ກຳມະບານຮາກຖານກົມຄົ້ນຄວ້າ ແລະ ພົວພັນຫຼາຍຝາຍ ຈັດກອງປະຊຸມໃຫຍ່ຄັ້ງທີ II

ເຜີຍ​ແຜ່​ໂດຍ​: moderator ເວ​ລາ: 12/09/2024 14:30:21 ຈຳ​ນວນ​​ຢ້ຽມ​ຊົມ 195 ຄັ້ງ ​

       ເພື່ອເປັນການກະກຽມ ໃຫ້ແກ່ກອງປະຊຸມໃຫຍ່ ຄັ້ງທີ II ຂອງສະຫະພັນກຳມະບານ ຄະນະພົວພັນຕ່າງປະເທດສູນກາງພັກ(ຄຕພ), ໃນຕອນເຊົ້າຂອງວັນທີ 10 ກັນຍາ 2024, ກຳມະບານຮາກຖານ ກົມຄົ້ນຄວ້າ ແລະ ພົວພັນຫຼາຍຝ່າຍ(ຄຄພ) ໄດ້ດໍາເນີນກອງປະຊຸມໃຫຍ່ ຄັ້ງທີ II ຂອງຕົນຂຶ້ນ ທີ່ ສໍານັກງານ ຄະນະພົວພັນຕ່າງປະເທດສູນກາງພັກ ພາຍໃຕ້ການເປັນຄະນະປະທານຂອງ ສະຫາຍ ວັງຮື ເນັງມົງວ່າງ, ຮັກສາການເລຂາໜ່ວຍພັກກົມ ຄຄພ, ສະຫາຍ ສິງຫານະຄອນ ສີຫາລາດ, ຮອງປະທານຄະນະບໍລິຫານງານສະຫະພັນກຳມະບານ ຄຕພ, ແລະ ມີຕາງໜ້າກຳມະບານຮາກຖານພາຍໃນ ຄຕພ ແລະ ສະມາຊິກກຳມະບານຮາກຖານ ກົມ ຄຄພ ເຂົ້າຮ່ວມຢ່າງພ້ອມພຽງ.

     ກອງປະຊຸມໄດ້ຜ່ານບົດລາຍງານການເມືອງ, ແຜນການເຄື່ອນໄຫວໃນຕໍ່ໜ້າ ແລະ ຜ່ານບົດສຳຫຼວດການນໍາພາຂອງ ຄະນະກຳມະບານຮາກຖານຊຸດເກົ່າ ເຊິ່ງໄດ້ຕີລາຄາຜົນສຳເລັດ, ລວມທັງຈຸດດີ, ຈຸດອ່ອນ, ຂໍ້ສະດວກ, ຂໍ້ຫຍຸ້ງຍາກ ໃນການນຳພາ-ຊີ້ນຳວຽກງານກຳມະບານຂອງກົມ ຄຄພ ໃນໄລຍະ 5 ປີຜ່ານມາ; ສາມາດຍາດໄດ້ຜົນສຳເລັດຫຼາຍດ້ານເປັນຕົ້ນແມ່ນ ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 05 ເປັນເຈົ້າ ຕະຫຼອດໄລຍະ 2 ປີເຄິ່ງຜ່ານມາ ເຊິ່ງຜົນງານເຫຼົ່ານີ້ ໄດ້ປະກອບສ່ວນສຳຄັນໃຫ້ແກ່ ສະຫະພັນກຳມະບານ ຄຕພ ຍາດໄດ້ຜົນສຳເລັດໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 05 ເປັນເຈົ້າ ຊຶ່ງໄດ້ຮັບໃບຢັ້ງຢືນ 05 ເປັນເຈົ້າສອງປີຕິດຕໍ່ກັນ (2022-2023) ຈາກປະທານສູນກາງສະຫະພັນກຳມະບານລາວ.

    ກອງປະຊຸມໄດ້ຮັບຟັງຄຳເຫັນຊີ້ນຳຈາກ ສະຫາຍ ວັງຮື ເນັ່ງມົງວ່າງ ໄດ້ເນັ້ນໜັກໃຫ້ສະມາຊິກກຳມະບານຮາກຖານ ກົມ ຄຄພ ໃນການສຶກສາອົບຮົບການເມືອງແນວຄິດ, ສືບຕໍ່ປະຕິບັດໜ້າທີ່ການເມືອງຕາມພາລະບົດບາດເປັນເຈົ້າການເຂົ້າຮ່ວມໃນວຽກງານມະຫາຊົນ ກໍ່ຄືວຽກວິຊາສະເພາະເພື່ອເປັນເສນາທິການໃຫ້ແກ່ຂັ້ນເທິງໃຫ້ທັນສະພາບການໃນແຕ່ລະໄລຍະ; ເລືອກເອົາຄະນະກຳມະບານຮາກຖານ ຜູ້ທີ່ມີມາດຖານເງື່ອນໄຂ, ສາມາດນຳພາ-ຊີ້ນຳວຽກງານກຳມະບານຂອງກົມ ຄຄພ ໃຫ້ປະສົບຜົນສຳເລັດໃນຕໍ່ໜ້າ, ກອງປະຊຸມໃຫຍ່ ຄັ້ງທີ II ກຳມະບານຮາກຖານ ກົມຄົ້ນຄວ້າ ແລະ ພົວພັນຫຼາຍຝ່າຍ ໄດ້ປ່ອນບັດເລືອກຕັ້ງເອົາຄະນະຮາກຖານຊຸດໃໝ່ ເຊິ່ງປະກອບມີ ສະຫາຍ ບຸນມາ ທິບພົນເລືອງ, ເປັນປະທານກຳມະບານຮາກຖານ, ສະຫາຍ ໄຊຍະວົງ ຂ່ຽມຜາສຸກ, ເປັນຮອງປະທານກຳມະບານຮາກຖານ, ທັງເປັນປະທານກວດກາ ແລະ ສະຫາຍ ນາງ ອຸດາໄລ ລາຊະພົນ, ເປັນກຳມະການ ກຳມະບານຮາກຖານ.

     ໃນຕອນທ້າຍ ສະຫາຍ ສິງຫານະຄອນ ສີຫາລາດ ໃຫ້ກຽດໂອ້ລົມ ຕໍ່ກອງປະຊຸມ ໂດຍໄດ້ຊົມເຊີຍຜົນງານທີ່ກຳມະບານຮາກຖານ ກົມ ຄຄພ ທີ່ຍາດມາໄດ້ໃນສະໄໝຜ່ານມາ, ຮຽກຮ້ອງໃຫ້ຄະນະກຳມະບານຊຸດໃໝ່ສືບຕໍ່ນຳພາສະມາຊິກ, ຮັກສາມູນເຊື້ອດັ່ງກ່າວ ແລະ ເອົາໃຈໃສ່ແກ້ໄຂຂໍ້ຄົງຄ້າງໃຫ້ມີການຫັນປ່ຽນຢ່າງແຂງແຮງ. ພ້ອມກັນນັ້ນ, ສະຫາຍ ຍັງໄດ້ເນັ້ນໜັກໃຫ້ສືບຕໍ່ຍົກສູງດ້ານການເມືອງແນວຄິດໃຫ້ໜັກແໜ້ນ ໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ.

---