ທ່ານ ທອງສະຫວັນ ພົມວິຫານ, ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບຂອງ ເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ຄົນໃໝ່
ເຜີຍແຜ່ໂດຍ: moderator ເວລາ: 01/03/2024 08:18:02 ຈຳນວນຢ້ຽມຊົມ 241 ຄັ້ງ ໃນຕອນເຊົ້າຂອງວັນທີ 29 ກຸມພາ 2024 ທີ່ຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ນາງ ເມແກັນ ຈອນສ (Megan Jones) ໃນໂອກາດຖືກແຕ່ງຕັ້ງໃຫ້ດຳລົງຕຳແໜ່ງເປັນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ອົດສະຕຣາລີ ປະຈຳ ສປປ ລາວ ຄົນໃໝ່.
ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ ທ່ານ ນາງ ເມແກັນ ຈອນສ ທີ່ໄດ້ຮັບການແຕ່ງຕັ້ງມາດຳລົງຕຳແໜ່ງເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອົດສະຕຣາລີ ປະຈຳ ສປປ ລາວ ແລະ ເຊື່ອ ໝັ້ນວ່າ ທ່ານທູດ ຈະສືບຕໍ່ຮ່ວມມື ກັບຄະນະພົວພັນຕ່າງປະເທດສູນກາງພັກ ແລະ ພາກສ່ວນກ່ຽວຂ້ອງຂອງລາວ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ລາວ - ອົດສະຕຣາລີ ໃຫ້ມີຄວາມແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ. ພ້ອມນັ້ນ, ທ່ານ ທອງສະຫວັນ ພົມວິຫານ ຍັງໄດ້ແຈ້ງໃຫ້ຊາບ ກ່ຽວກັບ ທີ່ຕັ້ງ ແລະ ພາລະບົດບາດຂອງ ຄຕພ, ສະພາບພົ້ນເດັ່ນຂອງ ພັກ, ລັດລາວ ໃນການສ້າງສາພັດທະນາເສດຖະກິດ-ສັງຄົມ ຂອງປະເທດ ພາຍໃຕ້ການນໍາຂອງ ພັກ ປປ ລາວ ໃນໄລຍະຜ່ານມາ ກໍຄື ໃນປັດຈຸບັນ, ລວມທັງການເປັນປະທານໝູນວຽນອາຊຽນ ແລະ ສຸມໃສ່ການຈັດງານປີທ່ອງທ່ຽວລາວ ປະຈໍາປີ 2024. ໃນໂອກາດດັ່ງກ່າວ, ທ່ານຍັງໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ແລະ ສະໜັບສະໜູນດ້ານຕ່າງໆຂອງ ລັດຖະບານ ອົດສະຕຣາລີ ຕໍ່ ສປປ ລາວ ໃນຕະຫຼອດໄລຍະຜ່ານມາ, ໂດຍສະເພາະ ການພັດທະນາພື້ນຖານໂຄງລ່າງ, ການເກັບກູ້ລະເບີດບໍ່ທັນແຕກ, ການພັດທະນາຊັບພະຍາກອນມະນຸດ, ສາທາລະນະສຸກ, ການຄ້າ-ການລົງທຶນ ແລະ ອື່ນໆ.
ທ່ານທູດ ໄດ້ສະແດງຄວາມຂອບໃຈເປັນຢ່າງສູງ ຕໍ່ການຕ້ອນຮັບຂອງ ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ໃນໂອກາດທີ່ຕົນມາຮັບໜ້າທີ່ເປັນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ອົດສະຕຣາລີ ປະຈຳ ສປປ ລາວ, ສະແດງຄວາມຂອບໃຈຕໍ່ ສປປ ລາວ ໃນການເປັນຝ່າຍປະສານງານ ອາຊຽນ-ອົດສະຕຣາລີ ຕະຫລອດໄລຍະ 02 ປີ ຜ່ານມາ ເພື່ອປະກອບສ່ວນ ໃຫ້ແກ່ການຈັດກອງປະຊຸມສຸດຍອດພິເສດເພື່ອສະເຫຼີມສະຫຼອງຄົບຮອບ 50 ປີ ການເປັນຄູ່ເຈລະຈາ ອາຊຽນ-ອົດສະຕຣາລີ ແລະ ເນັ້ນວ່າ ຈະເຮັດສຸດຄວາມສາມາດ ເພື່ອສືບຕໍ່ປະຕິບັດໜ້າທີ່ການທູດ ໃນການເປັນຂົວເຊື່ອມມິດຕະພາບອັນດີງາມ ລະຫວ່າງ ສອງລັດຖະບານ ອົດສະຕຣາລີ-ລາວ ແລະ ຍິນດີສະໜັບສະໜູນການເປັນປະທານໝູນວຽນອາຊຽນຂອງ ສປປ ລາວ ໃນປີນີ້.
ສອງຝ່າຍໄດ້ເອກະພາບກັນ ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງປະເທດ ລາວ-ອົດສະຕຣາລີ ໃນໄລຍະ 72 ປີ ຜ່ານມາ ແລະ ຍິນດີສືບຕໍ່ປະສານສົມທົບກັນຢ່າງແໜ້ນແຟ້ນ ເພື່ອຮ່ວມກັນຊອກຫາຊ່ອງທາງຍົກລະດັບການຮ່ວມມືດ້ານເສດຖະກິດ-ການຄ້າ, ການພົວພັນດ້ານພັກ ແລະ ການທູດປະຊາຊົນ ລະຫວ່າງ ສອງປະເທດ ຕື່ມໃນຕໍ່ໜ້າ.
ທ່ານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ ທ່ານທູດ ຈົ່ງປະສົບຜົນສໍາເລັດ ໃນການປະຕິບັດໜ້າທີ່ການທູດຢູ່ ສປປ ລາວ ເພື່ອປະກອບສ່ວນຊຸກຍູ້ ແລະ ເພີ່ມພູນຄູນສ້າງສາຍພົວພັນສອງປະເທດ, ນໍາເອົາຜົນປະໂຫຍດຕົວຈິງມາສູ່ ປະຊາຊົນສອງຊາດ ລາວ-ອົດສະຕຣາລີ ກໍຄື ປະກອບສ່ວນເຂົ້າໃນພາລະກິດເສີມສ້າງສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20