ຄະນະຜູ້ແທນພັກ ປປ ລາວ ເຂົ້າຮ່ວມກອງປະຊຸມ “ສະໂມສອນເພື່ອນຣັດເຊຍ” ຜ່ານຮູບແບບວີດີໂອທາງໄກ.

ເຜີຍ​ແຜ່​ໂດຍ​: moderator ເວ​ລາ: 19/07/2024 15:34:01 ຈຳ​ນວນ​​ຢ້ຽມ​ຊົມ 228 ຄັ້ງ ​

     ໃນວັນທີ 18 ກໍລະກົດ 2024 ຄະນະຜູ້ແທນພັກ ປປ ລາວ ນໍາໂດຍ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມ “ສະໂມສອນເພື່ອນຣັດເຊຍ” ພາຍໃຕ້ຫົວຂໍ້ “ການພົວພັນກັນໃນໂລກ: ການພົວພັນແລກປ່ຽນ ລະຫວ່າງ ອະລິຍະທໍາ ແລະ ວັດທະນະທໍາ ອັນເປັນພື້ນຖານຂອງການຢູ່ຮ່ວມກັນໂດຍສັນຕິ ຂອງບັນດາປະເທດ” (Face to Face with the world: Intercivilizational and Intercultural dialogue as a basis for peaceful coexistence of states) ໂດຍການເປັນເຈົ້າພາບຂອງພັກຣັດເຊຍເອກະພາບ, ມີຄະນະຜູ້ແທນຈາກ 25 ປະເທດ ເຂົ້າຮ່ວມ.​

     ກອງປະຊຸມ “ສະໂມສອນເພື່ອນຣັດເຊຍ” ເພື່ອການພົວພັນແລກປ່ຽນ ລະຫວ່າງ ອະລິຍະທໍາ ແລະ ວັດທະນະທໍາ ແມ່ນເປັນຂໍ້ລິເລີ່ມຂອງພັກຣັດເຊຍເອກະພາບ ເພື່ອເສີມຂະຫຍາຍການພົວພັນແລກປ່ຽນ ລະຫວ່າງ ບັນດາປະເທດໃນພາກພື້ນ ແລະ ໃນໂລກ; ຍົກໃຫ້ເຫັນຄວາມສຳຄັນໃນການພັດທະນາ ແລະ ອະນຸລັກ ຄວາມເປັນເອກະລັກ ແລະ ອະລິຍະທໍາ ຂອງບັນດາປະເທດ ເຊິ່ງເປັນການປະກອບສ່ວນສໍາຄັນເຂົ້າໃນການພັດທະນາ, ຮັບປະກັນຄວາມໝັ້ນຄົງ ແລະ ສັນຕິພາບ ຂອງໂລກ. ບັນດາຜູ້ແທນເຂົ້າຮ່ວມກອງປະຊຸມ ໄດ້ແລກປ່ຽນ ກ່ຽວກັບ ສິ່ງທ້າທ້າຍຕໍ່ກັບການພັດທະນາອະລິຍະທໍາ ແລະ ການອະນຸລັກວັດທະນະທໍາຂອງບັນດາປະເທດ; ເສີມຂະຫຍາຍການຮ່ວມມື, ການຢູ່ຮ່ວມກັນໂດຍສັນຕິຂອງບັນດາປະເທດ ທີ່ມີຄວາມແຕກຕ່າງທາງດ້ານອະລິຍະທໍາ ແລະ ວັດທະນະທໍາ. ນອກນີ້, ບັນດາຜູ້ແທນກອງປະຊຸມ ໄດ້ຮຽກຮ້ອງໃຫ້ບັນດາລັດຖະບານ ແລະ ພັກການເມືອງໃນພາກພື້ນ ກໍຄື ປະຊາຄົມໂລກ ຈົ່ງຮ່ວມມືກັນ ແລະ ວາງນະໂຍບາຍທີ່ເໝາະສົມ ເພື່ອສະກັດກັ້ນ ແລະ ຮັບມືກັບສິ່ງທ້າທາຍຕ່າງໆ ທີ່ເປັນໄພຂົ່ມຂູ່ຕໍ່ການປົກປັກຮັກສາວັດທະນະທຳ ແລະ ອະລິຍະທໍາ ທີ່ມີຄວາມຫຼາກຫຼາຍໃນໂລກ.

    ໃນໂອກາດນີ້, ຫົວໜ້າຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຈັດກອງປະຊຸມດັ່ງກ່າວຂອງ ພັກຣັດເຊຍເອກະພາບ; ສະແດງຄວາມຍິນດີຕໍ່ແນວຄິດລິເລີ່ມດັ່ງກ່າວໃນການພົວພັນແລກປ່ຽນ ລະຫວ່າງ ອະລິຍະທໍາ ແລະ ວັດທະນະທໍາ; ຍົກໃຫ້ເຫັນການພັດທະນາອະລິຍະທໍາຂອງພາກພື້ນອາຊີ-ປາຊີຟິກ ໃນຂອບອາຊຽນ ກໍຄືອະລິຍະທໍາຂອງປະເທດລາວ ທີ່ໄດ້ຮັບການພັດທະນາມາແຕ່ສະໄໝບູຮານ ເພື່ອເຊື່ອມໂຍງວັດທະນະທໍາ ແລະ ສິລະປະ ສູ່ ສັນຕິພາບ ແລະ ການພັດທະນາໃນພາກພື້ນ. ພັກ ປປ ລາວ ໄດ້ໃຫ້ຄວາມສໍາຄັນຢ່າງຍິ່ງໃນການເສີມຂະຫຍາຍຄຸນຄ່າທາງວັດທະນະທໍາທີ່ເປັນເອກະລັກຂອງຊາດ ແລະ ພັດທະນາຄວາມສີວິໄລດ້ານຈິດໃຈຂອງສັງຄົມ ຢ່າງບໍ່ຢຸດຢັ້ງ; ຖືເອົາການສ້າງຄວາມຈະເລີນດ້ານເສດຖະກິດ ຄຽງຄູ່ກັບການສ້າງຄວາມສີວິໄລ ດ້ານຈິດໃຈ; ຮັບປະກັນການພັດທະນາປະເທດຊາດແບບຍືນຍົງ ແລະ ໝັ້ນຄົງ. ບົນພື້ນຖານດັ່ງກ່າວ, ພັກ ປປ ລາວ ໄດ້ວາງແນວທາງນະໂຍບາຍ ເພື່ອອະນຸລັກ, ສົ່ງເສີມ ແລະ ພັດທະນາວັດທະນະທໍາຂອງຊາດ, ອະນຸລັກຟື້ນຟູບັນດາມໍລະດົກວັດທະນະທໍາທາງວັດຖຸ ແລະ ນາມມະທໍາ ລວມທັງ ວັດຖຸບູຮານ ແລະ ຮ່ອງຮອຍປະຫວັດສາດ; ເອົາໃຈໃສ່ເຜີຍແຜ່ບັນດາຄຸນຄ່າດ້ານຈິດໃຈທີ່ກ້າວໜ້າໃນຍຸກສະໄໝ ເພື່ອຍົກລະດັບການພັດທະນາວັດທະນະທໍາອັນດີງາມທີ່ເປັນເອກະລັກຂອງຊາດໃຫ້ສູງຂື້ນ ແລະ ກົມກືນກັບຍຸກສະໄໝ; ສະແດງຄວາມໝາຍໝັ້ນຂອງພັກ ປປ ລາວ ໃນການສືບຕໍ່ປຶກສາຫາລື ແລະ ຮ່ວມມືກັບບັນດາພັກການເມືອງ ກໍຄື ບັນດາປະເທດເພື່ອນມິດ ເພື່ອສົ່ງເສີມການພົວພັນແລກປ່ຽນ ລະຫວ່າງ ບັນດາອະລິຍະທໍາ ແລະ ວັດທະນະທໍາ ຂອງບັນດາປະເທດຕ່າງໆ ເພື່ອສັນຕິພາບ, ຄວາມໝັ້ນຄົງ, ມິດຕະພາບ, ການຮ່ວມມືເພື່ອການພັດທະນາ, ຄວາມຈະເລີນຮຸ່ງເຮືອງ ແລະ ການຢູ່ຮ່ວມກັນໂດຍສັນຕິຂອງບັນດາປະຊາຊາດໃນໂລກ.

---