ຄະນະພົວພັນຕ່າງປະເທດສູນກາງພັກ

ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບຂອງ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ

ເຜີຍແຜ່ໂດຍ: moderator ເວລາ: 28/10/2024 15:13:08 ຈຳນວນຢ້ຽມຊົມ 159 ຄັ້ງ

ສະຫາຍ ບຸນທອງ ຈິດມະນີ, ກໍາມະການກົມການເມືອງ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຫງວຽນ ມິງ ເຕິມ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ໃນໂອ ກາດມາຮັບໜ້າທີ່ໃໝ່ ໃນວັນທີ 25 ຕຸລາ 2024 ທີ່ສໍານັກງານຫ້ອງວ່າການສູນກາງພັກ.

ໃນການພົບປະ, ສະຫາຍ ບຸນທອງ ຈິດມະນີ ໄດ້ສະແດງຄວາມຍິນດີ ແລະ ຊົມເຊີຍຕໍ່ ສະຫາຍ ຫງວຽນ ມິງ ເຕິມ ທີ່ໄດ້ຮັບການແຕ່ງຕັ້ງໃຫ້ມາດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາ ສປປ ລາວ ເຊິ່ງເປັນການສະແດງເຖິງ ຄວາມໄວ້ເນື້ອເຊື່ອໃຈສູງຂອງພັກ, ລັດ ແລະ ປະຊາຊົນຫວຽດນາມ ຕໍ່ຜົນງານການປະກອບສ່ວນຢ່າງຕັ້ງໜ້າຂອງ ສະຫາຍເອກອັກຄະລັດຖະທູດ ເຂົ້າໃນການເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນໄລຍະຜ່ານມາ, ພ້ອມທັງໄດ້ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫຼວງ, ຮອບດ້ານທີ່ ພັກ, ລັດ ແລະ ປະຊາຊົນຫວຽດນາມ ຍາດມາໄດ້ໃນຕະຫຼອດໄລຍະແຫ່ງການດໍາເນີນພາລະກິດປ່ຽນແປງໃໝ່, ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ວຽກງານປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ເສດຖະກິດມີການຂະຫຍາຍຕົວດ້ວຍຈັງຫວະສູງ ແລະ ຕໍ່ເນື່ອງ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນ, ການພົວພັນຮ່ວມມື ແລະ ເຊື່ອມໂຍງສາກົນ ສືບໄດ້ຮັບການເປີດກວ້າງ, ບົດບາດອິດທິພົນຂອງ ພັກ ແລະ ລັດ ຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ; ເຊື່ອໝັ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງ ພັກກອມມູນິດຫວຽດ ນາມ, ປະຊາຊົນຫວຽດນາມ ຈະສືບຕໍ່ຍາດໄດ້ຜົນສໍາເລັດໃໝ່ ໃຫຍ່ຫຼວງກວ່າເກົ່າ ໃນການປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກ ໄລຍະທ້າຍສະໄໜ ແລະ ກະກຽມກອງປະຊຸມໃຫຍ່ ສະໄໜທີ XIV ໃນຕໍ່ໜ້າ ໄດ້ຢ່າງມີໄຊ ແລະ ສ້າງສາປະເທດຊາດເປັນປະເທດເປັນອຸດສາຫະກໍາຕາມທິດທັນສະໄໝ ແລະ ບັນລຸເປົ້າໝາຍ ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທໍາ, ສີວິໄລ; ພ້ອມນັ້ນ, ຍັງໄດ້ເນັ້ນວ່າ ຝ່າຍລາວ ຍິນດີຈະໃຫ້ຄວາມຮ່ວມມື, ປະສານສົມທົບຢ່າງແໜ້ນແຟ້ນ ແລະ ອໍານວຍຄວາມສະດວກໃຫ້ແກ່ ສະຫາຍທູດ ກໍ່ຄື ສະຖານທູດ ໃນການປະຕິບັດໜ້າທີ່ການທູດຢູ່ ສປປ ລາວ ແລະ ເຊື່ອໝັ້ນວ່າ ດ້ວຍບົດຮຽນ ແລະ ປະສົບການອັນດົມສົມບູນ, ສະຫາຍທູດ ຈະສາມາດປະຕິບັດໜ້າທີ່ການທູດ ຢູ່ ສປປ ລາວ ໄດ້ຮັບຜົນສຳເລັດຢ່າງຈົບງາມ, ສືບຕໍ່ປະຕິບັດໜ້າທີ່ການເປັນຂົວເຊື່ອມມິດຕະພາບ ແລະ ເປັນເສນາທິການໃຫ້ແກ່ ສອງພັກ, ສອງປະເທດ ໃນການເພີ່ມພູນຄູນສ້າງສາຍພົວພັນພິເສດ ລາວ-ຫວຽດນາມ.

ສະຫາຍ ຫງວຽນ ມິງ ເຕີມ ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ, ສະແດງຄວາມປິຕິຍິນດີ ແລະ ເປັນກຽດຢ່າງສູງ ທີ່ໄດ້ຮັບການແຕ່ງຕັ້ງມາເປັນ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສສ ຫວຽດນາມ ປະຈໍາ ສປປ ລາວ; ສະແດງຄວາມຂອບໃຈ ຕໍ່ຄໍາເຫັນຊີ້ນໍາ ແລະ ເປັນເອກະພາບຕໍ່ການຕີລາຄາຂອງ ສະຫາຍຜູ້ປະຈໍາການຄະນະເລຂາທິການສູນກາງພັກ, ພ້ອມທັງຢືນຢັນວ່າ ຈະເຮັດສຸດຄວາມສາມາດຂອງຕົນ ໃນການເປັນເສນາທິການ, ປະສານສົມທົບຢ່າງແໜ້ນແຟ້ນກັບ ບັນດາກະຊວງ, ອົງການ, ຂະແໜງການຂອງລາວ ໃນການເພີ່ມພູມຄູນສ້າງສາຍພົວພັນ ຫວຽດນາມ-ລາວໃຫ້ສືບຕໍ່ໄດ້ຮັບການຂະຫຍາຍ ຕົວເຂົ້າສູ່ລວງເລິກ, ມີປະສິດທິຜົນກວ່າເກົ່າ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ນັບມື້ນັບຫຼາຍຂຶ້ນ.

ສອງຝ່າຍ ຍັງໄດ້ແຈ້ງໃຫ້ກັນຊາບ ສະພາບພົ້ນເດັ່ນຂອງແຕ່ລະພັກ, ແຕ່ລະປະເທດ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍ ສືບຕໍ່ໄດ້ຮັບການເພີ່ມທະວີຢ່າງບໍ່ຢຸດຢັ້ງ ແລະ ກ້າວສູ່ລວງເລິກໃນທຸກຂົງ ເຂດວຽກງານ; ການນໍາຂັ້ນສູງຂອງ ສອງພັກ, ສອງລັດ ແລະ ຂັ້ນຕ່າງໆ ນັບແຕ່ສູນກາງຈົນເຖິງທ້ອງຖິ່ນ ໄດ້ມີການແລກປ່ຽນການຢ້ຽມຢາມເຊິ່ງກັນແລະກັນ, ແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ, ວຽກງານກໍ່ສ້າງພັກ, ສ້າງລະບົບການເມືອງໃຫ້ເຂັ້ມແຂງ; ສໍາເລັດການຈັດຊຸດຄົ້ນຄວ້າ ແລະ ແລກປ່ຽນຫົວຂໍ້ສະເພາະ ສໍາລັບພະນັກງານ ພັກ, ລັດ ລາວ ຂັ້ນຕ່າງໆຫຼາຍຊຸດ; ແລກປ່ຽນບົດຮຽນ ແລະ ຊ່ວຍເຫຼືອດ້ານວິຊາການ - ຊ່ຽວຊານ ໃນການແກ້ໄຂບັນຫາເສດຖະກິດ-ການເງິນ ກໍ່ຄື ການພັດທະນາເສດຖະກິດ - ສັງຄົມ ແລະ ການເຊື່ອມໂຍງສາກົນ; ຢືນຢັນວ່າ ຈະສືບຕໍ່ຕິດຕາມຊຸກຍູ້ ການຈັດຕັ້ງຜັນຂະຫຍາຍ ບົດບັນທຶກລະຫວ່າງການນໍາຂັ້ນສູງຂອງ ສອງພັກ, ສອງລັດ, ບັນດາຖະແຫຼງການຮ່ວມສອງຝ່າຍ ກໍ່ຄື ການຈັດຕັ້ງປະຕິບັດບັນດາໂຄງການຮ່ວມມືລົງທຶນ ແລະ ຊ່ວຍເຫຼືອ ທີ່ສອງຝ່າຍໄດ້ເປັນເອກະພາບກັນ ໃຫ້ມີປະສິດທິຜົນສູງ, ປະກອບສ່ວນເຂົ້າໃນການປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ແລະ ຫວຽດນາມ - ລາວ ໃຫ້ນັບມື້ນັບ ແຕກອອກອອກຜົນ, ຂຽວສົດງົດງາມ ແລະ ໝັ້ນຄົງຂະໜົງແກ່ນຊົ່ວກາລະນານ.