ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມອຳລາ ຂອງເອກອັກຄະລັດຖະທູດ ອົດສະຕຣາລີ ປະຈຳ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 15/02/2024 15:25:11 ຈຳ​ນວນ​​ຢ້ຽມ​ຊົມ 272 ຄັ້ງ ​

        ​​ໃນ​ຕອນ​ເຊົ້າຂອງ​ວັນ​ທີ 13 ທັນວາ 2023, ທີ່​ສຳນັກງານ​ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ທອງສະຫວັນ ພົມວິຫານ, ກໍາມະການ​ສູນ​ກາງ​ພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ປະຊາຊົນ ປະຕິວັດລາວ ​ໄດ້​ຕ້ອນຮັບການ​ເຂົ້າ​ຢ້ຽມ​ອຳ​ລາ​ຂອງ ​ທ່ານ ໂພຣ ແຄລີ, ​ເອກ​ອັກຄະ​ລັດຖະທູດ ວິສາມັນຜູ້ມີອໍານາດເຕັມ ​ແຫ່ງ ອົດສະຕຣາລີ ປະຈຳ ສປປ ລາວ ​ໃນ​ໂອກາດ​​ສຳ​ເລັດ​ການປະຕິບັດໜ້າ​ທີ່ການ​ທູດ ຢູ່ ສປປ ລາວ.

        ໃນ​ໂອກາດດັ່ງກ່າວ, ທ່ານ ທອງສະຫວັນ ພົມວິຫານ ​ໄດ້​ສະ​ແດງ​ຄວາມ​ຊົມ​ເຊີ​ຍ ​ແລະ ຕີ​ລາຄາ​ສູງ ​ຕໍ່ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ການ​ທູດ​ຢູ່ ສປປ ລາວ ຂອງ ​ທ່ານ ເອກອັກຄະລັດຖະທູດ, ເຊິ່ງເປັນ​ການ​ປະກອບສ່ວນ​ອັນ​ສຳຄັນ ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ ​ແລະ ການ​ຮ່ວມ​ມື​ ລະຫວ່າງ ລາວ-​ອົດສະຕຣາລີ, ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.​

        ທ່ານ ທອງສະຫວັນ ພົມວິຫານ ​ໄດ້​ຕີ​ລາຄາ​ສູງ ​ຕໍ່ສາຍພົວພັນການຮ່ວມມື ລາວ-ອົດສະຕຣາລີ ໃນຕະຫຼອດໄລຍະຜ່ານມາ, ໂດຍສະເພາະໃນໄລຍະທ່ານ ເອກອັກຄະລັດຖະທູດປະຕິບັດໜ້າທີ່ ຢູ່ ສປປ ລາວ, ອັນໄດ້ເຮັດໃຫ້ການພົວພັນສອງຝ່າຍໄດ້ຮັບການຂະຫຍາຍຕົວຢ່າງຕໍ່ເນື່ອງ, ໂດຍສະເພາະ ການພົວພັນການທູດສອງຝ່າຍ ກໍ່ຢູ່ໃນໄລຍະກະກຽມຍົກລະດັບເປັນຄູ່ຮ່ວມມືແບບກວມລວມ ໃນປີ 2024 ແລະ ໃນການພົວພັນການທູດປະຊາຊົນສອງຝ່າຍກໍ່ໄດ້ຕົກລົງສ້າງຕັ້ງສະມາຄົມມິດຕະພາບ ລາວ-ອົດສະຕຣາລີ ແລະ ອົດສະຕຣາລີ-ລາວ ແລ້ວ ປັດຈຸບັນທັງສອງຝ່າຍກໍາລັງແຕ່ງຕັ້ງຄະນະບໍລິຫານງານສະມາຄົມຕາມຂັ້ນຕອນພາຍໃນຂອງແຕ່ລະຝ່າຍ. ພ້ອມນັ້ນ, ທັງສອງຝ່າຍກໍ່ຍັງສືບຕໍ່ໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ທັງໃນຂອບສອງຝ່າຍ, ຫຼາຍຝ່າຍ ໃນພາກພື້ນ ແລະ ສາກົນ.

        ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ຍັງໄດ້ຕີລາຄາສູງ ຕໍ່ບົດບາດ ແລະ ການປະກອບສ່ວນຂອງເອກອັກຄະລັດຖະທູດ ໃນການເປັນຂົວເຊື່ອມມິດຕະພາບອັນດີ ລະຫວ່າງ 2 ປະເທດ, ກໍ່ຄື ການຊຸກຍູ້ການໄປມາຫາສູ່ກັນຂອງປະຊາຊົນ 2 ຊາດ, ລວມທັງຊຸກຍູ້ລັດຖະບານອົດສະຕຣາລີ ຊ່ວຍເຫຼືອໃນດ້ານຕ່າງໆໃຫ້ແກ່ ສປປ ລາວ ໃນຜ່ານມາ, ເປັນຕົ້ນການຊ່ວຍເຫຼືອດ້ານການສຶກສາ, ສາທາລະນະສຸກ, ກະສິກໍາ, ສິ່ງແວດລ້ອມ, ການຊ່ວຍເຫຼືອດ້ານມະນຸດສະທໍາ ແລະ ອື່່ນໆ, ເຊິ່ງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ການພັດທະນາຊັບພະຍາກອນມະນຸດຂອງ ສປປ ລາວ.

         ທ່ານ ໂພຣ ແຄລີ ໄດ້​ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ມາຍັງ ທ່ານ ທອງສະຫວັນ ພົມວິຫານ ທີ່ໄດ້ໃຫ້ການ​ຕ້ອນຮັບ​ອັນ​ອົບອຸ່ນ ​ໃນ​ໂອກາດ​ເຂົ້າ​ຢ້ຽມ​ອຳ​ລາ​ໃນ​ຄັ້ງ​ນີ້ ແລະ ສະ​ແດງ​ຄວາມຂອບ​ໃຈ​ຕໍ່​ ລັດຖະບານ ສປປ ລາວ ​ກໍຄື ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ທີ່​ໄດ້​ໃຫ້ການ​ຮ່ວມ​ມືສະໜັບສະໜູນ ຊ່ວຍເຫຼືອ ແລະ ອຳນວຍ​ຄວາມ​ສະດວກ​ ໃນ​ການ​ປະຕິບັດ​ໜ້າ​ທີ່​ການ​ທູດ​ຂອງ​ຕົນ ຢູ່ ສປປ ລາວ ໃນໄລຍະ​​ຜ່ານ​ມາ, ​ອວຍພອນ ຫົວໜ້າຄະນະພົວພັນຕ່າງປະເທດສູນກາງພັກ ພ້ອມ​ດ້ວຍຄະນະ​ນຳ ​ແລະ ພະນັກງານ​​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ຈົ່ງມີ​ສຸຂະພາບ​​ເຂັ້ມ​ແຂງ, ມີ​ພາລະ​ນາ​ໄມ​ສົມ​ບູນ ​ແລະ ປະສົບ​ຜົນສຳ​ເລັດ​ໃນ​ໜ້າ​ທີ່​ອັນ​ມີ​ກຽດ​​ທຸກ​ປະການ. ພ້ອມທັງໄດ້ຢືນຢັນວ່າ, ພາຍຫຼັງກັບຄືນປະເທດ ຍັງຈະສືບຕໍ່ປະກອບສ່ວນເຫື່ອແຮງເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນ ລາວ-ອົດສະຕຣາລີ ໃຫ້ສືບຕໍ່ໄດ້ຮັບຂະຫຍາຍຕົວໃນຕໍ່ໜ້າ.

​        ໃນ​ໂອກາດ​ນີ້, ທ່ານ​ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ໄດ້​ອວຍພອນ​ສາຍພົວພັນການຮ່ວມມື ລາວ-ອົດສະຕຣາລີ ຈົ່ງສືບຕໍ່ໄດ້ຮັບການເພີ່ມພູນຄູນສ້າງ ແລະ ງອກງາມຍິ່ງຂຶ້ນ, ອວຍພອນໃຫ້​ທ່ານທູດອົດສະຕຣາລີ ​ຈົ່ງມີ​ພາລະ​ນາ​ໄມ​ສົມບູນ ແລະ ເດີ​ນທາງ​ກັບ​ຄືນ​ປ​ະ​ເທດ​ດ້ວຍ​ຄວມສະ​ຫວັດ​ດີ​ພາບທຸກປະການ.

---