ຄະນະພົວພັນຕ່າງປະເທດສູນກາງພັກ

ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບ ການເຂົ້າຢ້ຽມຂໍ່ານັບ ຂອງ ຄະນະຜູ້ແທນຄະນະຕິດຕໍ່ປະສານງານທົ່ວປະເທດອະດີດທະຫານອາສາສະໝັກ-ຊ່ຽວຊານ ຫວຽດນາມ ຊ່ວຍເຫຼືອການປະຕິວັດລາວ

ເຜີຍແຜ່ໂດຍ: moderator ເວລາ: 25/09/2024 13:55:21 ຈຳນວນຢ້ຽມຊົມ 203 ຄັ້ງ

ວັນທີ 23 ກັນຍາ 2024, ທີ່ສໍານັກງານຄະນະພົວພັນຕ່າງປະເທດສູນກາງພັກ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງ ສະຫາຍ ພົ.ວ ຮວິ່ງ ດັກ ເຮືອງ, ຫົວໜ້າຄະນະຕິດຕໍ່ປະສານງານທົ່ວປະເທດອະດີດທະຫານອາສາສະໝັກ-ຊ່ຽວຊານ ຫວຽດນາມ ຊ່ວຍເຫຼືອການປະຕິວັດລາວ ພ້ອມດ້ວຍຄະນະ ມາຢ້ຽມຢາມ ແລະ ເຮັດວຽກ ຢູ່ ສປປ ລາວ, ການຢ້ຽມຢາມໃນຄັ້ງນີ້ ແມ່ນມີຄວາມໝາຍສຳຄັນຫຼາຍ, ເຊິ່ງໄດ້ຈັດຂຶ້ນທ່າມກາງບັນຍາກາດການສະເຫຼີມສະຫຼອງວັນສ້າງຕັ້ງ ຄະນະຕິດຕໍ່ປະສານງານທົ່ວປະເທດ ອະດີດທະຫານອາສາໝັກ ແລະ ຊ່ຽວຊານການທະຫານຫວຽດນາມ ຊ່ວຍເຫຼືອລາວ ຄົບຮອບ 75 ປີ ( 30 ຕຸລາ 1949-30 ຕຸລາ 2024 ), ພາຍຫຼັງການຢ້ຽມຢາມລັດຖະກິດ ແລະ ກອງປະຊຸມ ສອງກົມການເມືອງ ລາວ - ຫວຽດນາມ ປີ 2025 ນຳໂດຍ ສະຫາຍ ທອງລຸນ ສີສຸລິດ, ເລຂາທິການໃຫຍ່ ພັກປະຊາຊົນປະຕິວັດລາວ, ປະທານປະເທດ ແລະ ສະຫາຍ ໂຕເລິມ, ເລຂາທິການໃຫຍ່ ພັກກອມມູນິດຫວຽດນາມ, ປະທານປະເທດຫວຽດນາມ.

ສະຫາຍ ທອງສະຫວັນ ພົມວິຫານ ໄດ້ຕີລາຄາສູງ ແລະ ຍິນດີຕ້ອນຮັບຢ່າງອົບອຸ່ນຕໍ່ການມາຢ້ຽມຢາມ ແລະ ເຮັດວຽກ ຂອງ ຄະນະຜູ້ແທນດັ່ງກ່າວ ມາຢ້ຽມຢາມ ສປປ ລາວ ດິນແດນທີ່ເຄີຍອາໃສຄຽງບາ່ຄຽງໄຫຼ່ກັບທະຫານ ແລະ ປະຊາຊົນລາວ ຕໍ່ສູ້ກັບຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່ໃນອະດີດ ແລະ ຂໍຝາກຄໍາຢື້ຢາມຖາມຂ່າວ, ຄວາມສາມັັກຄີຮັກແພງ ແລະ ຄວາມຄິດຮອດຄິດເຖິງຜ່ານບັນດາ ລຸງ, ປ້າ, ອາວ, ອາ ໄປຍັງອະດີດອາສາສະໝັກ ແລະ ຊ່ຽວຊານ ຫວຽດນາມ ກໍ່ຄືຄະນະປະ ສານງານທັງໝົດ, ສະແດງຄວາມຂອບໃຈ ແລະ ຮູ້ບຸນຄຸນຕໍ່ການປະກອບສວນຂອງຄະນະດັ່ງກ່າວໃນພາລະກິດຕໍ່ສູ້ກູ້ຊາດໃນໄລຍະຜ່ານມາ, ເຊື່ອໝັ້ນວ່າການຢ້ຽມຢາມໃນຄັ້ງນີ້ ຈະເປັນການຢໍ້າຄືນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໜຶ່ງບໍ່ມີສອງ, ທັງເປັນການສຶກສາອົບຮົມມູນເຊື້ອແຫ່ງຄວາມສາມັກຄີຮ່ວມສຳພັນສູ້ຮົບລະຫວ່າງສອງຊາດລາວ-ຫວຽດນາມ ໃຫ້ຄົນຮຸ່ນໜຸ່ມໄດ້ຮຽນຮູ້ ແລະ ເຂົ້າໃຈຢ່າງເລິກເຊິ່ງ.

ສະຫາຍ ພົ.ວ ຮວິ່ງ ດັກ ເຮືອງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ, ແຈ້ງຈຸດປະສົງຂອງການຢ້ຽມຢາມ, ທັງໄດ້ແຈ້ງໃຫ້ຊາບຜົນສໍາເລັດການເຄື່ອນໄຫວໃນໄລຍະຜ່ານມາ ແລະ ບາງແຜນການຈຸດສຸມ ຂອງ ຄະນະໃນຕໍ່ໜ້າ. ການຢຽມຢາມຄັ້ງນີ້ເປັນການສະເຫຼີມສະຫຼອງຄົບຮອບ 75 ປີ ແຫ່ງການສ້າງຕັ້ງ ຄະນະປະສານງານທົ່ວປະເທດອະດີດທະຫານອາສາສະໝັກ ແລະ ຊ່ຽວຊານການທະຫານຊ່ວຍເຫຼືອການປະຕິວັດລາວ, ພ້ອມທັງຮຽກຮ້ອງໃຫ້ຄົນຮຸ່ນໜຸ່ມຂອງສອງຊາດສືບຕໍ່ຖະໜຸຖະໜອມ ແລະ ຮັກສາມູນເຊື້ອສາຍພົວພັນລາວ - ຫວຽດນາມ ໃຫ້ໝັ້ນຄົງຂະໜົງແກ່ນ.

ການຢ້ຽມຢາມໃນຄັ້ງນີ້ ທັງສອງຝ່າຍຕ່າງກໍ່ໄດ້ຢືນຢັນຄືນ, ພ້ອມຈະສືບຕໍ່ເສີມຂະຫຍາຍ, ປົກປັກຮັກສາ ແລະ ເພີ່ມພູນຄູນສ້າງສາຍພົວພັນພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ - ຫວຽດນາມ ໃຫ້ຈະເລີນງອກງາມ ນຳເອົາຜົນປະໂຫຍດຕົວຈິງ ຢ່າງຫຼວງຫຼາຍມາສູ່ປະຊາຊົນສອງຊາດ, ຊຸກຍູ້ການພົວພັນຮ່ວມມື ດ້ານເສດຖະກິດ - ການຄ້າ ແລະ ການລົງທຶນ, ການສຶກສາ ແລະ ອື່ນໆ.