ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຕ້ອນຮັບການເຂົ້າ ຢ້ຽມຂໍ່ານັບຂອງ ເອກອັກຄະລັດຖະທູດ ສປປ ເກົາຫຼີ ປະຈໍາ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 30/12/2024 11:57:36 ຈຳ​ນວນ​​ຢ້ຽມ​ຊົມ 25 ຄັ້ງ ​

        ໃນ​​​ວັນ​ທີ 30 ທັນວາ 2024, ທີ່​​ ສໍານັກງານ ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ສະຫາຍ ບຸນເຫຼືອ ພັນດານຸວົງ, ຮັກສາການ ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ຂອງ ສະຫາຍ ລີ ຢົງ ຈົນ, ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ສປປ ເກົາຫຼີ ປະຈໍາ ສປປ ລາວ.

        ໃນໂອກາດດັ່ງກ່າວ, ສະຫາຍເອກອັກຄະລັດຖະທູດ ໄດ້ສະ​ແດງ​ຄວາມ​ຊົມ​ເຊີຍຕໍ່ ສະຫາຍ ບຸນເຫຼືອ ພັນດານຸວົງ ທີ່​ໄດ້​ຮັບ​ມອບ​ໝາຍ​ໜ້າ​ທີ່ອັນສໍາຄັນ​ໃຫ້ດໍາລົງຕໍາແໜ່ງເປັນ ຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ, ເຊື່ອໝັ້ນວ່າ ດ້ວຍປະ​ສົບ​ການ​ອັນ​ອຸ​ດົມ​ສົມບູນ​ຂອງສະຫາຍ ຈະສືບຕໍ່ຊຸກຍູ້ການປະສານສົມທົບ ລະຫວ່າງ ຄະນະພົວພັນຕ່າງປະເທດສູນກາງພັກ ແລະ ​ສະຖານທູດ ສປປ ເກົາຫຼີ ປະຈໍາ ສປປ ລາວ ເພື່ອປະ​ກອບ​ສ່ວນ​ເຂົ້າໃນ​ການເພີ່ມພູນຄູນສ້າງ ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ສປປ ລາວ-ສປປ ເກົາຫຼີ ໃຫ້ໄດ້ຮັບການເສີມຂະຫຍາຍ ແລະ ນັບມື້ແໜ້ນແຟ້ນຍິ່ງໆຂື້ນ.

           ສະຫາຍ ບຸນເຫຼືອ ພັນດານຸວົງ ​ໄດ້​ສະແດງຄວາມຂອບໃຈ ຕໍ່ການຊົມເຊີຍຂອງ ສະຫາຍ ເອກອັກຄະລັດຖະທູດ ສປປ ເກົາຫຼີ ແລະ ຕີ​ລາ​ຄາ​ສູງ ​ຕໍ່​ການ​ພົວ​ພັນມິດຕະພາບ ແລະ ການຮ່ວມມື ອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ລາວ-ສປປ ເກົາຫຼີ ໃນໄລຍະຜ່ານມາ ກໍ່ຄື ປະຈຸບັນ, ພ້ອມທັງຢືນຢັນຈະສືບຕໍ່ຮັກສາ ແລະ ເສີມຂະຫຍາຍມູນເຊື້ອດັ່ງກ່າວ ໃຫ້​ນັບ​ມື້ໄດ້ຮັບ​ການ​ຂະ​ຫຍາຍ​ຕົວ​ຍິ່ງໆ​ຂຶ້ນ ເພື່ອ​ນຳ​ເອົາ​ຜົນ​ປະ​ໂຫຍດ​ຕົວ​ຈິງ​ມາ​ສູ່​ປະ​ຊາ​ຊົນສອງ​ຊາດ ສປປ ລາວ-ສປປ ເກົາຫຼີ.

          ໃນໂອກາດນີ້, ສອງຝ່າຍ ໄດ້ແລກປ່ຽນຄໍາຄິດເຫັນກ່ຽວກັບ ສະພາບການພົ້ນເດັ່ນໃນພາກພື້ນ ແລະ ສາກົນ, ເອກະພາບກັນໃນການຕີລາຄາ ການພົວພັນຮ່ວມມື ລະຫວ່າງ ສອງພັກ, ສອງລັດ ໃນໄລຍະຜ່ານມາ ແລະ ປຶກສາຫາລືກ່ຽວກັບ ທິດທາງການພົວພັນ ໃນຕໍ່ໜ້າ.

---