ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ຮອງລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ເບລາຣຸດຊີ

ເຜີຍ​ແຜ່​ໂດຍ​: moderator ເວ​ລາ: 14/03/2024 17:00:27 ຈຳ​ນວນ​​ຢ້ຽມ​ຊົມ 331 ຄັ້ງ ​

        ໃນຕອນບ່າຍ ຂອງວັນທີ 13 ມີນາ 2024, ທີ່ສໍານັກງານ ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຢັບເກນີ ເຊັດສະຕານົບ, ຮອງລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ເບລາຣຸດຊີ.

       ທ່ານ ທອງສະຫວັນ ພົມວິຫານ ໄດ້ກ່າວຍິນດີຕ້ອນຮັບ ແລະ ຊົມເຊີຍທ່ານ ເຢັບເກນີ ເຊັດສະຕານົບ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ສປປ ລາວ ເປັນຄັ້ງທໍາອິດ ເພື່ອເຂົ້າຮ່ວມກອງປະຊຸມປຶກສາຫາລືດ້ານການເມືອງ ລາວ-ເບລາຣຸດຊີ ຄັ້ງທີ 3 ແລະ ຮ່ວມເປັນເຈົ້າພາບຈັດພິທີສະເຫຼີມສະຫຼອງ ຄົບຮອບ 30 ປີ ຂອງ ການສ້າງຕັ້ງສາຍພົວພັນການທູດ ລາວ-ເບລາຣຸດຊີ ທີ່ນະຄອນຫຼວງວຽງຈັນ, ອັນເປັນການປະກອບສ່ວນທີ່ສໍາຄັນຕໍ່ການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືຂອງສອງປະເທດ. ໃນໂອກາດນີ້, ທ່ານຫົວໜ້າ ຄຕພ ໄດ້ແຈ້ງໃຫ້ຊາບໂດຍຫຍໍ້ກ່ຽວກັບ ການພັດທະນາເສດຖະກິດ-ສັງຄົມ ຂອງ ສປປ ລາວ ແລະ ໄດ້ຍົກໃຫ້ເຫັນເຖິງ ພາລະບົດບາດຂອງ ຄະນະພົວພັນຕ່າງປະເທດສູນກາງພັກ ໃນການເຄື່ອນໄຫວວຽກງານການຕ່າງປະເທດດ້ານພັກ ແລະ ການທູດປະຊາຊົນ. ພ້ອມກັນນັ້ນ, ທ່ານ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ ການຊ່ວຍເຫຼືອອັນລໍ້າຄ່າຂອງລັດຖະບານ ແລະ ປະຊາຊົນເບລາຣຸດຊີ ກໍຄື ປະຊາຊົນຂອງອະດີດສະຫະພາບໂຊວຽດ ທີ່ໄດ້ໃຫ້ການຊ່ວຍເຫຼືອປະຊາຊົນລາວ ໃນໄລຍະຕໍ່ສູ້ກູ້ຊາດ ຈົນຍາດໄດ້ໄຊຊະນະໃນປີ 1975, ພ້ອມທັງໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມ ລະຫວ່າງ ສອງປະເທດ ທີ່ມີມາແຕ່ຍາວນານ ແລະ ຫວັງວ່າສາຍພົວພັນມິດຕະພາບດັ່ງກ່າວ ຈະສືບຕໍ່ໄດ້ຮັບການພັດທະນາຂຶ້ນສູ່ລະດັບໃໝ່ ກໍ່ຄື ການເພີ່ມທະວີການຮ່ວມມືໃນຂົງເຂດການເມືອງ, ເສດຖະກິດ, ການຄ້າ-ການລົງທຶນ, ສາທາລະນະສຸກ, ການສຶກສາ, ການພົວພັນດ້ານພັກ ແລະ ການທູດປະຊາຊົນ ເພື່ອນໍາເອົາຜົນປະໂຫຍດມາສູ່ປະຊາຊົນສອງຊາດ ລາວ-ເບລາຣຸດຊີ.

        ທ່ານ ເຢັບເກນີ ເຊັດສະຕານົບ ໄດ້ກ່າວສະແດງຄວາມຂອບໃຈຕໍ່ ການຕ້ອນຮັບອັນອົບອຸ່ນຂອງ ຫົວໜ້າ ຄຕພ, ຮູ້ສຶກເປັນກຽດ ແລະ ປິຕິຍິນດີທີ່ໄດ້ມາເຄື່ອນໄຫວວຽກງານການຕ່າງປະເທດຢູ່ ສປປ ລາວ ໃນຄັ້ງນີ້. ທ່ານ ຍັງໄດ້ແຈ້ງໃຫ້ຊາບໂດຍສັງເຂບກ່ຽວກັບ ສະພາບການເມືອງ ແລະ ການພັດທະນາເສດຖະກິດ-ສັງຄົມ ຂອງ ສ.ເບລາຣຸດຊີ, ພ້ອມທັງໄດ້ສະແດງຄວາມເຫັນດີເປັນເອກະພາບກັບ ຫົວໜ້າ ຄຕພ ໃນການພັດທະນາການພົວພັນຮ່ວມມື ລະຫວ່າງ ລາວ-ເບລາຣຸດຊີ ໃນຂົງເຂດຕ່າງໆ ເພື່ອໃຫ້ມີບາດກ້າວຂະຫຍາຍຕົວໃໝ່ ແລະ ຮ່ວມກັນຕ້ານລັດທິລ່າເມືອງຂຶ້ນແບບໃໝ່ ເພື່ອສົ່ງເສີມການຫັນເປັນໂລກຫຼາຍຂວ້າ. ໃນໂອກາດນີ້, ທ່ານ ເຊັດສະຕານົບ ຍັງໄດ້ສະແດງຄວາມຂອບໃຈຕໍ່ ການສະໜັບສະໜູນຂອງ ສປປ ລາວ ທີ່ມີຕໍ່ ສ.ເບລາຣຸດຊີ ທັງໃນເວທີພາກພື້ນ ແລະ ສາກົນ ພ້ອມທັງຂໍໃຫ້ ສປປ ລາວ ຊຸກຍູ້ການເຄື່ອນໄຫວວຽກງານ ອາຊຽນ-ເບລາຣຸດຊີ ແລະ ອວຍພອນໃຫ້ ການເປັນປະທານອາຊຽນ ຂອງ ສປປ ລາວ ໃນປີ 2024 ນີ້ ຈົ່ງປະສົບຜົນສໍາເລັດຢ່າງຈົບງາມ. ພ້ອມນັ້ນ, ທ່ານຮອງລັດຖະມົນຕີກະຊວງການຕ່າງປະເທດ ເບລາຣຸດຊີ ຍັງໄດ້ເຊື້ອເຊີນ ຫົວໜ້າ ຄຕພ ໄປຢ້ຽມຢາມເບລາຣຸດຊີ ໃນເວລາທີ່ເໝາະສົມ.

        ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ອວຍພອນໃຫ້ ພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ເບລາຣຸດຊີ ຄົບຮອບ 30 ປີ ແລະ ການເຄື່ອນໄຫວວຽກງານຂອງທ່ານ ເຢັບເກນີ ເຊັດສະຕານົບ ໃນຄັ້ງນີ້ ຈົ່ງປະສົບຜົນສໍາເລັດຢ່າງຈົບງາມ, ອວຍພອນໃຫ້ການພົວພັນຮ່ວມມື ລະຫວ່າງ ສອງປະເທດ ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.

 

---