ຫົວໜ້າຄະນະພົວພັນຕ່າງປະເທດສູນກາງພັກ ຢ້ຽມຢາມ ສປ ຈີນ ຢ່າງເປັນທາງການ

ເຜີຍ​ແຜ່​ໂດຍ​: editor ເວ​ລາ: 16/02/2024 11:25:17 ຈຳ​ນວນ​​ຢ້ຽມ​ຊົມ 289 ຄັ້ງ ​

        ໂດຍຕອບສະຫນອງຕາມການເຊື້້ອເຊີນ ຂອງ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ແລະ ປະຕິບັດຕາມແຜນການຮ່ວມມື ລະຫວ່າງ ສອງພັກ ແລະ ແຜນການຮ່ວມມື ສອງຄະນະພົວພັນຕ່າງປະເທດສູນກາງພັກ ລາວ-ຈີນ, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ນຳພາຄະນະຜູ້ແທນ ຄະນະພົວພັນຕ່າງປະເທດສູນກາງພັກ ປປ ລາວ ເດີນທາງຢ້ຽມຢາມ ສປ ຈີນ ຢ່າງເປັນທາງການ ແຕ່ວັນທີ 14-16 ຕຸລາ 2023.

        ໃນວັນທີ 15 ຕຸລາ 2023, ສະຫາຍ ທອງສະຫວັນ ພົມວິຫານ ໄດ້ພົບປະ ກັບ ສະຫາຍ ຫລິວ ຈ້ຽນຊາວ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ທີ່ ນະຄອນຫລວງປັກກິ່ງ, ເຊິ່ງສອງຝ່າຍ ໄດ້ຕີລາຄາສູງ ຕໍ່ໝາກຜົນຂອງການພົວພັນຮ່ວມມື ລະຫວ່າງ ສອງພັກ, ສອງປະເທດ ກໍຄື ລະຫວ່າງ ສອງຄະນະພົວພັນຕ່າງປະເທດສູນກາງພັກລາວ-ຈີນ ໃນໄລຍະຜ່ານມາ, ໄດ້ແລກປ່ຽນຄຳຄິດເຫັນນຳກັນ ກ່ຽວກັບ ການເສີມຂະຫຍາຍສາຍພົວພັນຮ່ວມມື ລະຫວ່າງ ສອງພັກ, ສອງຄະນະພົວພັນຕ່າງປະເທດສູນກາງພັກ ແລະ ທັດສະນະ ກ່ຽວກັບບັນຫາສາກົນ ແລະ ພາກພື້ນ ທີ່ສອງຝ່າຍໃຫ້ຄວາມສົນໃຈ.

        ສອງຝ່າຍເຫັນດີເອກະພາບ ສືບຕໍ່ຮັດແຫນ້ນການປະສານທົບກັນ, ເຮັດຫນ້າທີ່ເປັນເສນາທິການໃຫ້ແກ່ສູນກາງພັກ, ຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ ແລະ ສອງຄະນະພົວພັນຕ່າງປະເທດສູນກາງພັກ ໃຫ້ເກີດດອກອອກຜົນ, ຢືນຢັນທີ່ຈະສືບຕໍ່ໃຫ້ການສະຫນັບສະຫນູນເຊິ່ງກັນແລະກັນ ແລະ ປະສານສົມທົບກັນຢ່າງໃກ້ຊິດໃນເວທີພາກພື້ນ ແລະ ສາກົນ, ພ້ອມກັນເປັນເຈົ້າການ ແລະ ເອົາໃຈໃສ່ຈັດຕັ້ງຜັນຂະຫຍາຍບັນດາເນື້ອໃນຈິດໃຈທີ່ການນຳສູງສຸດຂອງ ສອງພັກ, ສອງລັດ ໄດ້ຕົກລົງກັນຜ່ານມາ ເພື່ອສືບຕໍ່ເພີ່ມພູນຄູນສ້າງສາຍພົວພັນຄູ່ຮ່ວມມືຍຸດທະສາດຮອບດ້ານ ຫນັ້ນຄົງຍາວນານ ຕາມທິດ 4 ດີ ໃຫ້ເຂົ້າສູ່ລວງເລິກ ແລະ ຮ່ວມກັນສ້າງຄູ່ຮ່ວມຊະຕາກຳ ລາວ-ຈີນ ດ້ວຍມາດຕະຖານສູງ, ຄຸນນະພາບສູງ ແລະ ລະດັບສູງກວ່າເກົ່າ.

        ກ່ອນຫນ້ານັ້ນ ໃນວັນທີ 14 ຕຸລາ 2023 ຄະນະຜູ້ແທນ ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຢຸນນານ, ສປ ຈີນ ເຊິ່ງ ສະຫາຍ ທອງສະຫວັນ ພົມວິຫານ ໄດ້ພົບປະກັບ ສະຫາຍ ສື ຢູ້ກ່າງ, ກໍາມະການສຳຮອງສູນກາງພັກ, ຮອງເລຂາຄະນະພັກແຂວງ, ອະທິການບໍດີໂຮງຮຽນພັກແຂວງ, ອະທິການບໍດີໂຮງຮຽນການປົກຄອງແຂວງຢຸນນານ ເຊິ່ງສອງຝ່າຍ ໄດ້ພ້ອມກັນຕີລາຄາ ການຈັດຕັ້ງຜັນຂະຫຍາຍກົນໄກການຮ່ວມມືລະຫວ່າງ ສອງພັກ, ສອງຄະນະພົວພັນຕ່າງປະເທດສູນກາງພັກ ກໍຄື ມູນເຊື້ອມິດຕະພາບ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ກັບ ແຂວງຢຸນນານ ໃນໄລຍະຜ່ານມາ.

        ສອງຝ່າຍ ໄດ້ຕີລາຄາສູງ ຕໍ່ການພົວພັນຮ່ວມມື ແລະ ປະສານສົມທົບກັນ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ກັບ ແຂວງຢຸນນານ ໂດຍສະເພາະແມ່ນ ການຮັບປະກັນໃຫ້ແກ່ການເຄື່ອນໄຫວ ຂອງການນນຳສອງພັກ, ສອງປະເທດ ໃຫ້ໄດ້ຮັບຜົນສຳເລັດ; ຕີລາຄາກົນໄກການແລກປ່ຽນການຢ້ຽມຢາມໄປມາຫາສູ່ກັນ ລະຫວ່າງສອງຝ່າຍ, ການແລກປ່ຽນຄະນະວິຊາການ ແລະ ການຝຶກອົບຮົມດ້ານເຕັກນິກວິຊາການຕ່າງໆຂອງສອງຝ່າຍ, ເອກະພາບກັນ ສຶບຕໍ່ເພີ່ມທະວີການພົວພັນຮ່ວມມືສອງຝ່າຍ ກໍຄື ການຮັກສາການປະສານສົບກັນຢ່າງໃກ້ຊິດໃນຕໍ່ຫນ້າ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຈີນ ໃຫ້ນັບມື້ນັບຫລາຍຂຶ້ນ.

---