຫວຽດນາມ ແລະ ຫວຽດນາມ - ລາວ ຂັ້ນສູນກາງ ພົບປະສອງຝ່າຍ

ເຜີຍ​ແຜ່​ໂດຍ​: moderator ເວ​ລາ: 03/12/2025 15:56:33 ຈຳ​ນວນ​​ຢ້ຽມ​ຊົມ 353 ຄັ້ງ ​

     ເພື່ອຕອບສະໜອງຕາມການເຊື້ອເຊີນຂອງ ທ່ານ ປະທານ ສະມາຄົມມິດຕະພາບ ລາວ - ຫວຽດນາມ ຂັ້ນສູນກາງ, ໃນວັນທີ 1 ທັນວາ 2025  ທີ່ສະພາແຫ່ງຊາດ ໄດ້ມີພິທີພົບປະແລກ ປ່ຽນບົດຮຽນ ລະຫວ່າງ ສະມາຄົມ​ມິດ​ຕະພາບ ລາວ - ຫວຽດນາມ ແລະ ຫວຽດນາມ - ລາວ ຂັ້ນສູນກາງ ເຊິ່ງຝ່າຍລາວ ນໍາໂດຍ ສະຫາຍ ບັນດິດ ສຈ. ບໍ່ວຽງຄໍາ ວົງດາລາ, ກໍາມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ປະທານສະມາຄົມມິດຕະພາບ ລາວ -ຫວຽດນາມ ຂັ້ນສູນກາງ;  ຝ່າຍຫວຽດນາມ ນໍາໂດຍ ສະຫາຍ ຫງວຽນ ດັກ ວິງ, ກຳມະການສູນກາງພັກ, ຄະນະປະຈຳສະພາແຫ່ງຊາດ, ປະທານກໍາມາທິການວັດທະນະທຳ-ສັງຄົມ, ສະພາແຫ່ງຊາດຫວຽດນາມ, ​ປະທານ​ສະມາຄົມ​ມິດຕະພາບ ຫວຽດນາມ - ລາວ ຂັ້ນ​ສູນ​ກາງ.

     ໃນໂອກາດນີ້, ສະຫາຍ ບັນດິດ ສຈ. ບໍ່ວຽງຄໍາ ວົງດາລາ ໄດ້ກ່າວສະແດງຄວາມຍິນດີຕ້ອນຮັບ ແລະ ຕີລາຄາ ສູງຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ຄະນະຜູ້ແທນສະມາຄົມ​ມິດຕະພາບ ຫວຽດນາມ - ລາວ ຂັ້ນ​ສູນ​ກາງ ໃນຄັ້ງນີ້ ເຊິ່ງເປັນ​ການ​ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ ​​ເສີມຂະຫຍາຍ ແລະ ເພີ່ມພູມຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລາວ - ຫວຽດນາມ ໃຫ້ນັບມື້ເຂົ້າສູ່ລວງເລິກເວົ້າລວມ, ເວົ້າ ສະເພາະ ກໍ່ແມ່ນການຮ່ວມມືແລກປ່ຽນຖອດຖອນບົດຮຽນ ເຊິ່ງກັນ ແລະ ກັນ ລະຫວ່າງສອງ ສະມາຄົມ​ມິດ​ຕະພາບ ລາວ - ຫວຽດນາມ ແລະ ຫວຽດນາມ - ລາວ ຂັ້ນສູນກາງ ໃຫ້​ມີຄວາມ​ແໜ້ນ​ແຟ້ນ​​ຂຶ້ນໄປເລື້ອຍໆ.

     ສະຫາຍ ສະຫາຍ ຫງວຽນ ດັກ ວິງ ໄດ້ສະແດງຄວາມຂອບໃຈເປັນຢ່າງຍິ່ງ ແລະ ຕີລາຄາສູງ ຕໍ່ການຕ້ອນຮັບ ອັນອົບອຸ່ນຂອງສະມາຄົມ​ມິດ​ຕະພາບ ລາວ - ຫວຽດນາມ ຂັ້ນສູນກາງໃນຄັ້ງນີ້.

    ການພົບປະໃນຄັ້ງນີ້, ທັງສອງຝ່າຍກໍ່ໄດ້ແຈ້ງສະພາບພົ້ນເດັ່ນ ແລະ ການເຄື່ອນໄຫວວຽກງານ ສະມາຄົມມິດຕະພາບຂອງຕົນໃຫ້ກັນຊາບ, ສະຫຼຸບຕີລາຄາການເຄື່ອນໄຫວໄລຍະຜ່ານມາ ແລະ ທິດ ທາງແຜນຮ່ວມມືໃນຕໍ່ໜ້າ. ການພົບປະຄັ້ງນີ້ ໄດ້ດໍາເນນີນໄປດ້ວຍບັນຍາກາດອັນດີ ແລະ ສະໜິດ ສະໜົມຮັກແພງຖານະອ້າຍນ້ອງ.

     ນອກຈາກຄະນະໄດ້ພົບປະ ແລະ ເຮັດວຽກຢູ່ນະຄອນຫຼວງວຽງຈັນແລ້ວ, ຄະນະໄດ້ເດິນທາງ ໄປຢ້ຽມຊົມສະຖານທີ່ທ່ອງທ່ຽວດ້ານວັດທະນະທໍາ ແລະ ທໍາມະຊາດໃນນະຄອນຫຼວງວຽງຈັນ ແລະ ແຂວງ ວຽງຈັນຕື່ມອີກ.

 

---