ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ຮອງຫົວໜ້າກົມໃຫຍ່, ຫົວໜ້າກົມຮັບຜິດຊອບລວມຂົງເຂດອາຊີ-ປາຊີຟິກ, ປະຈໍາສໍານັກງານການຕ່າງປະເທດສະຫະພາບເອີຣົບ
ເຜີຍແຜ່ໂດຍ: moderator ເວລາ: 07/06/2024 15:34:54 ຈຳນວນຢ້ຽມຊົມ 188 ຄັ້ງ ໃນວັນທີ 07 ມິຖຸນາ 2024, ເວລາ 09:15 ໂມງ, ທີ່ສໍານັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ ປາວລາ ປໍາປາໂລນີ, ຮອງຫົວໜ້າກົມໃຫຍ່, ຫົວໜ້າກົມຮັບຜິດຊອບລວມຂົງເຂດອາຊີ-ປາຊີຟິກ, ປະຈໍາສໍານັກງານການຕ່າງປະເທດສະຫະພາບເອີຣົບ (ອີຢູ) ໃນໂອກາດເດີນທາງຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ.
ທ່ານ ນາງ ປາວລາ ປໍາປາໂລນີ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນຂອງຝ່າຍລາວໃນໂອກາດທີ່ໄດ້ມາເຄື່ອນໄຫວຢ້ຽມຢາມ ສປປ ລາວ ຢ່າງເປັນທາງການ, ພ້ອມທັງຕີລາຄາສູງຕໍ່ກັບສາຍພົວພັນຮ່ວມມືທີ່ມີມາດົນນານ ລະຫວ່າງ ອີຢູ ກັບ ສປປ ລາວ, ສະແດງຄວາມຊົມເຊີຍບັນດາຜົນສໍາເລັດໃນດ້ານຕ່າງໆ ທີ່ ສປປ ລາວ ຍາດມາໄດ້ໃນໄລຍະຜ່ານມາ. ພ້ອມກັນນັ້ນ, ທ່ານໄດ້ສະແດງຄວາມຊົມເຊີຍຕໍ່ການເປັນປະທານໝູນວຽນອາຊຽນຂອງ ສປປ ລາວ ໃນປີ 2024, ຊຶ່ງ ອີຢູ ມີຄວາມຍິນດີເຮັດວຽກຮ່ວມກັບພາກສ່ວນກ່ຽວຂ້ອງຂອງ ສປປ ລາວ ເພື່ອສືບຕໍ່ຊ່ວຍເຫຼືອ-ສະໜັບສະໜູນການເປັນເຈົ້າພາບດັ່ງກ່າວ ໃຫ້ໄດ້ຮັບຜົນສໍາເລັດຢ່າງຈົບງາມ. ນອກຈາກນີ້, ທ່ານຍັງໄດ້ ແຈ້ງໃຫ້ຊາບກ່ຽວກັບສະພາບການພົ້ນເດັ່ນຂອງ ອີຢູ, ນະໂຍບາຍຕ່າງປະເທດຂອງອີຢູ, ພ້ອມທັງໄດ້ມີການແລກປ່ຽນທັດສະນະຕໍ່ກັບສະພາບການຕ່າງໆໃນປະຈຸບັນ ທີ່ເປັນບັນຫາທ້າທາຍ ແລະ ສົ່ງຜົນກະທົບຕໍ່ສະຖຽນລະພາບຂອງພາກພື້ນ ແລະ ໃນໂລກ.
ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຂອງຄະນະຜູ້ແທນອີຢູ ໃນຄັ້ງນີ້, ຖືເປັນການປະກອບສ່ວນສໍາຄັນ ເຂົ້າໃນການເສີມຂະຫຍາຍສາຍພົວພັນຮ່ວມມືອັນດີງາມ ລະຫວ່າງ ລາວ ແລະ ອີຢູ. ພ້ອມນີ້, ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ຍັງໄດ້ສະແດງຄວາມຊົມເຊີຍທີ່ເຫັນວ່າ ສາຍພົວພັນຮ່ວມມື ລະຫວ່າງ ລາວ-ອີຢູ ໃນຕະຫລອດໄລຍະ 49 ປີຜ່ານມາ ໄດ້ຮັບການພັດທະນາ ແລະ ເສີມຂະຫຍາຍເປັນກ້າວໆ ແລະ ໄດ້ສະແດງຄວາມຂອບໃຈຕໍ່ການສະໜັບສະໜູນ ແລະ ຊ່ວຍເຫລືອ ຂອງ ອີຢູ ໃຫ້ແກ່ ສປປ ລາວ ຜ່ານໂຄງການຕ່າງໆ ທີ່ກວມເອົາເກືອບທຸກຂະແໜງການຂອງ ສປປ ລາວ ນັບແຕ່ສອງຝ່າຍໄດ້ມີການພົວພັນຮ່ວມມືກັນມາ ແຕ່ປີ 1975 ເຖິງປັດຈຸບັນ, ຊຶ່ງໄດ້ປະກອບສ່ວນເຂົ້າໃນການພັດທະນາ ສປປ ລາວ ແລະ ຫວັງຢ່າງຍິ່ງວ່າ ອີຢູ ຈະສືບຕໍ່ໃຫ້ການຊ່ວຍເຫລືອ ແລະ ສະໜັບສະໜູນແກ່ ສປປ ລາວ ຕື່ມອີກໃນຕໍ່ໜ້າ.
ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ອວຍພອນໃຫ້ ທ່ານ ນາງ ປາວລາ ປໍາປາໂລນີ ພ້ອມດ້ວຍຄະນະ ຈົ່ງປະສົບຜົນສໍາເລັດໃນການຢ້ຽມຢາມ ສປປ ລາວ ໃນຄັ້ງນີ້ ແລະ ອວຍພອນໃຫ້ສາຍພົວພັນຮ່ວມມື ລະຫວ່າງ ລາວ-ອີຢູ ຈົ່ງໄດ້ຮັບໝາກຜົນຫຼາຍຂຶ້ນກວ່າເກົ່າ ເພື່ອປະກອບສ່ວນເຂົ້າໃນພາລະກິດ ສັນຕິພາບ, ມິດຕະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20