ຄະນະພົວພັນຕ່າງປະເທດສູນກາງພັກ

ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນ ສະມາຄົມມິດຕະພາບ ສ.ເກົາຫຼີ - ລາວ.

ເຜີຍແຜ່ໂດຍ: moderator ເວລາ: 20/03/2024 14:54:43 ຈຳນວນຢ້ຽມຊົມ 594 ຄັ້ງ

ໃນວັນທີ 20 ມີນາ 2024, ທີ່ສໍານັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ໂອ ມິງ ຮວັນ (Oh Myung Hwan), ປະທານສະມາຄົມມິດຕະພາບ ສ.ເກົາຫຼີ - ລາວ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນໂອກາດດັັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການມາຢ້ຽມຢາມ ສປປ ລາວ ຂອງຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ, ເຊິ່ງເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດ ກໍຄື ປະຊາຊົນສອງຊາດ ລາວ - ສ.ເກົາຫຼີ ໃຫ້ນັບມື້ໄດ້ຮັບການພັດທະນາ ແລະ ກ້າວຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ. ພ້ອມນັ້ນ, ຍັງໄດ້ຊົມເຊີຍຕໍ່ການພົວພັນຮ່ວມມືທີ່ດີ ຕະຫຼອດໄລຍະເກືອບສອງທົດສະວັດທີ່ສ້າງຕັ້ງສະມາຄົມມິດຕະພາບຮ່ວມກັນ ລະຫວ່າງ ລາວ - ສ.ເກົາຫຼີ ແລະ ສ.ເກົາຫຼີ - ລາວ ໃນການເຮັດບົດບາດການທູດປະຊາຊົນ ເພື່ອສະໜັບສະໜູນການພົວພັນດ້ານລັດຂອງສອງປະເທດໃຫ້ມີປະສິດທິຜົນຍິ່ງໆຂຶ້ນ ໂດຍສະເພາະຊຸກຍູ້ການຮ່ວມມືໃນຂະ ແໜງເສດຖະກິດ, ການຄ້າ, ການລົງທຶນ, ການສຶກສາ, ວັດທະນະທຳ ແລະ ການທ່ອງທ່ຽວ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ - ສ.ເກົາຫຼີ. ພ້ອມນັ້ນ ຍັງໄດ້ປະກອບສ່ວນທຶນຮອນເຂົ້າໃນການສ້າງສາພັດທະນາ ສປປ ລາວ ໂດຍສະເພາະແມ່ນການລະດົມທຶນມາພັດທະນາພື້ນຖານໂຄງລ່າງດ້ານການສຶກສາ, ສາທາລະນະສຸກ, ວັດທະນະທຳ-ສັງຄົມ ເປັນຕົ້ນແມ່ນສະໜັບສະໜູນກໍ່ສ້າງອາຄານໂຮງຮຽນ, ສະໜັບສະໜູນເຄື່ອງນຸ່ງຫົ່ມ, ເກີບ, ຢາປົວພະຍາດ, ເຄື່ອງອຸປະໂພກ ແລະ ບໍລິໂພກອື່ນໆ.

ທ່ານ ໂອ ມິງ ຮວັນ, ປະທານສະມາຄົມມິດຕະພາບ ສ.ເກົາຫຼີ - ລາວ ໄດ້ສະແດງຄວາມຂອບໃຈຢ່າງຈິງໃຈ ຕໍ່ການຕ້ອນຮັບອັນອົບອຸ່ນຂອງ ທ່ານ ທອງສະຫວັນ ພົມວິຫານ ແລະ ໄດ້ລາຍງານການເຄື່ອນໄຫວ ຂອງ ສະມາຄົມມິດຕະພາບ ສ.ເກົາຫຼີ - ລາວ ໂດຍຫຍໍ້ໃຫ້ຊາບ ພ້ອມທັງໃຫ້ຄຳໝັ້ນໝາຍທີ່ຈະສືບຕໍ່ພົວພັນຮ່ວມມືກັບສະມາຄົມມິດຕະພາບ ລາວ - ສ.ເກົາຫຼີ ໃນການປະຕິບັດພາລະບົດບາດ ຂອງ ຕົນ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດ ແລະ ປະຊາຊົນສອງຊາດ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ສ.ເກົາຫຼີ-ລາວ.

ໃນໂອກາດມາຢ້ຽມຢາມ ສປປ ລາວ ຄັ້ງນີ້ຄະນະຜູ້ແທນສະມາຄົມມິດຕະພາບ ສ.ເກົາຫຼີ - ລາວ ໄດ້ໄປເຄື່ອນໄຫວຢ້ຽມຢາມ ແລະ ເຂົ້າຮ່ວມພິທີມອບ-ຮັບອາຄານໂຮງຮຽນປະຖົມສົມບູນຢູ່ບ້ານກ້ານ, ເມືອງຊຳເໜືອ, ແຂວງຫົວພັນ, ຈຳນວນ 5 ຫ້ອງຮຽນ, 1 ຫ້ອງການຄູ ແລະ ຫ້ອງນ້ຳຍິງ-ຊາຍ ລວມມູນຄ່າການກໍ່ສ້າງ 67.000 ໂດລາສະຫະລັດ, ເຊິ່ງເປັນໂຮງຮຽນມິດຕະພາບແຫ່ງທີ 3 ທີ່ໄດ້ຮັບການສ້າງຂຶ້ນໂດຍການຮ່ວມມື ລະຫວ່າງ ສະມາຄົມມິດຕະພາບ ລາວ - ສ.ເກົາຫຼີ ແລະ ສ.ເກົາຫຼີ ລາວ ໂດຍການສະໜັບສະໜູນທຶນຈາກສະມາຄົມມິດຕະພາບ ສ.ເກົາຫຼີ - ລາວ. ພ້ອມດຽວກັນນັ້ນ ຄະນະຜູ້ແທນຍັງໄປຢ້ຽມຢາມແຂວງໄຊສົມບູນແລະ ມອບເຄື່ອງຊ່ວຍເຫຼືອຄອມພິວເຕີໂນດບຸກ ຈຳນວນ 8 ເຄື່ອງ, ຢາປົວພະຍາດ ແລະ ອຸປະກອນການສຶກສາຈຳນວນໜຶ່ງ ລວມມູນຄ່າ 7.000 ໂດລາສະຫະລັດ ແລະ ໄປທ່ຽວຊົມສະຖານທີ່ທ່ອງທ່ຽວທາງປະຫວັດສາດ, ວັດທະນະທຳ ແລະ ທຳມະຊາດ ຈຳນວນໜຶ່ງ ຢູ່ນະຄອນຫຼວງວຽງຈັນ, ແຂວງຫົວພັນ ແລະ ແຂວງໄຊສົມບູນ