ຄະນະພົວພັນຕ່າງປະເທດສູນກາງພັກ ເຜີຍແຜ່ເຊື່ອມຊຶມວັນສຳຄັນຂອງພັກ-ຂອງຊາດ ແລະ ເປີດຂະບວນການແຂ່ງຂັນຍ້ອງຍໍ ຮັກຊາດ ແລະ ພັດທະນາ ປະຈຳປີ 2024.

ເຜີຍ​ແຜ່​ໂດຍ​: moderator ເວ​ລາ: 25/03/2024 10:08:22 ຈຳ​ນວນ​​ຢ້ຽມ​ຊົມ 448 ຄັ້ງ ​

        ໃນວັນທີ 22 ມີນາ 2024, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດປາຖະກະຖາເຊື່ອມຊຶມເອກະສານຄື:   ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 69 ປີ (22. 03.1955-22.03.2024); ວັນຄຽດແຄ້ນ ຂອງປະຊາຊົນລາວ ວັນລະນຶກນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ຄົບຮອບ 78 ປີ (21.03.1946-21.03.2024); ແລະ ເປີດຂະບວນການແຂ່ງຂັນຍ້ອງຍໍ ຮັກຊາດ ແລະ ພັດທະນາ ໂດຍການ ເປັນ ປະທານ ແລະ ໃຫ້ກຽດເຜີຍແຜ່ຂອງສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ມີບັນດາສະຫາຍໃນຄະນະບໍລິຫານງານພັກ, ສະມາຊິກພັກ, ພະນັກງານທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມ 130 ສະຫາຍ.

        ໃນພິທີດັ່ງກ່າວສະຫາຍ ທອງສະຫວັນ ພົມວິຫານ, ໄດ້ຍົກໃຫ້ເຫັນເຖິງການຕໍ່ສູ້ຂອງປະຊາຊົນລາວ ບັນດາເຜົ່າຕ້ານກັບພວກລ່າເມືອງຂຶ້ນຝຣັ່ງ ນັບແຕ່ປີ 1930 ເປັນຕົ້ນມາເວົ້າລວມເວົ້າສະເພາະແມ່ນບັ້ນຮົບປ້ອງກັນເມືອງທ່າແຂກໃນເດືອນມີນາ ປີ 1946 ເຊິ່ງນຳພາການຕໍ່ສູ້ໂດຍ ປະທານ ສຸພານຸວົງ.

        ພາຍຫຼັງພວກລ່າເມືອງຂຶ້ນຝຣັ່ງ ແລະ ລູກແຫຼ່ງຕີນມືຂອງ ພວກເຂົາໄດ້ສ້າງໂທດກຳທີ່ບໍ່ມີວັນລືມ  ໃຫ້ແກ່ປະຊາ ຊົນລາວ, ພວກເຂົາໄດ້ເຂັນຂ້າປະຊາຊົນ, ຂ້າແມ່ມານດ້ວຍການເອົາກະບີ່ແທງທ້ອງ, ຈັບເອົາເດັກນ້ອຍຍັດໃສ່ກະເປົາຖີ້ມລົງນ້ຳຂອງ ແລະ ເອົົາປືນກວາດຍິງໃສ່ຝູງຄົນແລ້ວໂຍນລົງນ້ຳຂອງເວລານັ້ນນ້ຳຂອງ ເຕັມໄປດ້ວຍເລືອດ ແລະ ຊາກສົບຂອງ ປະຊາຊົນຜູ້ບໍລິສຸດ ທັງແມ່ຍິງ ແລະ ເດັກນ້ອຍ ຈຳນວນ 3.000 ກ່ວາຄົນຖືກຂ້າຕາຍ ເຮືອນຊານບ້ານຊ່ອງຖືກທຳລາຍເປັນຈຳນວນຫລວງຫຼາຍ ຄອບຄົວຜົວ-ເມຍ, ພໍ່-ແມ່-ລູກຖືກພັດພາກຈາກກັນ ລູກກາຍເປັນລູກກຳພ້າ-ກຳພອຍ ຍ້ອນການກະທຳອັນໄຮ້ມະນຸດສະທຳ ແລະ ໂຫດຮ້າຍປ່າເຖື່ອນດັ່ງກ່າວນັ້ນ ສປປ ລາວ ຈຶ່ງຖືເອົາວັນທີ 21 ມີນາ ເປັນວັນຄຽດແຄ້ນຂອງ ປະຊາຊົນລາວ ຕໍ່ສັດຕູຜູ້ຮຸກຮານ ພ້ອມນີ້ ພັກ-ລັດ ຍັງໄດ້ກຳນົດເອົາວັນທີ 21 ມີນາ ເປັນວັນລະນຶກເຖິງນັກຮົບເສຍອົງຄະ ແລະ ເສຍສະຫຼະຊີວິດເພື່ອປະເທດຊາດ ນັບແຕ່ປີ 2014 ເປັນຕົ້ນມາ.  

         ພ້ອມກັນນັ້ນ, ສະຫາຍ ທອງສະຫັວນ ພົມວິຫານ ຍັງໄດ້ເລົ່າມູນເຊື້ອການກຳເນີດ ແລະ ການຂະຫຍາຍຕົວຂອງພັກ ປະຊາຊົນ ປະຕິວັດລາວ ຕະຫຼອດໄລຍະ 69 ປີ ທີ່ຜ່ານມາ. ເຊິ່ງສະຫາຍໄດ້ຍົກໃຫ້ເຫັນການກຳເນີດ, ທາດແທ້ ແລະ ອຸດົມການຂອງພັກ ຜົນງານທີ່ຍາດມາໄດ້ໃນແຕ່ລະໄລຍະນຳພາປົດປ່ອຍປະເທດຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ເຫັນໄດ້ວ່າ ສປປ ລາວ ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ ເສດຖະກິດແຫ່ງຊາດມີການຂະຫຍາຍຕົວຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນລາວໄດ້ຮັບການປັບປຸງດີຂຶ້ນ. 

        ໃນຕອນທ້າຍ ສະຫາຍ ວາລະໄຊ ເລັ່ງສະຫວັດ, ຍັງໄດ້ໃຫ້ກຽດໂອລົມຕໍ່ພິທີເປີດຂະບວນການແຂ່ງຂັນຍ້ອງຍໍຮັກຊາດ ແລະ ພັດທະນາຂອງ ຄະນະພົວພັນຕ່າງປະເທດສູນກາງພັກ ຮອດປີ 2025 ໂດຍເນັ້ນໃຫ້ບັນດາກົມຖືເອົາການແຂ່ງຂັນຮັກຊາດ ແລະ ພັດທະນາ ຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ເພື່ອເຮັດໃຫ້ ສອງວຽກດັ່ງກ່າວໄປໃນລວງດຽວກັນ ທີ່ສູນກາງພັກ ແລະ ລັດຖະບານວາງອອກ.

---