ຄະນະພົວພັນຕ່າງປະເທດສູນກາງພັກ (ຄຕພ) ປາຖະກະຖາ ວັນຢຶດອຳນາດ 23 ສິງຫາ; ວັນເຊັນສົນທິສັນຍາມິດຕະພາບ-ການຮ່ວມມືລາວ-ຫວຽດນາມ ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ.

ເຜີຍ​ແຜ່​ໂດຍ​: moderator ເວ​ລາ: 17/09/2024 09:51:32 ຈຳ​ນວນ​​ຢ້ຽມ​ຊົມ 174 ຄັ້ງ ​

     ໃນຕອນບ່າຍຂອງວັນທີ 16 ກັນຍາ 2024, ຄະນະພົວພັນຕ່າງປະເທດສູນກາງພັກໄດ້ຈັດພິທີປະຖະກະຖາ ເອກະສານສຳຄັນຄື: ວັນຢຶດອຳນາດ 23 ສິງຫາ 1945 ແລະ 23 ສິງຫາ 1975; ວັນເຊັນສົນທິສັນຍາມິດຕະພາບ-ການຮ່ວມມືລາວ-ຫວຽດນາມຄົບຮອບ 47 ປີ (18/07/1977-18/07/2024) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 62 ປີ (05/09/1962-05/09/2024).ໃຫ້ກຽດປາຖະກະຖາໂດຍ ສະຫາຍ ບຸນຍາເດດ ໄຊຍະວົງ, ກຳມະການຄະນະພັກ, ຫົວໜ້າຫ້ອງການ ຄຕພ ແລະ ສະຫາຍ ປອ.ສະເຫຼີມໄຊ ທະທົງສັກ, ກຳມະການຄະນະພັກ, ຫົວໜ້າກົມ ອາຊີ-ປາຊີຟິກ ແລະ ອາຟຣິກາ. ເຂົ້າຮ່ວມໃນຄັ້ງນີ້ມີບັນດາສະຫາຍຄະນະພັກ, ຄະນະກົມ, ຄະນະພະແນກ ແລະ ພະນັກງານວິຊາການຂອງ ຄະນະພົວພັນຕ່າງປະເທດສູນກາງພັກ ລວມທັງໝົດຈຳນວນ 79 ສະຫາຍ, ຍິງ 29 ສະຫາຍ.

     ໃນພິທີ ສະຫາຍ ບຸນຍາເດດ ໄຊຍະວົງ, ກຳມະການຄະນະພັກ, ຫົວໜ້າຫ້ອງການ ຄຕພ ໄດ້ຍົກໃຫ້ເຫັນເຖິງ ປະຫວັດຄວາມເປັນມາ ແລະ ຄວາມໝາຍຄວາມສຳຄັນຂອງວັນຍຶດອໍານາດ 23 ສິງຫາ ເພື່ອໃຫ້ສະມາຊິກພັກ, ພະນັກງານຂອງຄະນະພົວພັນຕ່າງປະເທດສູນກາງພັກ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບວັນຢຶດອຳນາດ 23 ສິງຫາ ແມ່ນວັນທີ່ມີຄວາມໝາຍສຳຄັນຫຼາຍສຳລັບ ປະຊາຊົນລາວທັງຊາດ. ໄຊຊະນະດັ່ງກ່າວແມ່ນໝາກຜົນແຫ່ງການຕໍ່ສູ້ປະຕິວັດອັນຢືດເຍື້ອຍາວນານ ຂອງປະຊາຊົນລາວບັນດາເຜົ່າ ພາຍໃຕ້ການນຳພາຂອງ ພັກປະຊາຊົນ ປະຕິວັດລາວ ເຊິ່ງເກີດຈາກຄວາມກ້າຫານປະດິດສ້າງແຫ່ງການນຳໃຊ້ 03 ບາດຄ້ອນຍຸດທະສາດເພື່ອຢຶດອຳນາດການປົກຄອງໃນທົ່ວປະເທດແບບ   “ ບົວບໍ່ຊໍ້າ ນໍ້າບໍ່ຂຸ່ນ” ແລະ ແມ່ນການນໍາພາອັນສະຫຼາດສ່ອງໃສຂອງພັກທີ່ຮູ້ໝູນໃຊ້ລັດທິມາກ-ເລນິນ ເຂົ້າໃນພຶດຕິກໍາຕົວຈິງຂອງການປະຕິວັດຢ່າງປະດິດສ້າງ, ມີຄວາມສາມັກຄີເປັນຈິດໜຶ່ງໃຈດຽວກັນຂອງປວງຊົນທັງຊາດ, ກອງກໍາລັງຂອງກອງທັບ ແລະ ປະຊາຊົນລາວບັນດາເຜົ່າ ແລະ ທັງເປັນໄຊຊະນະຂອງຄວາມສາມັກຄີຮ່ວມສຳພັນສູ້ຮົບລະຫວ່າງ ປະຊາຊົນ 03 ຊາດ ອິນດູຈີນ: ລາວ, ຫວຽດນາມ ແລະ ກຳປູເຈຍ ທີ່ໄດ້ຄຽງບ່າຄຽງໄຫລ່ກັນຕ້ານສັດຕູໂຕດຽວກັນ.

     ພ້ອມນີ້ ສະຫາຍ ປອ. ສະເຫຼີມໄຊ ທະທົງສັກ, ກຳມະການຄະນະພັກ, ຫົວໜ້າກົມ ອາຊີ-ປາຊີຟິກ ແລະ ອາຟຣິກກາ ຍັງໄດ້ຍົກໃຫ້ເຫັນເຖິງສາຍພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດ ທີ່ມີມາແຕ່ດົນນານ, ການກໍາເນີດ ແລະ ການຂະຫຍາຍຕົວຂອງພັກກອມມູນິດອິນດູຈີນ, ກໍ່ຄືປະຊາຊົນສອງປະເທດ ລາວ-ຫວຽດນາມ ອ້າຍນ້ອງ ຕະຫຼອດໄລຍະເວລາກວ່າເຄິ່ງສະຕະວັດ ແຫ່ງການຮ່ວມສໍາພັນສູ້ຮົບຢ່າງມີໄຊ ແລະ ເຮັດໃຫ້ຄວາມຜູກພັນດ້ວຍໄມຕີຈິດອັນດູດດື່ມ ແລະ ຄວາມຮັກແພງເຊື່ອໝັ້ນຖານອ້າຍນ້ອງກາຍມາເປັນຄວາມສາມັກຄີແບບພິເສດຫາຍາກຈົນກາຍເປັນມໍລະດົກລວມອັນລໍ້າຄ່າ ແລະ ໄດ້ສ້າງສາຍພົວພັນການທູດນໍາກັນໃນວັນ 05/09/1962 ແລະ ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງສອງປະເທດ, ເປັນໜຶ່ງໃນປັດໄຈຕັດສິນໄຊຊະນະ ອັນພົ້ນເດັ່ນ ແລະ ແມ່ນໄຊຊະນະໃນລະດູບານໃໝ່ ປີ 1975 ຊຶ່ງໄດ້ເຮັດໃຫ້ພາລະກິດທ້ອນໂຮມປະເທດຫວຽດນາມເປັນອັນໜຶ່ງອັນດຽວໄດ້ບັນລຸຜົນສຳເລັດ, ສ່ວນຢູ່ປະເທດລາວການປະຕິວັດຊາດ ປະຊາທິປະໄຕ ໄດ້ສິ້ນສຸດລົງໂດຍການສົມທົບແໜ້ນສາມບາດຄ້ອນຍຸດທະສາດ ກ້າວເຂົ້າຢຶດອຳນາດມາສູ່ກໍາມືຂອງປະຊາຊົນໃນທົ່ວປະເທດ ແລະ ສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975.

---