ຫົວໜ້າຄະນະພົວພັນຕ່າງປະເທດສູນກາງພັກ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ມົງໂກລີ

ເຜີຍ​ແຜ່​ໂດຍ​: moderator ເວ​ລາ: 18/11/2024 12:05:32 ຈຳ​ນວນ​​ຢ້ຽມ​ຊົມ 146 ຄັ້ງ ​

    ເພື່ອເປັນການຈັດຕັ້ງຜັນຂະຫຍາຍ ບົດບັນທຶກຄວາມເຂົ້າໃຈ ວ່າດ້ວຍ ການສົ່ງເສີມການຮ່ວມມື ລະຫວ່າງພັກປະຊາຊົນປະຕິວັດລາວ ແລະ ພັກປະຊາຊົນມົງໂກລີ, ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ພ້ອມຄະນະ ໄດ້ເຄື່ອນໄຫວຢ້ຽມ ຢາມ ແລະ ເຮັດວຽກ ຢູ່ ປະເທດມົງໂກລີ ໃນ ວັນທີ 13-16 ພະຈິກ 2024 ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ລະຫວ່າງ ສອງພັກ, ສອງປະເທດ ສປປ ລາວ ກັບ ມົງໂກລີ.

       ໃນການຢ້ຽມຢາມຄັ້ງນີ້, ທ່ານ ທອງສະຫວັນ ພົມວິຫານ ໄດ້ເຂົ້າຢ້ຽມຂໍ່ານັບ, ພົບປະ ແລະ ເຮັດວຽກກັບການນຳຂັ້ນສູງຂອງພັກປະຊາຊົນມົງໂກລີ ຫຼາຍພາກສ່ວນ ເປັນຕົ້ນແມ່ນ ເຂົ້າຢ້ຽມຂ່ຳນັບ ພະນະທ່ານ ລົບຊັງນໍາສະແລ ອໍໂຢງ-ເອຣ໌ຕິນ, ປະທານ ພັກປະຊາຊົນມົງໂກລີ, ນາຍົກລັດຖະມົນຕີ ແຫ່ງ ມົງໂກລີ ແລະ ພົບປະສອງຝ່າຍກັບ ທ່ານ ຊອດບາທາຣ ຍັງກົກ, ເລຂາທິການໃຫຍ່ ພັກປະຊາຊົນມົງໂກລີ, ທ່ານ ເຄ ນຽມບາທາຣ໌, ເຈົ້າຄອງນະຄອນຫຼວງ ອູລານບາຕໍ, ປະທານຄະນະພັກປະຊາຊົນມົງໂກລີ ຂອງ ນະຄອນຫຼວງອູລານບາຕໍ; ພົບປະກັບ ທ່ານ ນາງ ເຈ. ອຸນດຣຸາມ, ສະມາຊິກສະພາຄູຣານໃຫຍ່ ແຫ່ງ ມົງໂກລີ, ຮອງປະທານຄະນະມິດຕະພາບ ລັດຖະສະພາ ມົງໂກລີ-ລາວ ປະຈຳ ສະພາຄູຣານໃຫຍ່ ແຫ່ງ ມົງໂກລີ.

       ໃນການພົບປະ, ສອງຝ່າຍ ໄດ້ຕີລາສູງຕໍ່ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ມົງໂກລີ ຕະຫຼອດໄລຍະຜ່ານມາ ນັບແຕ່ການສ້າງຕັ້ງສາຍພົວພັນທາງການທູດ ໃນປີ 1962, ເຊິ່ງໄດ້ປະກອບສ່ວນສໍາຄັນເຂົ້າໃນການປົກປັກຮັກສາ ແລະ ສ້າງສາພັດທະນາຂອງສອງປະເທດ; ໄດ້ແລກປ່ຽນສະພາບພາຍໃນພັກ, ພາຍໃນປະເທດ ໃຫ້ກັນຊາບ, ໂດຍສະເພາະ ສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດ; ເຫັນດີເປັນເອກະພາບກັນໃນການສືບຕໍ່ເສີມຂະຫຍາຍສາຍພົວພັນດ້ານພັກ ແລະ ການທູດປະຊາຊົນ ເພື່ອຊຸກຍູ້ການພົວພັນຮ່ວມມື ລະຫວ່າງ ສອງປະເທດ, ສົ່ງເສີມຄວາມເຂົ້າໃຈ ລະຫວ່າງ ປະຊາຊົນສອງຊາດ, ຊຸກຍູ້ການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການສຶກສາ, ການທ່ອງທ່ຽວ, ພ້ອມກັນຊອກຫາທ່າແຮງບົ່ມຊ້ອນຕ່າງໆໃຫ້ຫຼາຍຂຶ້ນ ເພື່ອນໍາເອົາຜົນປະໂຫຍດຕົວຈິງ ມາສູ່ ປະຊາຊົນສອງຊາດ ລາວ-ມົງໂກລີ. ໃນໂອກາດດັ່ງກ່າວ, ຝ່າຍລາວ ໄດ້ສະແດງຄວາມຂອບໃຈຢ່າງຈິງໃຈ ມາຍັງ ພັກ, ລັດ ແລະ ປະຊາຊົນມົງໂກລີ ທີ່ໄດ້ໃຫ້​ການ​ສະ​ໜັບ​ສະ​ໜູນ ແລະ ການ​ຊ່ວຍ​ເຫຼືອ​ໃຫ້ແກ່​ ພັກ, ລັດ​ຖະ​ບານ ແລະ ປະ​ຊາ​ຊົນລາວ ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດຂອງລາວ ໃນ​ໄລ​ຍ​ະ​​ຜ່ານ​ມາ ກໍ່ຄື ປະຈຸບັນ.

      ໃນການພົບປະຄັ້ງນີ້, ສອງພັກ ຍັງໄດ້ຮ່ວມກັນ ລົງນາມບົດບັນທຶກຄວາມເຂົ້າໃຈ ວ່າດ້ວຍ ການສົ່ງເສີມການຮ່ວມມື ລະຫວ່າງ ພັກປະຊາຊົນປະຕິວັດລາວ ແລະ ພັກປະຊາຊົນມົງໂກລີ ສະບັບໃໝ່ ປ່ຽນແທນສະບັບເກົ່າ ທີ່ສອງພັກໄດ້ລົງນາມຮ່ວມກັນ ໃນຜ່ານມາ ເພື່ອຊຸກຍູ້ເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງພັກ ໃຫ້ມີບາດກ້າວຂະຫຍາຍຕົວໃໝ່, ຊຸກຍູ້ການພົວພັນຮ່ວມມື ສອງປະເທດ, ປະກອບສ່ວນເຂົ້າໃນການເສີມສ້າງສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

     ໃນໂອກາດຢ້ຽມຢາມຄັ້ງນີ້, ທີ່ສະຖານເອກອັກຄະລັດຖະທູດແຫ່ງ ສປປ ລາວ ປະຈໍາ ມົງໂກລີ, ຄະນະຜູ້ແທນລາວ ຍັງໄດ້ພົບປະໂອ້ລົມກັບ ພະນັກງານສະຖານທູດ ແລະ ນັກສຶກສາລາວ ທີ່ມົງໂກລີ ດ້ວຍບັນຍາກາດອັນສະໜິດສະໜົມ ແລະ ຮັກແພງ, ພ້ອມທັງເນັ້ນໜັກໃຫ້ ສະຖານທູດ ສືບຕໍ່ເປັນຂົວເຊື່ອມຕໍ່ທີ່ດີ, ປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອ  ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ມົງໂກລີ ໃຫ້ນັບມື້ໄດ້ຮັບການພັດທະນາ ຢ່າງບໍ່ຢຸດຢັ້ງ.

        ການຢ້ຽມຢາມມົງໂກລີ ຂອງ ຫົວໜ້າຄະນະພົວພັນຕ່າງປະເທດສູນກາງພັກ ໃນຄັ້ງນີ້ ໄດ້ປະສົບຜົນສໍາເລັດຕາມຄາດໝາຍ, ເຊິ່ງຖືເປັນບາດກ້າວສໍາຄັນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີ່ດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ມົງໂກລີ ໃນໄລຍະໃໝ່. ນອກນັ້ນ, ຄະນະ ຍັງໄດ້ທັດສະນະສຶກສາ ແລະ ຢ້ຽມຊົມສະຖານທີ່ທ່ອງທ່ຽວທາງປະຫວັດສາດ, ວັດທະນະທໍາ ຈໍານວນໜຶ່ງ ທີ່ນະຄອນຫຼວງອູລານບາຕໍ. ໃນໂອກາດຢ້ຽມຢາມດັ່ງກ່າວ, ທ່ານ ຫົງແກ້ວ ສຸກສະຫວັດ, ເອກອັກຄະລັດຖະທູດວິສາມັນຜູ້ມອໍານາດເຕັມ ແຫ່ງ ສປປ ລາວ ປະຈຳ ມົງໂກລີ ກໍໄດ້ເຄື່ອນໄຫວນຳຄະນະ ຢ່າງມີຜົນສຳເລັດ.

---