ຄະນະຜູ້ແທນສະມາຄົມມິດຕະພາບລາວ-ຣັດເຊຍໄປຢ້ຽມຢາມ ແລະ ເຮັດວຽກ ຢູ່ ສະຫະພັນຣັດເຊຍ

ເຜີຍ​ແຜ່​ໂດຍ​: moderator ເວ​ລາ: 11/07/2024 11:08:15 ຈຳ​ນວນ​​ຢ້ຽມ​ຊົມ 989 ຄັ້ງ ​

         ໂດຍຕອບການສະໜອງຕາມການເຊື້ອເຊີນ ຂອງສະມາຄົມມິດຕະພາບ ຣັດເຊຍ-ລາວ,  ທ່ານ ສຈ. ປອ. ບໍ່ແສງຄໍາ ວົງດາລາ, ປະທານສະມາຄົມມິດຕະພາບລາວ-ຣັດເຊຍພ້ອມ​ດ້ວຍ​ຄະ​ນະຈໍານວນ 05 ທ່ານ ໄດ້ເດີນທາງໄປຢ້ຽມຢາມ ແລະ ເຂົ້າຮ່ວມກອງປະຊຸມ ຂອງສະມາຄົມມິດຕະພາບ ຣັດເຊຍ-ລາວ ຢູ່ ສະຫະພັນຣັດເຊຍ.

          ໃນໂອກາດການຢ້ຽມຢາມຄັ້ງນີ້, ທ່ານ ສຈ. ປອ. ບໍ່ແສງຄໍາ ວົງດາລາ, ປະທານສະມາຄົມມິດຕະພາບລາວ-ຣັດເຊຍ ພ້ອມດ້ວຍຄະນະໄດ້ເຂົ້າຮ່ວມກອງປະຊຸມ ຂອງສະມາຄົມມິດຕະພາບ ຣັດເຊຍ-ລາວ ແລະໄດ້ຕາງໜ້າໃຫ້ສະມາຄົມມິດຕະພາບ ລາວ-ຣັດເຊຍ ມີຄໍາເຫັນ ແລະ ສະແດງຄວາມຊົມເຊີຍ ຕໍ່ຜົນງານທີ່ສໍາຄັນ ແລະ ໃຫຍ່ຫຼວງ ທີ່ສະມາຄົມມິດຕະພາບ ຣັດເຊຍ-ລາວ ຍາດມາໄດ້ໃນໄລຍະຜ່ານມາ ແລະ ເປັນເອກະພາບຕໍ່ການວາງທິດທາງແຜນການເຄື່ອນໄຫວໃນຕໍ່ໜ້າຂອງສະມາຄົມດັ່ງກ່າວ. ພ້ອມນັ້ນ, ຍັງໄດ້ຕີລາຄາສູງຕໍ່ສາຍພົວພັນມິດຕະພາບການຮ່ວມມື ແລະຄວາມສາມັກຄີແບບເລິກເຊິ່ງ ຂອງ 02  ສະມາຄົມມິດຕະພາບ ລາວ-ຣັດເຊຍ ແລະ ຣັດເຊຍ-ລາວ, ເຊິ່ງຖືເປັນການປະກອບສ່ວນສໍາຄັນເຂົ້າໃນການ​ເສີມ​ຂະ​ຫຍາ​ຍ ແລະ ຊຸກຍູ້ການພົວພັນດ້ານເສດຖະກິດ-ສັງຄົມ ​ແລະ ​ເພີ່ມພູນຄູນສ້າງສາຍພົວພັນມິດຕະພາບແລະ ການຮ່ວມມືອັນດີງາມລະຫວ່າງສອງປະເທດກໍຄືປະຊາຊົນສອງຊາດ ລາວແລະ ຣັດເຊຍ ໃຫ້ນັບມື້ໄດ້ຮັບການພັດທະນາຍິ່ງຂຶ້ນ. ພິເສດ, ປະທານສະມາຄົມມິດຕະພາບ ລາວ-ຣັດເຊຍໄດ້ສະເໜີໃຫ້ຝ່າຍຣັດເຊຍເພີ່ມຈໍານວນທຶນ ແລະ ເບ້ຍລ້ຽງໃຫ້ແກ່ນັກສຶກສາລາວເພີ່ມຕື່ມ,ເຊິ່ງທາງຝ່າຍຣັດເຊຍ ກໍ່ມີຄວາມຍິນດີທີ່ຈະຮັບເອົາຄໍາສະເໜີດັ່ງກ່າວເພື່ອໄປພິຈາລະນາ ແລະ ໄດ້ສະແດງຄວາມຍິນດີ ທີ່ຈະຊຸກຍູ້ການສ້າງຕັ້ງເມືອງແຮກສ່ຽວ ລະຫວ່າງ ເມືອງກີຣຊາຈ໌, ແຂວງວາລາດີມີຣ, ສ. ຣັດເຊຍ ແລະ ເມືອງວັງວຽງ, ແຂວງວຽງຈັນ, ສປປ ລາວ.

         ໃນການເຄື່ອນໄຫວຢ້ຽມຢາມຄັ້ງນີ້ ນອກຈາກພົບປະເຮັດວຽກ ກັບສະມາຄົມມິດຕະພາບ ຣັດເຊຍ-ລາວ ແລະ ຍັງໄດ້ຢ້ຽມຢາມສະຖານທີ່ທ່ອງທ່ຽວປະຫວັດສາດ, ວັດທະນະທໍາ ແລະ ທໍາມະຊາດ ຢູ່ ເມືອງ ມົດສະກູ, ເມືອງ ເຊັນປິເຕີສະເບີກ ແລະ ເມືອງ ກີຣຊາຈ໌.

---