ຄະນະພົວພັນຕ່າງປະເທດສູນກາງພັກ

ສະມາຄົມມິດຕະພາບ ລາວ-ອົດສະຕຣາລີ ຮ່ວມກັບ ສະມາຄົມມິດຕະພາບ ອົດສະຕຣາລີ-ລາວ ຈັດກິດຈະກຳແຂ່ງຂັນກິລາເຕະບານມິດຕະພາບ

ເຜີຍແຜ່ໂດຍ: moderator ເວລາ: 17/05/2024 14:19:24 ຈຳນວນຢ້ຽມຊົມ 321 ຄັ້ງ

ໃນວັນທີ 16 ພຶດສະພາ 2024, ສະມາຄົມມິດຕະພາບ ລາວ-ອົດສະຕຣາລີ ຮ່ວມກັບ ສະມາຄົມມິດຕະພາບ ອົດສະຕຣາລີ - ລາວ ໄດ້ຈັດກິດຈະກຳແຂ່ງຂັນກິລາເຕະບານມິດຕະພາບ ເພື່ອສະເຫຼີມສະຫຼອງການສ້າງຕັ້ງສະມາຄົມມິດຕະພາບ ລາວ-ອົດສະຕຣາລີ - ອົດສະຕຣາລີ - ລາວ ຢູ່ທີ່ເດີ່ນເຕະບານເທບປັນຍາ, ເມືອງໄຊເສດຖາ, ນະຄອນຫຼວງວຽງຈັນ. ໃຫ້ກຽດເຂົ້າຮ່ວມໃນພິທີດັ່ງກ່າວມີ ທ່ານ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ທ່ານ ປອ. ສະຖາບັນດິດ ອິນສີຊຽງໃໝ່, ຮອງລັດຖະມົນກະຊວງແຜນການ ແລະ ການລົງທຶນ, ປະທານ ສະມາຄົມ ມິດຕະພາບລາວ - ອົດສະຕຣາລີ ແລະ ທ່ານ ແດນ ເຮວເດິນ, ອັກຄະລັດຖະທູດ, ສະຖານທູດອົດສະຕຣາລີ ປະຈໍາ ສປປ ລາວ. ນອກຈາກນັ້ນ, ຍັງມີທ່ານຜູ້ຕາງໜ້າຈາກກະຊວງ, ອົງການ ແລະ ນັກກິລາຈາກພາກສ່ວນທີ່ກ່ຽວຂ້ອງຂອງ ລາວ ແລະ ອົດສະຕຣາລີ ເຂົ້າຮ່ວມ 150 ກວ່າທ່ານ. ກິດຈະກໍາກິລາເຕະບານມິດຕະພາບຄັ້ງນີ້ ມີນັກກິລາເຂົ້າຮ່ວມຈາກ ສະມາຄົມມິດຕະພາບ ລາວ-ອົດສະຕຣາລີ-ອົດສະຕຣາລີ-ລາວ, ຄະນະພົວພັນຕ່າງປະເທດສູນກາງພັກ, ຫ້ອງວ່າການສູນກາງພັກ, ຄະນະໂຄສະນາອົບຮົມສູນກາງພັກ, ສະພາແຫ່ງຊາດ ແລະ ກະຊວງການຕ່າງປະເທດ.

ການຈັດງານກິລາມິດຕະພາບຄັ້ງນີ້ ນອກຈາກເປັນການສະເຫຼີມສະຫຼອງການສ້າງຕັ້ງສະມາຄົມມິດຕະພາບ ລາວ-ອົດສະຕຣາລີ - ອົດສະຕຣາລີ - ລາວ ແລ້ວ, ຍັງເປັນການຮັດແໜ້ນສາຍພົວພັນມິດຕະພາບ ແລະ ສ້າງຄວາມສາມັກຄີ ລະຫວ່າງ ບັນດາອົງການຈັດຕັ້ງ ຂອງ ລາວ ແລະ ອົດສະຕຣາລີ ເພື່ອເປັນການປະກອບສ່ວນພັດທະນາ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ແລະ ປະຊາຊົນສອງຊາດ ລາວ ແລະ ອົດສະຕຣາລີ

ສະມາຄົມມິດຕະພາບ ລາວ-ອົດສະຕຣາລີ ໄດ້ຮັບການສ້າງຕັ້ງຂຶ້ນໃນວັນທີ 15 ພຶດສະພາ 2023 ແລະ ກໍ່ໄດ້ເຄື່ອນໄຫວຕາມພາລະບົດບາດ, ເງື່ອນໄຂ ແລະ ຄວາມສາມາດ ຮ່ວມກັບພາກສ່ວນກ່ຽວຂ້ອງ ຂອງ ອົດສະຕຣາລີ ໂດຍສະເພາະ ສະມາຄົມມິດຕະພາບ ອົດສະຕຣາລີ - ລາວ, ສະຖານທູດອົດສະຕຣາລີ ປະຈຳ ສປປ ລາວ ດ້ວຍການຈັດກິດຈະກຳທີ່ສອງຝ່າຍເຫັນດີຮ່ວມກັນໃນໂອກາດວັນສໍາຄັນຕ່າງໆ ເພື່ອເປັນການປະກອບສ່ວນເສີມຂະຫຍາຍສາຍພົວພັນມິດຕະພາບ ອັນດີງາມ ກໍຄືພົວພັນການຮ່ວມມື ລະຫວ່າງ ສອງປະເທດ ແລະ ປະຊາຊົນສອງຊາດ ລາວ ແລະ ອົດສະຕຣາລີ ໃຫ້ນັບມື້ນັບໄດ້ຮັບການພັດທະນາຂື້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ຂອງສອງປະເທດ ແລະ ເພື່ອປະກອບ ສ່ວນຢ່າງຕັ້ງໜ້າເຂົ້າໃນການພາລະກິດແຫ່ງສັນຕິພາບ, ມິດຕະພາບ ແລະ ການຮ່ວມມື ຂອງພາກພື້ນ ແລະ ໃນໂລກ.