ຄະນະພົວພັນຕ່າງປະເທດສູນກາງພັກ

ກອງປະຊຸມໃຫຍ່ສະມາຊິກຊາວໜຸ່ມຄະນະພົວພັນຕ່າງປະເທດສູນກາງພັກ ຄັ້ງທີ II

ເຜີຍແຜ່ໂດຍ: moderator ເວລາ: 17/12/2024 10:46:39 ຈຳນວນຢ້ຽມຊົມ 63 ຄັ້ງ

ວັນທີ 16 ທັນວາ 2024 ທີ່ສຳນັກງານຄະນະພົວພັນຕ່າງປະເທດສູນກາງພັກ ຄະນະຊາວໜຸ່ມຄະນະພົວພັນຕ່າງປະເທດສູນກາງພັັກ ໄດ້ເປີດກອງປະຊຸມໃຫຍ່ສະມາຊິກຊາວໜຸ່ມຄະນະພົວພັນຕ່າງປະເທດສູນກາງພັກ ຄັ້ງທີ II ພາຍໃຕ້ການເປັນປະທານຂອງ ສະຫາຍ ວົງຄຳ ແສນສະທິດ, ຮັກສາການເລຂາຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກ ແລະ ໃຫ້ກຽດເຂົ້າຮ່ວມຂອງ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ; ສະຫາຍ ທອງລີ ສີສຸລິດ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ. ພ້ອມນັ້ນ, ຍັງມີບັນດາສະຫາຍເລຂາໜ່ວຍພັກ, ບັນດາສະຫາຍຕາງໜ້າອົງການຈັດຕັ້ງມະຫາຊົນ, ຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມຄະນະພົວພັນຕ່າງປະເທດສູນກາງພັກ ແລະ ແຂກຖືກເຊີນຈາກອົງການຈັດຕັ້ງຊາວໜຸ່ມອ້ອມຂ້າງສູນກາງ ແລະ ກະຊວງການຕ່າງປະເທດເຂົ້າຮ່ວມ.

ສະຫາຍ ວົງຄຳ ແສນສະທິດ, ຮັກສາການເລຂາຄະນະບໍລິຫານງານຊາວໜຸ່ມ ຄະນະພົວພັນຕ່າງປະເທດສູນກາງພັກ ໄດ້ຂຶ້ນຜ່ານບົດລາຍງານການເມືອງສອງພາກ ໂດຍໄດ້ຕີລາຄາຮອບດ້ານຕໍ່ຜົນສໍາເລັດໃນການຊີ້ນໍາ-ນໍາພາ ຂອງຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກ ຕະຫຼອດໄລຍະ 4 ປີກວ່າຜ່ານມາ (2020-2024). ຜົນສໍາເລັດອັນພົ້ນເດັ່ນແມ່ນຄະນະຊາວໜຸ່ມຄະນະພົວພັນຕ່າງປະເທດສູນກາງພັກ ສາມາດຮັກສານາມມະຍົດຊາວໜຸ່ມ 4 ບຸກ ແລະ ໄດ້ຮັບທຸງໄຊນໍາໜ້າຂະບວນການແຂ່ງຂັນ 4 ບຸກ ຈາກສູນກາງຊາວໜຸ່ມປະຊາຊົນປະຕິວັດລາວ. ພ້ອມນັ້ນຍັງໄດ້ ຕີລາຄາຈຸດດີ, ຈຸດອ່ອນ ແລະ ຂໍ້ຄົງຄ້າງ, ບົດຮຽນທີ່ຖອດຖອນໄດ້ເພື່ອປັບປຸງແກ້ໄຂໃນຕໍ່ໜ້າ ເພື່ອເຮັດໃຫ້ການຊີ້ນໍາ-ນໍາພາ ການເຄື່ອນໄຫວ ໃນຕໍ່ໜ້າໃຫ້ມີທ່ວງທ່າທີ່ຕັ້ງໜ້າ ແລະ ມີຜົນສໍາເລັດຫຼາຍກວ່າເກົ່າ. ກອງປະຊຸມຍັງໄດ້ເປັນເອກະພາບໃນການວາງທິດທາງ, ຄາດໝາຍສູ້ຊົນ ໃນຊຸມປີຕໍ່ໜ້າ (2025-2029).

ພ້ອມນີ້, ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕ ປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກຊຸດໃໝ່ຈໍານວນ 9 ສະຫາຍ, ຍິງ 2 ສະຫາຍ. ກອງປະຊຸມຄັ້ງປະຖົມມະລຶກ ຄະນະຂອງຄະນະບໍລິຫານງານຊາວໜຸ່ມ ຄຕພ ໄດ້ເຫັນດີເປັນເອກະສັນເລືອກເອົາ ສະຫາຍ ວົງຄຳ ແສນສະທິດ, ເປັນເລຂາຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກ; ສະຫາຍ ອາເລັກວິໄລ ສຸກຈະເລີນ, ເປັນຮອງເລຂາ(ຜູ້ທີ 1), ທັງເປັນປະທານກວດກາ, ສະຫາຍ ນາງ ອ້ອຍ ໄຊຍະສິດ ເປັນຮອງເລຂາ (ຜູ້ທີ2)ແລະ ສະຫາຍ ອິດສິລິຍະພອນ ໄຊຍະວົງ, ເປັນຮອງປະທານກວດກາ.

ກອງປະຊຸມໃຫຍ່ໄດ້ຮັບຟັງການໂອ້ລົມຂອງ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ແລະ ສະຫາຍ ທອງລີ ສີສຸລິດ, ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເຊິ່ງໄດ້ຕີລາຄາສູງ ແລະ ຊົມເຊີຍບັນດາຜົນສຳເລັດ, ຜົນງານຂອງຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກທີ່ຍາດມາໄດ້ ໃນໄລຍະຜ່ານມາ ແລະ ໃຫ້ທິດຊີ້ນຳໃນການເຄື່ອນໄຫວວຽກງານຂອງຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກ ໃນຊຸມປີຕໍ່ໜ້າ ເພື່ອເປັນເຂັມຊີ້ທິດເຍືອງທາງ ແລະ ເປັນບ່ອນອີງສຳຄັນໃຫ້ແກ່ຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກຊຸດໃໝ່ນຳໄປຄົ້ນຄວ້າ ແລະ ຜັນຂະຫຍາຍ ເຂົ້າໃນການນຳພາ-ຊີ້ນຳວຽກງານຊາວໜຸ່ມ ຂອງຄະນະພົວພັນຕ່າງປະເທດສູນກາງພັກ ໃນຕໍ່ໜ້າໃຫ້ມີຜົນສຳເລັດຫຼາຍກວ່າເກົ່າ.