ຄະນະພົວພັນຕ່າງປະເທດສູນກາງພັກ

ຮອງຫົວໜ້າ ຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມພົບປະ ຂອງ ທ່ານ Tino Chrupalla, ຫົວໜ້າພັກທາງເລືອກເພື່ອເຢຍລະມັນ, ສະມາຊິກລັດຖະສະພາເຢຍລະມັນ

ເຜີຍແຜ່ໂດຍ: moderator ເວລາ: 21/11/2024 10:57:40 ຈຳນວນຢ້ຽມຊົມ 135 ຄັ້ງ

ໃນຕອນເຊົ້າຂອງ ວັນທີ 20 ພະຈິກ 2024, ທີ່ ສຳນັກງານຄະນະພົວພັນຕ່າງປະເທດສູນກາງພັກ, ທ່ານ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມພົບປະຂອງ ທ່ານ Tino Chrupalla, ຫົວໜ້າພັກທາງເລືອກເພື່ອເຢຍລະມັນ (Alternative for Germany), ສະມາຊິກລັດຖະສະພາເຢຍລະມັນ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 19 ຫາ 22 ພະຈິກ 2024.

ໃນໂອກາດດັ່ງກ່າວ, ທ່ານ ວາລະໄຊ ເລັ່ງສະຫວັດ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍການມາຢ້ຽມຢາມ ສປປ ລາວ ຂອງ ທ່ານ Tino Chrupalla, ພ້ອມທັງຕີລາຄາສູງຕໍ່ ສາຍພົວພັນອັນດີລະຫວ່າງ ສປປ ລາວ ແລະ ເຢຍລະມັນ ຕະຫຼອດໄລຍະ 66 ປີ ຜ່ານມາ, ເຊິ່ງໄດ້ປະກອບສ່ວນສໍາຄັນເຂົ້າໃນການສ້າງສາພັດທະນາຂອງສອງປະເທດ; ສະແດງຄວາມຂອບໃຈລັດຖະບານ ແລະ ປະຊາຊົນເຢຍລະມັນ ທີ່ໄດ້ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ ໃນດ້ານຕ່າງໆເຊັ່ນ: ການພັດທະນາເສດຖະກິດແບບຍືນຍົງ, ການກໍ່ສ້າງພື້ນຖານໂຄງລ່າງ, ອາຊີວະສຶກສາ, ການພັັດທະນາຊົນນະບົດ ແລະ ອື່ນໆ; ເຊື່ອໝັ້ນວ່າ ການມາຢ້ຽມຢາມ ສປປ ລາວ ຄັ້ງນີ້ ຈະເປັນຂີດໝາຍໃນການສົ່ງເສີມການຮ່ວມມືສອງຝ່າຍ ໃຫ້ມີຜົນສໍາເລັດອັນໃໝ່ໃຫຍ່ຫຼວງກວ່າເກົ່າ ແລະ ຫວັງວ່າ ເຢຍລະມັນ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ໃນການພັດທະນາປະເທດ ເພື່ອບັນລຸເປົ້າໝາຍການພັດທະນາແບບຍືນຍົງ ແລະ ນໍາເອົາປະເທດອອກຈາກສະຖານະພາບປະເທດດ້ອຍພັດທະນາໃນຕໍ່ໜ້າ.

ທ່ານ Tino Chrupalla ໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານ ວາລະໄຊ ເລັ່ງສະຫວັດ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ຊົມເຊີຍຕໍ່ຜົນສຳເລັດໃນການເປັນເຈົ້າພາບກອງປະຊຸມສຸດຍອດອາຊຽນ ແລະ ກອງປະຊຸມສຸດຍອດທີ່ກ່ຽວຂ້ອງ ຄັ້ງທີ 44 ແລະ 45 ແລະ ການສ້າງສາພັດທະນາປະເທດຂອງ ສປປ ລາວ. ພ້ອມນັ້ນ, ທ່ານ ໄດ້ຢືນຢັນວ່າ ຈະສືບຕໍ່ຊຸກຍູ້ໃຫ້ການຊ່ວຍເຫຼືອ ສປປ ລາວ ທາງດ້ານການສຶກສາ ແລະ ຮ່ວມມືທາງດ້ານເສດຖະກິດ ແລະ ພະລັງງານ ເພື່ອເສີມຂະຫຍາຍການພົວພັນ ລະຫວ່າງ ສປປ ລາວ ແລະ ເຢຍລະມັນ ເພື່ອຜົນປະໂຫຍດລວມຂອງສອງປະເທດ ກໍ່ຄື ເພື່ອພາລະກິດ ສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ຢູ່ໃນພາກພື້ນ ແລະ ໃນໂລກ. ນອກນັ້ນ, ສອງຝ່າຍ ຍັງໄດ້ແລກປ່ຽນທັດສະນະ ກ່ຽວກັບ ສະພາບການ ໃນພາກພື້ນ ແລະ ສາກົນ ທີ່ສອງຝ່າຍໃຫ້ຄວາມສົນໃຈ.

ໃນຕອນທ້າຍ, ທ່ານ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ແກ່ ທ່ານ Tino Chrupalla ຈົ່ງປະສົບຜົນສຳເລັດໃນການເຄື່ອນໄຫວຢ້ຽມຢາມ ສປປ ລາວ ໃນຄັ້ງນີ້ ແລະ ເດີນທາງກັບຄືນປະເທດດ້ວຍຄວາມສະຫວັດດີພາບ.