ຄະນະຜູ້ແທນ ພັກ ປປ ລາວ ເຂົ້າຮ່ວມກອງປະຊຸມເວທີປຶກສາຫາລືສາກົນ ລະຫວ່າງ ພັກການເມືອງ BRICS ແລະ ບັນດາພັກການເມືອງໃນບັນດາປະເທດຄູ່ຮ່ວມມື ແລະ ບັນດາກອງປະຊຸມປິ່ນອ້ອມອື່ນໆ ທີ່ເມືອງວາລາດີໂວສຕົກ, ສະຫະພັນຣັດເຊຍ.
ເຜີຍແຜ່ໂດຍ: moderator ເວລາ: 21/06/2024 15:42:56 ຈຳນວນຢ້ຽມຊົມ 119 ຄັ້ງ ຄະນະຜູ້ແທນພັກ ປປ ລາວ ນໍາໂດຍ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເຂົ້າຮ່ວມກອງປະຊຸມເວທີປຶກສາຫາລືສາກົນ, ກອງປະຊຸມຄົບຄະນະລະຫວ່າງ ພັກການເມືອງ BRICS ແລະ ພັກການເມືອງໃນບັນດາປະເທດຄູ່ຮ່ວມມື ພາຍໃຕ້ຫົວຂໍ້: “ສ່ວນໃຫຍ່ໃນໂລກ ເພື່ອໂລກຫຼາຍຂົ້ວ” (World Majority for a Multipolar World), ຄຽງຄູ່ກັບ ກອງປະຊຸມຄະນະປະຈຳຂອງເວທີປຶກສາຫາລື “ເພື່ອເສລີພາບ ຂອງບັນດາຊາດ" ແລະ ການປຶກສາຫາລື “ໂຕະມົນ” ລະຫວ່າງ ພັກການເມືອງຂອງປະເທດອາຊຽນ - ຣັດເຊຍ ໃນລະຫວ່າງວັນທີ 16-19 ມິຖຸນາ 2024 ທີ່ເມືອງວາລາດີໂວສຕົກ, ສະຫະພັນຣັດເຊຍ, ໂດຍການເປັນເຈົ້າພາບຂອງພັກຣັດເຊຍເອກະພາບ, ມີຄະນະຜູ້ແທນຈາກພັກການເມືອງ ຫຼາຍກວ່າ 150 ພັກ ຈາກ 32 ປະເທດ ເຂົ້າຮ່ວມ.
ກອງປະຊຸມເວທີປຶກສາຫາລືສາກົນ ລະຫວ່າງ ພັກການເມືອງ BRICS ແລະ ບັນດາປະເທດຄູ່ຮ່ວມມື ແມ່ນກອງປະຊຸມເຕົ້າໂຮມບັນດາປະເທດເສດຖະກິດໃໝ່ ແລະ ບັນດາປະເທດທີ່ສະໜັບສະໜູນການສ້າງໂລກຫຼາຍຂົ້ວ ທີ່ມີຄວາມສະ ເໝີພາບທາງດ້ານການເມືອງ, ເສດຖະກິດ-ສັງຄົມ ແລະ ການເງິນ. ບັນດາຜູ້ແທນທີ່ເຂົ້າຮ່ວມກອງປະຊຸມ ໄດ້ລົງເລິກແລກປ່ຽນ ກ່ຽວກັບ ຄວາມໝັ້ນຄົງໃນດ້ານຕ່າງໆ ແລະ ບັນຫາເພື່ອສັນຕິພາບໃນໂລກ; ເສີມຂະຫຍາຍສາຍພົວພັນດ້ານເສດຖະກິດ ແລະ ການເງິນ ລະຫວ່າງ ບັນດາປະເທດສ່ວນໃຫຍ່ໃນໂລກ ອັນເປັນພື້ນຖານໃນການສ້າງລະບຽບໂລກໃຫມ່ທີ່ຍຸຕິທຳ ແລະ ສະເໝີພາບ; ການຢູ່ຮ່ວມກັນໂດຍສັນຕິຂອງບັນດາລັດທີ່ມີຄວາມແຕກຕ່າງທາງດ້ານການເມືອງ ແລະ ສັງຄົມ; ແລະ ຄວາມຮັບຜິດຊອບຂອງບັນດາພັກການເມືອງໃນໂລກ ໃນສະພາບການຫັນເປັນລະບົບຕົວເລກ (digital) ຢ່າງໄວວາ.
ໃນໂອກາດນີ້, ຫົວໜ້າຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນໃນ 4 ກອງປະຊຸມດັ່ງກ່າວ ໂດຍຍົກໃຫ້ເຫັນເຖິງ ສະພາບການຂອງໂລກໃນປັດຈຸບັນ ທີ່ກຳລັງປະເຊີນໜ້າກັບສິ່ງທ້າທາຍທາງດ້ານການເມືອງ ແລະ ເສດຖະກິດ ທີ່ບໍ່ສາມາດຄາດຄະເນໄດ້ ອັນໄດ້ສົ່ງຜົນກະທົບຢ່າງໃຫຍ່ຫຼວງຕໍ່ປະຊາຄົມໂລກ, ຊຶ່ງມີຄວາມຮຽກຮ້ອງຢ່າງຍິ່ງໃຫ້ບັນດາກຳລັງການເມືອງທີ່ຮັກຫອມສັນຕິພາບ ຕ້ອງຍົກສູງບົດບາດຄວາມຮັບຜິດຊອບ ແລະ ຄວາມເປັນເຈົ້າການ; ເພີ່ມທະວີຄວາມສາມັກຄີ ແລະ ການຮ່ວມມືໃນແຕ່ລະດ້ານ, ສະໜັບສະໜູນເຊິ່ງກັນ ແລະ ກັນ ບົນຫຼັກການຢູ່ຮ່ວມກັນໂດຍສັນຕິ ແລະ ຕ່າງຝ່າຍຕ່າງໄດ້ຮັບຜົນປະໂຫຍດ, ສຸມຄວາມພະຍາຍາມຮ່ວມກັນ ໃນການສ້າງຄວາມເຂັ້ມແຂງໃຫ້ແກ່ການຮ່ວມມືຫຼາຍຝ່າຍ ເພື່ອການສ້າງໂລກຫຼາຍຂົ້ວທີ່ມີຄວາມສະເໝີພາບ ແລະ ເທົ່າທຽມ ຊຶ່ງມີຄວາມຈຳເປັນ ແລະ ຂາດບໍ່ໄດ້ ສຳລັບບັນດາປະເທດທີ່ພັດທະນາ ແລະ ກຳລັງພັດທະນາ; ສືບຕໍ່ຕ້ານລັດທິຈັກກະພັດນິຍົມ, ລັດທິລ່າເມືອງຂຶ້ນແບບໃໝ່ໃນສະໄໝໃໝ່ ເພື່ອປົກປັກຮັກສາສັນຕິພາບ, ຄວາມໝັ້ນຄົງ ແລະ ນຳເອົາຄວາມສົມບູນພູນສຸກມາສູ່ພາກພື້ນ ແລະ ທົ່ວໂລກ. ພັກ ປປ ລາວ ເຊື່ອໝັ້ນວ່າ BRICS ຈະສາມາດເປັນກົນໄກໜຶ່ງທີ່ສໍາຄັນຊຸກຍູ້ກສ້າງຄວາມເຂັ້ມແຂງໃຫ້ແກ່ການຮ່ວມມືຫຼາຍຝ່າຍ ເພື່ອສົ່ງເສີມການພັດທະນາ ແລະ ຄວາມໝັ້ນຄົງຂອງໂລກ ແລະ ເພື່ອຕ້ານລັດທິຝ່າຍດຽວໃນຕໍ່ໜ້າ.
ກອງປະຊຸມຄັ້ງນີ້ ໄດ້ປະສົບຜົນສຳເລັດຢ່າງຈົບງາມ ແລະ ໄດ້ເປັນເອກະພາບຮັບຮອງເອົາເອກະສານສຸດທ້າຍຂອງກອງປະຊຸມ ຊຶ່ງມີເນື້ອໃນຍົກໃຫ້ເຫັນເຖິງຄວາມສໍາຄັນໃນການເພີ່ມທະວີຄວາມສາມັກຄີຂອງບັນດາພັກການເມືອງ ກໍຄືການສຸມຄວາມພະຍາຍາມຮ່ວມກັນໃນການຮັບມືກັບບັນດາສິ່ງທ້າທ້າຍ ຕໍ່ຄວາມໝັ້ນຄົງ, ເສດຖະກິດ ແລະ ການພັດທະນາ ທີ່ບັນດາປະເທດໃນໂລກກໍາລັງປະເຊີນຢູ່, ທັງເປັນການເພີ່ມທະວີການຮ່ວມມື ລະຫວ່າງ ບັນດາປະເທດອາຊຽນກັບຣັດເຊຍ ແລະ ປະເທດຕ່າງໆໃນໂລກ ເພື່ອເສີມຂະຫຍາຍຄວາມເຂັ້ມແຂງຮອບດ້ານໃນຂະບວນການສ້າງລະບຽບໂລກຫຼາຍຂົ້ວ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20