ຄະນະພົວພັນຕ່າງປະເທດສູນກາງພັກ

ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂ່ຳນັບ ຂອງ ເອກອັກຄະລັດຖະທູດ ເເຫ່ງ ສາທາລະນະລັດ ໂບລິວາຣຽນ ເວເນຊູເອລາ ຄົນໃໝ່ ປະຈໍາ ສປປ ລາວ.

ເຜີຍແຜ່ໂດຍ: moderator ເວລາ: 04/07/2024 15:23:36 ຈຳນວນຢ້ຽມຊົມ 227 ຄັ້ງ

ໃນຕອນເເລງຂອງວັນທີ 03 ກໍລະກົດ 2024, ທີ່ ສຳນັກງານ ຄະນະພົວພັນຕ່າງປະເທດສູນກາງພັກ, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ໄດ້ຕ້ອນຮັບ ການເຂົ້າຢ້ຽມຂ່ຳນັບ ຂອງ ສະຫາຍ ຮວງ ກາຣໂລດສ ເຟຣນັງເດັດສ ຮົວເຣັດສ໌ (Juan Carlos Fernandes Juárez), ເອກອັກຄະລັດຖະທູດ ວິສາມັນຜູ້ມີອໍານາດເຕັມ ເເຫ່ງ ສາທາລະນະລັດ ໂບລິວາຣຽນ ເວເນຊູເອລາ ຄົນໃໝ່ ປະຈຳ ສປປ ລາວ ທີ່ມີ ສໍານັກງານ ສະຖານທູດ ຕັ້ງຢູ່ ນະຄອນຫຼວງຮ່າໂນ້ຍ, ສສ. ຫວຽດນາມ.

ໃນໂອກາດນີ້, ສະຫາຍ ຮວງ ກາຣໂລດສ ໄດ້ສະແດງຄວາມຂອບໃຈເປັນຢ່າງສູງ ທີ່ໄດ້ມີໂອກາດເຂົ້າຢ້ຽມຂ່ຳນັບ ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ໃນໂອກາດທີ່ໄດ້ມາຮັບໜ້າທີ່ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ເວເນຊູເອລາ ຄົນໃໝ່ ປະຈຳ ສປປ ລາວ ແລະ ມີຄວາມຍິນດີປະກອບສ່ວນປະຕິບັດໜ້າທີ່ການທູດໃນການເປັນຂົວຕໍ່ປະສານສົມທົບ ກັບ ຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ ກໍຄື ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນຂອງລາວ ເພື່ອປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ເວເນຊູເອລາ-ລາວ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ສະຫາຍ ຮວງ ກາຣໂລດສ ທີ່ໄດ້ຮັບມອບໝາຍໜ້າທີ່ເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ເວເນຊູ ເອລາ ຄົນໃໝ່ ປະຈຳ ສປປ ລາວ; ຕີລາຄາສູງຕໍ່ການພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ເວເນຊູເອລາ ກໍຄື ລະຫວ່າງ ພັກປະຊາຊົນປະຕິວັດລາວ ແລະ ພັກສັງຄົມນິຍົມເອກະພາບເວເນຊູເອລາ ຕະຫຼອດໄລຍະຜ່ານມາ ແລະ ສະແດງຄວາມເຊື່ອໝັ້ນວ່າ ສະຫາຍ ເອກອັກຄະລັດຖະທູດຄົນໃໝ່ ຈະສືບຕໍ່ໃຫ້ການຮ່ວມມື ແລະ ປະສານສົມທົບຢ່າງແໜ້ນແຟ້ນ ກັບ ຄະນະພົວພັນຕ່າງປະເທດສູນກາງພັກ ໃນການປະຕິບັດໜ້າທີ່ເປັນຂົວຕໍ່ປະສານງານ ລະຫວ່າງ ພັກ, ລັດ ຂອງສອງປະເທດລາວ-ເວເນຊູເອລາ ເວົ້າລວມ, ເວົ້າສະເພາະ ລະຫວ່າງ ບັນດາອົງການຈັດຕັ້ງຂອງພັກ, ອົງການຈັດຕັ້ງມະຫາຊົນຂອງລາວ ແລະ ເວເນຊູເອລາ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ເວເນຊູເອລາ ໃຫ້ນັບມື້ມີປະສິດທິຜົນ ແລະ ເລິກເຊິ່ງ ຍິ່ງໆຂຶ້ນ.

ພ້ອມກັນນັ້ນ, ສອງຝ່າຍເຫັນດີ ສືບຕໍ່ຊຸກຍູ້ການພົວພັນຮ່ວມມືດ້ານພັກ, ລັດ ກໍຄື ການທູດປະຊາຊົນ ໃຫ້ຫຼາຍຂຶ້ນ ແລະ ກ້າວໄປສູ່ການເຊັນ MOU ຮ່ວມກັນ, ສຶກສາຄວາມເປັນໄປໄດ້ເຖິງທ່າແຮງບົ່ມຊ້ອນ ເພື່ອສົ່ງເສີມການຮ່ວມມື ໃນຂະເເໜງການຕ່າງໆ ເຊັ່ນ: ຂົງເຂດການຄ້າ, ການລົງທຶນ, ການສຶກສາ, ກະສິກໍາ, ວັດທະນະທໍາ, ທ່ອງທ່ຽວ, ບໍ່ເເຮ່ ແລະ ອື່ນໆ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບລະຫວ່າງສອງພັກ, ສອງລັດ ແລະ ປະຊາຊົນສອງຊາດໃຫ້ຂະຫຍາຍຕົວຍິ່ງໆຂຶ້ນ.