ທູດຈີນ ແລະ ທູດອົດສະຕາລີ ເຂົ້າຊົມເຊີຍ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໃນໂອກາດຮັບໜ້າທີ່ໃໝ່

ເຜີຍ​ແຜ່​ໂດຍ​: moderator ເວ​ລາ: 27/11/2024 16:36:22 ຈຳ​ນວນ​​ຢ້ຽມ​ຊົມ 131 ຄັ້ງ ​

     ໃນຕອນບ່າຍວັນທີ 25 ພະຈິກ 2024, ທີ່ສໍານັກງານ ຄະນະພົວພັນຕ່າງປະເທດສູນກາງພັກ, ສະຫາຍ ນາງ ຟາງຫົງ, ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປ ຈີນ ປະຈຳ ສປປ ລາວ ໄດ້ເຂົ້າຊົມເຊີຍ ສະຫາຍ ບຸນເຫຼືອ ພັນດານຸວົງ ໃນໂອກາດທີ່ໄດ້ຮັບການແຕ່ງຕັ້ງເປັນ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ແລະ ໄດ້ນໍາເອົາຄວາມຊົມເຊີຍຈາກ ສະຫາຍ ຫຼິວ ຈ້ຽນຊາວ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ມາຍັງ ສະຫາຍ ບຸນເຫຼືອ ພັນດານຸວົງ, ເຊິ່ງເປັນການສະແດງໃຫ້ເຫັນເຖິງຄວາມໄວ້ເນື້ອເຊື່ອໃຈຈາກ ສູນກາງພັກ ປປ ລາວ ຕໍ່ການປະກອບສ່ວນຂອງສະຫາຍ ແລະ ຢືນຢັນວ່າ ສະຖານທູດ ແລະ ຄະນະພົວພັນຕ່າງປະເທດສູນກາງພັກກອມມູນິດຈີນ ຈະສືບຕໍ່ປະສານສົມທົບ ແລະ ຮ່ວມກັບມືກັບ ຄະນະພົວພັນຕ່າງປະເທດສູນກາງພັກ ປປ ລາວ ໃນການຊຸກຍູ້ເສີມຂະຫຍາຍການຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຈີນ-ລາວ.

      ສະຫາຍ ບຸນເຫຼືອ ພັນດານຸວົງ ໄດ້ສະແດງຄວາມຂອບໃຈ ຕໍ່ການຊົມເຊີຍຂອງຝ່າຍຈີນ, ໄດ້ຕີລາຄາສູງ ຕໍ່ການຮ່ວມມືປະສານສົມທົບ ແລະ ຮ່ວມມືກັນ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ຄະນະພົວພັນຕ່າງປະເທດສູນກາງພັກກອມມູນິດຈີນ ກໍ່ຄື ສະຖານທູດຈີນ ໃນໄລຍະຜ່ານມາ; ໄດ້ແລກປ່ຽນຄໍາຄິດເຫັນກັບ ສະຫາຍທູດຈີນ ກ່ຽວກັບ ທິດທາງການຮ່ວມມື ສອງພັກ, ສອງ ຄະນະພົວພັນຕ່າງປະເທດສູນກາງພັກ ລາວ-ຈີນ ໃນຕໍ່ໜ້າ, ພ້ອມທັງຢືນຢັນຈະສືບຕໍ່ຮັກສາມູນເຊື້ອດັ່ງກ່າວ ເພື່ອຮ່ວມກັນປະກອບສ່ວນ ແລະ ຊຸກຍູ້ການຈັດຕັ້ງປະຕິບັດ ຄໍາເຫັນສໍາຄັນທີ່ເຫັນດີເປັນເອກະພາບກັນ ລະຫວ່າງ ການນໍາສູງສຸດ ສອງພັກ, ສອງລັດ ລາວ-ຈີນ, ຈີນ-ລາວ; ຕິດຕາມຊຸກຍູ້ ຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີມາດຖະຖານສູງ, ຄຸນນະພາບສູງ ແລະ ລະດັບສູງກວ່າເກົ່າ ກໍ່ຄື ປະກອບສ່ວນເຂົ້າໃນການເສີມຂະຫຍາຍ​ສາຍ​ພົວພັນມິດຕະພາບອັນເປັນມູນເຊື້ອ​ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ນັບມື້ນັບ​ແໜ້ນ​ແຟ້ນ ແລະ ມີປະສິດທິຜົນຍິ່ງໆ​ຂຶ້ນ.

       ໃນວັນດຽວກັນ, ທ່ານ ນາງ MEGAN JONES, ເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ ກໍ່ໄດ້ເຂົ້າຊົມເຊີຍ ສະຫາຍ ບຸນເຫຼືອ ພັນດານຸວົງ ແລະ ຮ່ວມກັນປຶກສາຫາລື ກ່ຽວກັບ ທິດທາງ ການພົວພັນຮ່ວມມືສອງຝ່າຍ ໃນຕໍ່ໜ້າ ເພື່ອ​ເສີມ​ຂະ​ຫຍາຍ​ສາຍ​ພົວ​ພັນມິດຕະພາບ​ ແລະ ການຮ່ວມ ມື ລະຫວ່າງ ສປປ ລາວ ແລະ ອົດສະຕຣາລີ ​ໃຫ້​ນັບ​ມື້​ນັບແໜ້ນແຟ້ນ ແລະ ​ມີໝາກຜົນ​ຍິ່ງໆ​ຂຶ້ນ.

---