ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ເເຮັດເຕີ ໂຣຊ ວາເຣຍວາ (Heather Roach Variava), ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສ. ອາເມຣິກາ ຄົນໃໝ່ ປະຈໍາ ສປປ ລາວ
ເຜີຍແຜ່ໂດຍ: moderator ເວລາ: 04/06/2024 13:40:54 ຈຳນວນຢ້ຽມຊົມ 196 ຄັ້ງ ໃນຕອນເຊົ້າຂອງວັນທີ 31 ພຶດສະພາ 2024, ທີ່ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ເເຮັດເຕີ ໂຣຊ ວາເຣຍວາ, ເອກອັກຄະລັດຖະທູດວິສາມັນຜູ້ມີອໍານາດເຕັມ ເເຫ່ງ ສ. ອາເມຣິກາ ຄົນໃໝ່ ປະຈໍາ ສປປ ລາວ. ໃນການພົບປະ ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ ທ່ານ ນາງ ເເຮັດເຕີ ໂຣຊ ວາເຣຍວາ ທີ່ຖືກແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສ. ອາເມຣິກາ ຄົນໃໝ່ ປະຈໍາ ສປປ ລາວ ແລະ ເຊື່ອໝັ້ນວ່າ ການປະຕິບັດໜ້າທີ່ການທູດຂອງທ່ານ ຈະເປັນຂົວຕໍ່ເຮັດໃຫ້ສາຍພົວພັນ ແລະ ການຮ່ວມມື ລະຫວ່າງ ສປປ ລາວ ແລະ ສ. ອາເມຣິກາ ຂະຫຍາຍຕົວຍິ່ງໆຂຶ້ນ ບົນພື້ນຖານແຫ່ງສາຍພົວພັນການທູດ ລາວ-ອາເມຣິກາ ຄົບຮອບ 69 ປີ ແລະ ຖະເເຫຼງການຮ່ວມ ວ່າດ້ວຍການເປັນຄູ່ມືຮ່ວມແບບກວມລວມ ລະຫວ່າງ ສອງປະເທດ ຄົບຮອບ 8 ປີ.
ໃນໂອກາດນີ້, ທ່ານ ນາງ ເເຮັດເຕີ ໂຣຊ ວາເຣຍວາ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຊົມເຊີຍຕໍ່ບັນດາຜົນສໍາເລັດໃນການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ຢືນຢັນວ່າ ສະຖານເອກອັກຄະລັດຖະທູດ ສ. ອາເມຣິກາ ຈະສືບຕໍ່ປະກອບສ່ວນຊຸກຍູ້ ແລະ ຮັດແໜ້ນການພົວພັນຮ່ວມມືທາງດ້ານເສດຖະກິດ, ວັດທະນະທໍາ ແລະ ສັງຄົມ ລະຫວ່າງ ສອງປະເທດ ໃຫ້ໄດ້ຮັບການຂະຫຍາຍຕົວຍິ່ງໆຂຶ້ນ; ສືບຕໍ່ໃຫ້ການສະໜັບສະໜູນການເປັນປະທານໝູນວຽນ ກອງປະຊຸມສຸດຍອດ ອາຊຽນ ຂອງ ສປປ ລາວ ແລະ ປີທ່ອງທ່ຽວລາວ 2024, ສະແດງຄວາມຂອບໃຈຕໍ່ລັດຖະບານ ສປປ ລາວ ໃນການປະຕິບັດນະໂຍບາຍມະນຸດສະທໍາໃນໂຄງການ ຊອກຫາສິ່ງເສດເຫຼືອ ຂອງທະຫານ ອາເມຣິກາ ທີ່ຫາຍສາບສູນໃນປາງສົງຄາມ ຢູ່ ລາວ (MIA); ສະເເດງຄວາມດີໃຈທີ່ໄດ້ຮັບມອບໝາຍໃຫ້ດຳລົງຕໍາແໜ່ງເປັນເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສ. ອາເມຣິກາ ຄົນໃໝ່ ປະຈໍາ ສປປ ລາວ, ຊຶ່ງເປັນໂອກາດອັນດີທີ່ຈະໄດ້ເຮັດວຽກຮ່ວມກັບພາກສ່ວນຕ່າງໆ ຂອງ ສປປ ລາວ ໃນການສົ່ງເສີມການພົວພັນຮ່ວມມື ລະຫວ່າງ ສອງປະເທດ ເພື່ອຜົນປະໂຫຍດ ຂອງປະຊາຊົນອາເມຣິກາ ແລະ ລາວ.
ໃນໂອກາດດັ່ງກ່າວ, ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕີລາຄາສູງຕໍ່ສາຍພົວພັນຮ່ວມມືຂອງສອງປະເທດ ທີ່ໄດ້ຮັບການພັດທະນາ ແລະ ເສີມຂະຫຍາຍເປັນກ້າວໆ ເຖິງຂັ້ນຍົກລະດັບການພົວພັນເປັນຄູ່ຮ່ວມມືແບບກວມລວມ; ຂອບໃຈຕໍ່ການສະໜັບສະໜູນ ສປປ ລາວ ເປັນປະທານໝູນວຽນອາຊຽນ ແລະ ປີທ່ອງທ່ຽວລາວອີກດ້ວຍ; ພ້ອມກັນນັ້ນ ກໍໄດ້ສະແດງຄວາມຂອບໃຈ ຕໍ່ການຮ່ວມມື ແລະ ສະໜັບສະໜູນດ້ານຕ່າງໆຂອງລັດຖະບານ ຕໍ່ ສປປ ລາວ ໃນບັນດາໂຄງການຮ່ວມມືຂະແໜງການສຶກສາ, ສາທາລະນະສຸກ, ການຕ້ານຢາເສບຕິດ, ການຄ້າ, ການລົງທຶນ, ໂຄງການເກັບກູ້ລະເບີດທີ່ບໍ່ທັນແຕກ (UXO) ແລະ ອື່ນໆ. ພ້ອມນັ້ນ, ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ ທ່ານເອກອັກຄະລັດຖະທູດ ຈົ່ງມີພາລະນາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນການປະຕິບັດໜ້າທີ່ວຽກງານທີ່ມີກຽດຂອງທ່ານ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20