ຄ​ຕ​ພ ສະຫຼຸບວຽກງານການເຄື່ອນໄຫວຕ່າງປະເທດ ຂອງບັນດາອົງການຈັດຕັ້ງຂອງພັກ ແລະ ມະຫາຊົນຂັ້ນສູນກາງ ປະຈຳ 6 ເດືອນຕົ້ນປີ 2021

ເຜີຍ​ແຜ່​ໂດຍ​: admin ເວ​ລາ: 11/03/2022 10:39:23 ຈຳ​ນວນ​​ຢ້ຽມ​ຊົມ 743 ຄັ້ງ ​

ຄະນະພົວພັນຕ່າງປະເທດສູນກາງພັກ (ຄ​ຕ​ພ)  ໄດ້ຈັດກອງປະຊຸມສະຫຼຸບຖອດຖອນບົດຮຽນການເຄື່ອນ ໄຫວວຽກງານຕ່າງປະເທດຂອງບັນດາອົງການຈັດ​ຕັ້ງພັກຂັ້ນສູນກາງ, ສູນ​ກາງ​ແນວ​ລາວ​ສ້າງ​ຊາດ, ສະຫະພັນນັກຮົບເກົ່າແຫ່ງຊາດລາວ, ​ບັນ​ດາອົງການຈັດຕັ້ງມະຫາຊົນຂັ້ນສູນກາງ, ບັນດາສະມາຄົມມິດຕະພາບ ແລະ ຄະນະສັນຕິພາບ ແລະ ສາມັກຄີຂອງລາວກັບຕ່າງປະເທດ ປະຈຳ 6 ເດືອນຕົ້ນປີ 2021 ແລະ ວາງທິດທາງແຜນການໃນທ້າຍປີ 2021 ​ຂຶ້ນ​ໃນ​ວັນ​ທີ 29 ກໍ​ລະ​ກົດ 2021 ທີ່ ຄ​ຕ​ພ ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກ ມີຕາງໜ້າບັນດາຄະນະນໍາ, ຄະນະກົມ ແລະ ພະນັກງານທີ່ກ່ຽວຂ້ອງຈາກອົງການຈັດຕັ້ງຕ່າງໆເຂົ້າຮ່ວມ.

ໃນກອງປະຊຸມ ສະຫາຍ ສົມດີ ບຸນຄຸ້ມ ກຳມະການຄະນະພັກ ຮອງຫົວໜ້າຄະນະພົວພັນຕ່າງປະເທດ ສູນກາງພັກ ໄດ້ຂຶ້ນຜ່ານບົດສະຫຼຸບສັງລວມກ່ຽວກັບການເຄື່ອນໄຫວວຽກງານການຕ່າງປະເທດຂອງພັກ ແລະ ການທູດປະຊາຊົນ ໃນໄລຍະ 6 ເດືອນຕົ້ນປີ 2021, ທ່າມກາງສະພາບການຢູ່ພາກພື້ນ ແລະ ສາກົນ ຍັງສືບຕໍ່ມີການປ່ຽນແປງຢ່າງໄວວາ ແລະ ສັບສົນ ຊຶ່ງເປັນໄລຍະທົ່ວໂລກກຳລັງປະເຊີນກັບການແຜ່ລະບາດຂອງເຊື້ອພະຍາດໂຄວິດ-19 ຂະຫຍາຍເປັນວົງກວ້າງ ແລະ ບາງປະເທດເກີດຂຶ້ນເປັນຮອບທີສອງລວມທັງ ສປປ ລາວ;  ສະຫາຍຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ສະຫຼຸບຕີລາຄາດ້ານດີ, ຍົກໃຫ້ເຫັນດ້ານຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ແລະ ສະເໜີທິດທາງແຜນການເຄື່ອນໄຫວຕ່າງປະເທດຂອງ ບັນດາອົງການຈັດຕັ້ງດັ່ງກ່າວ. ຫຼັງຈາກນັ້ນ, ບັນດາຜູ້ແທນເຂົ້າຮ່ວມກອງປະຊຸມໄດ້ແລກປ່ຽນຄວາມຄິດເຫັນຢ່າງ​ກົງ​ໄປ​ກົງ​ມາກ່ຽວກັບການຈັດຕັ້ງປະຕິບັດການເຄື່ອນໄຫວ ວຽກງານການຕ່າງປະເທດຂອງພັກ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ບັນດາອົງການຈັດຕັ້ງມະຫາຊົນຂັ້ນສູນກາງ, ບັນດາສະມາຄົມມິດຕະພາບຂອງລາວກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ ໂດຍເນັ້ນເຖິງຄວ​າມສໍາຄັນ ແລະ ຈໍາເປັນໃນການເພີ່ມທະວີການເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວວຽກງານຕ່າງປະເທດ ຕາມມະຕິກອງປະຊຸມໃຫຍ່ ສະໄໝ XI ຂອງພັກວາງອອກ; ປຶກສາຫາລືກ່ຽວກັບການຈັດຕັ້ງປະຕິບັດແຜນງົບປະມານທີ່ມີຈຳກັດການເຄື່ອນໄຫວວຽກງານຕ່າງປະເທດໃຫ້ມີປະສິດທິຜົນ ດ້ວຍຮູບການຈັດກອງປະຊຸມຜ່ານລະບົບວິດີໂອທາງໄກຕາມຄວາມເໝາະສົມ ທັງເປັນການປະຢັດງົບປະມານແຕ່ຍັງໄດ້ຮັກສາການສືບຕໍ່ເຄື່ອນໄຫວຕ່າງປະເທດຂອງພັກ ກໍຄືການທູດປະຊາຊົນ ຜ່ານຫຼາຍຮູບແບບ.

ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານ, ຜົນສໍາເລັດຂອງການເຄື່ອນໄຫວການຕ່າງປະເທດຂອງພັກ ແລະ ການທູດປະຊາຊົນ ທີ່ຍາດມາໄດ້ໃນໄລຍະຜ່ານມາກໍຄືທິດທາງແຜນການເຄື່ອນໄຫວຕ່າງປະເທດໃນຕໍ່ໜ້າ, ໂດຍເນັ້ນເຖິງຄວາມຈໍາເປັນໃນການເປີດກວ້າງການພົວພັນກັບຕ່າງປະເທດ, ຍາດແຍ່ງຂົນຂວາຍການຮ່ວມມື, ການສະໜັບສະໜູນ ແລະ ຊ່ວຍເຫຼືອ ສປປ ລາວ. ພ້ອມທັງເປັນການໂຄສະນາແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງ ສະເໝີຕົ້ນສະເໝີປາຍ ໂດຍສະເພາະແມ່ນຜັນຂະຫຍາຍເນື້ອໃນມະຕິຂອງ ກອງປະຊຸມໃຫຍ່ສະໄໝ XI ຂອງ ພັກ ເພື່ອປະກອບສ່ວນເຂົ້າໃນການສ້າງສະພາບແວດລ້ອມສາກົນທີ່ອໍານວຍແກ່ການປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ຍົກສູງຖານະບົດບາດຂອງພັກ, ລັດເຮົາໃນເວທີພາກພື້ນ ແລະ ສາກົນ.

ຂ່າວ: ຄ​ຕ​ພ-ຮູບ: ສຳ​ນານ

---