ຄະນະຜູ້ແທນພັກ ປປ ລາວ ສຳເລັດການເຂົ້າຮ່ວມກອງປະຊຸມອົງການແມ່ຍິງໄອແຄັບ ຄັ້ງທີ 8 (The 8th Meeting of the ICAPP Women’s Wing) ໃນວັນທີ 17-20 ສິງຫາ 2024 ທີ່ ນະຄອນຫຼວງອູລານບາຕໍ, ປະເທດມົງໂກລີ.

ເຜີຍ​ແຜ່​ໂດຍ​: moderator ເວ​ລາ: 21/08/2024 10:31:08 ຈຳ​ນວນ​​ຢ້ຽມ​ຊົມ 226 ຄັ້ງ ​

      ຄະນະຜູ້ແທນພັກ ປປ ລາວ ນໍາໂດຍ ຜູ້ຕາງໜ້າຈາກສະຖານເອກອັກຄະລັດຖະທູດ ແຫ່ງ ສປປ ລາວ ປະຈໍາ ປະເທດມົງໂກລີ, ໄດ້ເຂົ້າຮ່ວມກອງປະຊຸມແມ່ຍິງຂອງອົງການກອງປະຊຸມສາກົນຂອງບັນດາພັກການເມືອງໃນອາຊີ ຫຼື ໄອແຄັບ ຄັ້ງທີ 8 (The 8^th Meeting of the ICAPP Women’s Wing) ພາຍໃຕ້ຫົວຂໍ້ “ການສົ່ງເສີມຄວາມກ້າວໜ້າແມ່ຍິງ ຢູ່ອາຊີ-ປາຊີຟິກ” (Empowering Women in the Asia Pacific), ເຊິ່ງໄດ້ຈັດຂຶ້ນຢູ່ນະຄອນຫຼວງອູລານບາຕໍ, ປະເທດມົງໂກລີ ໃນລະຫວ່າງວັນທີ 17-20 ສິງຫາ 2024 ພາຍໃຕ້ການ​ເປັນ​ເຈົ້າ​ພາບ​​ຂອງພັກປະຊາຊົນ ມົງໂກລີ, ໂດຍມຄະນະຜູ້ແທນເຂົ້າຮ່ວມທັງໝົດ ຈາກ 14 ພັກການເມືອງ ທີ່ມາຈາກ 13 ປະເທດ.

        ກອງປະຊຸມແມ່ຍິງໄອແຄັບ ຄັ້ງທີ 8 ໄດ້ຈັດຂື້ນເພື່ອເປັນການສືບຕໍ່ຜົນສໍາເລັດຂອງກອງປະຊຸມຄັ້ງທີ 7 ໂດຍໄດ້ປຶກສາຫາລືກັນ ກ່ຽວກັບ ການສົ່ງເສີມບົດບາດ ແລະ ການມີສ່ວນຮ່ວມຂອງແມ່ຍິງໃນການນໍາພາໃນຂະແໜງການຕ່າງໆ ເປັນຕົ້ນແມ່ນ ໃນການເມືອງ, ເສດຖະກິດ ແລະ ສັງຄົມ. ບັນດາຜູ້ແທນກອງປະຊຸມ ຍັງໄດ້ແລກປ່ຽນວິທີການການແກ້ໄຂຂໍ້ຈໍາກັດ ແລະ ສິ່ງທ້າທ້າຍຕ່າງໆຕໍ່ກັບຄວາມສະເໝີພາບລະຫວ່າງຍິງ-ຊາຍ; ການເສີມຂະຫຍາຍການຮ່ວມມືໃນລະ ດັບທ້ອງຖິ່ນ, ລະດັບຊາດ ແລະ ສາກົນ ລະຫວ່າງ ບັນດາການນໍາເພດຍິງ ແລະ ອົງການຈັດຕັ້ງ;  ຍົກໃຫ້ເຫັນຄວາມສໍາຄັນໃນການສົ່ງເສີມບົດບາດຂອງແມ່ຍິງ ຜ່ານການສະໜັບສະໜູນບັນດາໂຄງການ ແລະ ກິດຈະກໍາຕ່າງໆ ເພື່ອສ້າງເງື່ອນໄຂເອື້ອອໍານວຍໃຫ້ເພດຍິງໃນການສາມາດມີສ່ວນຮ່ວມ ໂດຍປາສະຈາກຂໍ້ຈໍາກັດ ແລະ ການເລືອກປະຕິບັດ. ນອກນີ້, ບັນດາຜູ້ແທນກອງປະຊຸມ ຍັງໄດ້ຮຽກຮ້ອງໃຫ້ບັນດາລັດຖະບານ ແລະ ພັກການເມືອງໃນພາກພື້ນ ກໍຄື ປະຊາຄົມໂລກ ຈົ່ງຮ່ວມມືກັນ ແລະ ວາງນະໂຍບາຍທີ່ເໝາະສົມ ເພື່ອສົ່ງເສີມຄວາມກ້າວໜ້າຂອງແມ່ຍິງ ນັບຕັ້ງແຕ່ການເຂົ້າເຖິງການສຶກສາ, ການມີສ່ວນຮ່ວມໃນຂະບວນການພັດທະນາ, ການຝຶກອົບຮົມພາວະຄວາມເປັນຜູ້ນໍາ ແລະ ການສະໜັບສະໜຸນໃນເວທີການເມືອງ.

     ໃນໂອກາດນີ້, ຕາງໜ້າຄະນະຜູ້ແທນ ພັກ ປປ ລາວ ໄດ້ປະກອບຄໍາເຫັນ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຈັດກອງປະຊຸມດັ່ງກ່າວຂອງພັກປະຊາຊົນມົງໂກລີ; ຍົກໃຫ້ເຫັນຄວາມສໍາຄັນໃນການເອົາໃຈໃສ່ ຕໍ່ແມ່ຍິງ ແລະ ເດັກຍິງ  ເພື່ອຮັບປະກັນໃຫ້ແມ່ຍິງໄດ້ມີສ່ວນຮ່ວມຢ່າງເຕັມສ່ວນ ແລະ ມີປະສິດທິພາບ, ປະສິດທິຜົນສູງ ໃນທຸກຂົງເຂດວຽກງານ; ສ້າງເງື່ອນໄຂໃຫ້ແມ່ຍິງ ໄດ້ຮັບໂອກາດເທົ່າທຽມກັບເພດຊາຍໃນທຸກດ້ານ, ສ້າງຄວາມເຂັ້ມແຂງ ແລະ ສົ່ງເສີມຄວາມກ້າວໜ້າຂອງແມ່ຍິງ. ພັກ ປປ ລາວ ໄດ້ໃຫ້ຄວາມສໍາຄັນຢ່າງຍິ່ງໃນການສົ່ງເສີມຄວາມກ້າວໜ້າຂອງແມ່ຍິງ ເຊິ່ງໄດ້ສະແດງອອກໃນລັດຖະທໍາມະນູນ, ບັນດາກົດໝາຍ ແລະ ລະບຽບການ ທີ່ກ່ຽວຂ້ອງພາຍໃນ; ສົ່ງເສີມ ແລະ ຊຸກຍູ້ເງື່ອນໄຂໃຫ້ແມ່ຍິງໄດ້ບັນຈຸຊັບຊ້ອນເຂົ້າໃນຂັ້ນນໍາພາ ແລະ ບໍລິຫານໃນທຸກຂັ້ນ ໃຫ້ກວມເອົາຫຼາຍກວ່າ 20%  ແລະ ເຂົ້າເປັນສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຊັ້ນແຂວງ ໃຫ້ກວມ 30% ຂື້ນໄປ.

   ກອງ​ປະ​ຊຸມຄັ້ງ​ນີ້​​ ໄດ້ປະສົບ​ຜົນສຳ​ເລັດ​ຢ່າງ​ຈົບງາມ ແລະ ໄດ້​​ເປັນ​​​ເອກະ​ພາບຮັບຮອງ​ເອົາເອກະສານສຸດທ້າຍຂອງກອງປະຊຸມ ຊຶ່ງມີເນື້ອໃນຍົກໃຫ້ເຫັນເຖິງບົດບາດສໍາຄັນຂອງບັນດາພັກການເມືອງ ກໍຄື ການຊຸກຍູ້ລັດຖະບານຂອງບັນດາປະເທດໃຫ້ມີນະໂຍບາຍສົ່ງເສີມແມ່ຍິງ, ສົ່ງເສີມການເຄື່ອນໄຫວຮ່ວມກັນຂອງບັນດາພັກການເມືອງໃນອາຊີ ເພື່ອຊຸກຍູ້ ແລະ ເສີມຂະຫຍາຍການມີສ່ວນຮ່ວມຂອງແມ່ຍິງໃນທຸກຂະແໜງການ.

---