ຄະນະພົວພັນຕ່າງປະເທດສູນກາງພັກ

ກອງປະຊຸມໃຫຍ່ ຄັ້ງທີ II ຂອງກຳມະບານຮາກຖານ ກົມການທູດປະຊາຊົນ, ຄະນະພົວພັນຕ່າງປະເທດສູນກາງພັກ

ເຜີຍແຜ່ໂດຍ: moderator ເວລາ: 24/09/2024 16:15:20 ຈຳນວນຢ້ຽມຊົມ 205 ຄັ້ງ

ເພື່ອເປັນການກະກຽມໃຫ້ແກ່ການດຳເນີນ ກອງປະຊຸມໃຫຍ່ ຄັ້ງທີ II ຂອງຄະນະບໍລິຫານງານສະຫະພັນກຳມະ ບານ ຄະນະພົວພັນຕ່າງປະເທດສູນກາງພັກ (ຄຕພ), ໃນຕອນເຊົ້າຂອງວັນທີ 16 ກັນຍາ 2024, ໜ່ວຍກຳມະບານຮາກຖານ ກົມການທູດປະຊາຊົນ ໄດ້ດຳເນີນກອງປະຊຸມໃຫຍ່ສະມາຊິກກຳມະບານ ຄັ້ງທີ II ຂຶ້ນ ທີ່ສຳນັກງານ ຄຕພ, ພາຍໃຕ້ການເປັນປະທານ ສະຫາຍ ປອ. ໄຊພອນ ຈື່ດັ່ງຢ່າງ, ປະທານໜ່ວຍກຳມະບານຮາກຖານ ກົມການທູດປະຊາຊົນ ແລະ ໃຫ້ກຽດເຂົ້າຮ່ວມ ຂອງ ສະຫາຍ ບຸນຍາເດດ ໄຊຍະວົງ, ກໍາມະການຄະນະພັກ, ຕາງໜ້າຄະນະບໍລິຫານງານສະຫະພັນກຳມະບານ ຄຕພ, ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ, ສະຫາຍ ບຸນຍອງ ບຸດທະວົງ, ເລຂາໜ່ວຍພັກ, ຫົວໜ້າກົມການທູດປະຊາຊົນ. ພ້ອມນັ້ນ ຍັງມີຕາງໜ້າບັນດາໜ່ວຍກຳມະບານຮາກຖານຈາກຫ້ອງການ ແລະ ບັນດາກົມ ພາຍໃນ ຄຕພ, ຕາງໜ້າໜ່ວຍຊາວໜຸ່ມ, ແມ່ຍິງ ແລະ ສະມາຊິກກຳມະບານ ກົມການທູດປະຊາຊົນ ກໍເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຝັງ ບົດລາຍງານການເມືອງ ແລະ ບົດສໍາຫຼວດການນໍາພາ ຂອງ ຄະນະໜ່ວຍກຳມະບານຮາກຖານ ກົມການທູດປະຊາຊົນ ສະໄໝທີ I, ເຊິ່ງໄດ້ຕີລາຄາຜົນສຳເລັດ, ຈຸດດີ-ຈຸດຄົງຄ້າງ, ຂໍ້ສະດວກ-ຂໍ້ຫຍຸ້ງຍາກ ໃນການນໍາພາ-ຊີ້ນໍາວຽກງານກຳມະບານ ຂອງກົມການທູດປະຊາຊົນ ໃນໄລຍະ 05 ປີຜ່ານມາ ແລະ ທິດທາງຈຸດສຸມໃນໄລຍະ 05 ປີຕໍ່ໜ້າ. ໄລຍະຜ່ານມາໜ່ວຍກຳມະບານຮາກຖານກົມການທູດປະຊາຊົນ ແມ່ນຕິດພັນຢ່າງສະໜິດແໜ້ນກັບຜົນງານຂອງໜ່ວຍພັກຂອງກົມການທູດປະຊາຊົນ, ຖືເປັນກໍາລັງຫຼັກຂອງກົມການທູດປະຊາຊົນ ໃນການເປັນເສນາທິການໃຫ້ຄະນະພັກ-ຄະ ນະນຳ ຄຕພ ແລະ ຄະນະບໍລິຫານງານສະຫະພັນກຳມະບານ ໃນການຄົ້ນຄວ້າ, ຕິດຕາມສະພາບການພາກພື້ນ ແລະ ສາກົນ, ເປັນເສນາທິການ ແລະ ອໍານວຍຄວາມດ້ານວຽກງານຕ່າງປະເທດຮອບດ້ານໃຫ້ແກ່ສູນກາງແນວລາວສ້າງຊາດ, ອົງການ ຈັດຕັ້ງມະຫາຊົນຂັ້ນສູນກາງ (ສູນກາງຊາວໜຸ່ມ, ສູນກາງສະຫະພັນກໍາມະບານລາວ ແລະ ສູນກາງສະຫະພັນແມ່ຍິງລາວ), ສະຫະພັນນັກຮົບເກົ່າແຫ່ງຊາດ, ສະມາຄົມມິດຕະພາບລາວກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ.

ກອງປະຊຸມໃຫຍ່ສະມາຊິກໜ່ວຍກຳມະບານຮາກຖານ ການທູດປະຊາຊົນ ຄັ້ງທີ II ໄດ້ດໍາເນີນປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ເຊິ່ງປະກອບມີ 03 ສະຫາຍຄື: ສະຫາຍ ພູສີ ແກ້ວສູນໄຊ, ເປັນປະທານກຳມະບານຮາກຖານ; ສະຫາຍ ຄຳມີ ຈັນທະວົງ, ເປັນຮອງປະທານກຳມະບານຮາກຖານ, ທັງເປັນປະທານກວດກາ ແລະ ສະຫາຍ ນ. ມະນີລັດ ສາຍປະລິນຍາ, ເປັນກໍາມະການ ກຳມະບານຮາກຖານ.

ໃນກອງປະຊຸມ, ສະຫາຍ ບຸນຍາເດດ ໄຊຍະວົງ, ກໍາມະການຄະນະພັກ, ຕາງໜ້າຄະນະບໍລິຫານງານສະຫະພັນກຳມະບານ ຄຕພ, ຫົວໜ້າຫ້ອງການ ຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດໂອ້ລົມຕໍ່ກອງປະຊຸມ, ໂດຍໄດ້ຊົມເຊີຍຜົນງານທີ່ຄະນະໜ່ວຍ ແລະ ສະມາຊິກກຳມະບານ ກົມການທູດປະຊາຊົນ ທີ່ຍາດມາໄດ້ໃນສະໄໝຜ່ານມາ, ຮຽກຮ້ອງໃຫ້ຄະນະໜ່ວຍຊຸດໃໝ່ ສືບຕໍ່ນຳພາສະມາຊິກເສີມຂະຫຍາຍມູນເຊື້ອ, ຜົນສໍາເລັດດັ່ງກ່າວ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃຫ້ດີຂຶ້ນເທື່ອລະກ້າວ; ເນັ້ນໜັກໃຫ້ສືບຕໍ່ຍົກສູງດ້ານການເມືອງ-ແນວຄິດ ໃຫ້ໜັກແໜ້ນ ຕາມຄາດໝາຍທີ່ວາງໄວ້.