ຄະນະຜູ້ແທນພັກກອມມູນິດຈີນ ມາຢ້ຽມຢາມ ແລະ ປາຖະກະຖາ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 25/10/2024 11:23:07 ຈຳ​ນວນ​​ຢ້ຽມ​ຊົມ 152 ຄັ້ງ ​

     ໃນລະຫວ່າງ​ວັ​ນ​ທີ 22-24 ຕຸລາ 2024, ຄະນະຜູ້ແທນພັກກອມມູນິດຈີນ ນໍາໂດຍ ສະ​ຫາຍ ຊູ ຊິງຊານ, ກຳມະການສູນກາງພັກ, ປະທານສະພາຄົ້ນຄວ້າປະຫວັດສາດ ແລະ ເອກະສານພັກ ຂອງ ສູນກາງພັກກອມມູນິດຈີນ ​ໄດ້​ເດີນ​ທາງ​ມາ​ຢ້ຽມ​ຢາມ ແລະ ​ເຮັດ​ວຽກຢູ່ ສ​ປ​ປ ລາວ ຕາມແຜນການຮ່ວມມື ລະຫວ່າງ ສອງພັກ ລາວ-ຈີນ ປະຈຳປີ 2024 ເພື່ອຊຸກຍູ້ເສີມຂະຫຍາຍການພົວພັນຮ່ວມມືຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ສືບຕໍ່ກ້າວສູ່ລວງເລິກ ແລະ ເຜີຍແຜ່ ຜົນສໍາເລັດກອງປະຊຸມຄົບຄະນະ ເທື່ອທີ 3 ສະໄໝທີ XX ຂອງພັກກອມມູນິິດຈີນ ທີ່ໄດ້ດໍາເນີນໃນເດືອນກໍລະກົດ 2024 ຜ່ານມາ.

     ໃນໄລຍະຢ້ຽມຢາມຄັ້ງນີ້, ຄະນະໄດ້ເຂົ້າຢ້ຽມຂໍ່ານັບ ສະຫາຍ ປອ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໃນວັນທີ 23 ຕຸລາ 2024, ເຊິ່ງການພົບປະດັ່ງກ່າວ ສະຫາຍ ບຸນທອງ ຈິດມະນີ ໄດ້ສະແດງຄວາມຊົມເຊີຍ ຕໍ່ການມາເຄື່ອນໄຫວຢ້ຽມຢາມ ແລະ ປາຖະກະຖາ ຢູ່ ສປປ ລາວ ຂອງຄະນະໃນຄັ້ງນີ້ ແລະ ຕີລາຄາສູງຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ໂດຍສະເພາະແມ່ນ ການຈັດຕັ້ງປະຕິບັດ ບັນດາແຜນການຮ່ວມມື ລະຫວ່າງ ສອງພັກ ປະຈໍາປີ 2024 ແລະ ແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ; ຍິນດີສືບຕໍ່ຮ່ວມກັບຝ່າຍຈີນ ຈັດຕັ້ງຜັນຂະຫຍາຍຄວາມຮັບຮູ້ທີ່ເປັນເອກະພາບ ລະຫວ່າງ ການນຳສູງສຸດຂອງສອງພັກ, ສອງລັດ ລາວ-ຈີນ ກ່ຽວກັບ ການສືບຕໍ່ຮັກສາການໄປມາຫາສູ່ກັນຢ່າງເປັນປົກກະຕິ, ການແລກປ່ຽນບົດຮຽນໃນການຄຸ້ມຄອງພັກ-ບໍລິຫານປະເທດ, ການກໍ່ສ້າງພັກ-ພະນັກງານ ແລະ ການຊຸກຍູ້ເພີ່ມທະວີແລກປ່ຽນດ້ານວັດທະນະທຳ-ສັງຄົມ ແລະ ການໄປມາຫາສູ່ກັນລະຫວ່າງປະຊາຊົນສອງຊາດ ລາວ-ຈີນ; ຊົມເຊີຍ ຕໍ່ຜົນສຳເລັດການພົບປະເຮັດວຽກກັບພາກສ່ວນກ່ຽວຂ້ອງ ຂອງພັກ ປປ ລາວ ແລະ ການປາຖະກະຖາ ຂອງ ສະຫາຍ ຊູ ຊິງຊານ, ເຊິ່ງມີເນື້ອໃນອຸດົມສົມບູນ ແລະ ເປັນບົດຮຽນອັນສຳຄັນ ຕໍ່ ບັນດາການນຳຂອງສູນກາງພັກ-ລັດລາວ.

      ສະຫາຍ ຊູ ຊິງຊານ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນຂອງຝ່າຍລາວ ແລະ ເຫັນດີເປັນເອກະພາບຕໍ່ການຕີລາຄາການພົວພັນຮ່ວມມື ລະຫວ່າງ ສອງພັກ, ສອງປະເທດ ລາວ-ຈີນ ໃນໄລຍະຜ່ານມາ ແລະ ປະຈຸບັນ; ສະແດງຄວາມປິຕິຊົມຊື່ນ ແລະ ພາກພູມໃຈ ທີ່ເຫັນວ່າ ການພົວພັນຮ່ວມມືສອງຝ່າຍ ກໍຄື ການຈັດຕັ້ງປະຕິບັດຂໍ້ຕົກລົງຮ່ວມ ຂອງການນຳສູງສຸດ ຂອງ ສອງພັກ, ສອງລັດ ລາວ-ຈີນ ໃນຜ່ານມາ ແມ່ນໄດ້ຮັບການຈັດຕັ້ງປະຕິບັດຢ່າງມີໝາກມີຜົນຕົວຈິງ, ພ້ອມທັງໄດ້ລາຍງານແຜນການເຄື່ອນໄຫວຂອງຕົນໃນໄລຍະການຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້.

ໃນໂອກາດການຢ້ຽມຢາມດັ່ງກ່າວ, ຄະນະຍັງໄດ້ພົບປະເຮັດວຽກກັບ ສະຫາຍ ປອ ຄໍາພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ປປ ລາວ ເພື່ອລົງເລິກການພົວພັນຮ່ວມມືດ້ານວຽກງານໂຄສະນາ-ແນວຄິດ, ການຄົ້ນຄວ້າທິດສະດີ ແລະ ເອກະສານພັກ ລະຫວ່າງ ສອງພັກ ລາວ-ຈີນ ໃນຕໍ່ໜ້າ.

      ໃນຕອນເຊົ້າຂອງວັນທີ 23 ຕຸລາ 2024, ສະຫາຍ ຊູ ຊິງຊານ ໄດ້ປາຖະກະຖາ ຜົນສໍາເລັດຂອງກອງປະຊຸມຄົບຄະນະເທື່ອທີ 3 ສະໄໝທີ XX ຂອງພັກກອມມູນິດຈີນ ທີ່ຫ້ອງປະຊຸມໃຫຍ່ ຂອງ ຫ້ອງວ່າການສູນກາງພັກ, ໂດຍມີ ສະຫາຍ ສຈ.ປອ. ກິແກ້ວ ໄຂຄໍາພິທູນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ; ສະຫາຍການນໍາຂັ້ນເລຂາທິການສູນກາງພັກ, ກຳມະການສູນກາງພັກ, ຄະນະພັກ-ຄະນະນໍາ ຂອງກະຊວງ-ອົງການຈັດຕັ້ງພັກ, ສະຖາບັນຄົ້ນຄວ້າຂອງລາວ ຈຳນວນ 400 ກວ່າສະຫາຍ ເຂົ້າຮ່ວມຮັບຟັງ, ເຊິ່ງ ສະຫາຍ ສູ ຊິງຊານ ໄດ້ຍົກໃຫ້ເຫັນບັນດາມາດຕະການຕ່າງໆ ຂອງ “ຂໍ້ຕົກລົງຂອງສູນກາງພັກກອມມູນິດຈີນ ກ່ຽວກັບ ການລົງເລິກການປະຕິຮູບຢ່າງຮອບດ້ານ ແລະ ການຊຸກຍູ້ຄວາມທັນສະໄໝແບບຈີນ” ທີ່ຖືກຮັບຮອງເອົາໃນກອງປະຊຸມຄົບຄະນະດັ່ງກ່າວ.

---