ຄະນະນໍາ ຄະນະພົວພັນຕ່າງປະເທດສູນກາງພັກ ເຂົ້າອວຍພອນ ສະຖານເອກອັກຄະລັດຖະທູດແຫ່ງ ສສ ຫວຽດນາມ ປະຈໍາ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 01/02/2024 08:17:37 ຈຳ​ນວນ​​ຢ້ຽມ​ຊົມ 286 ຄັ້ງ ​

      ເນື່ອງໃນໂອກາດ ວັນສ້າງຕັ້ງພັກກອມມູນິດຫວຽດນາມ ຄົບຮອບ 94 ປີ (3/2/1930–3/2/2024) ແລະ ບຸນ​ປີ​ໃໝ່​ປະ​ຈຳ​ຊາດ​ຫວຽດ​ນາມ, ໃນຕອນເຊົ້າຂອງວັນທີ  31 ມັງ​ກອນ 2024, ສະ​ຫາຍ ວາ​ລະ​ໄຊ ເລັ່ງ​ສະ​ຫວັດ, ຮອງຫົວໜ້າ ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ນຳ​ພາ​ຄະ​ນະ​ເຂົ້າອວຍ​ພອນ ສະ​ຫາຍ​ເອກ​ອັກ​ຄະ​ລັດ​ຖະ​ທູດ ຫງວຽນ​ບ໋າ​ຮຸ່ງ ແລະ ພະນັກງານສະຖານທູດ ແຫ່ງ ສສ ຫວຽດນາມ ປະຈໍາ ສປປ ລາວ.

       ໃນ​ໂອ​ກາດ​ດັ່ງ​ກ່າວ, ສະ​ຫາຍ ວາ​ລະ​ໄຊ ເລັ່ງ​ສະ​ຫວັດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສຳເລັດອັນໃຫຍ່ຫຼວງ ແລະ ຮອບດ້ານ ທີ່ ປະຊາຊົນຫວຽດນາມອ້າຍນ້ອງຍາດມາໄດ້ ພາຍໃຕ້ການນຳພາອັນຖືກຕ້ອງ ແລະ ສະຫຼາດສ່ອງໃສຂອງພັກກອມມູນິດຫວຽດນາມ ໃນຕະຫຼອດໄລຍະທີ່ຜ່ານມາ, ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງ​ຄົມ​ມີຄວາມ​ເປັນ​ລະ​ບຽບ​ຮຽບ​ຮ້ອຍ, ການປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ພື້ນຖານເສດຖະກິດມີ​ຄວາມເປັນເອກະລາດ, ເປັນເຈົ້າຕົນເອງ, ມີການຂະຫຍາຍຕົວຢ່າງ​ຕໍ່​ເນື່ອງ ແລະ ເພີ່ມ​ສູງ​ຂຶ້ນ, ຊີວິດການເປັນຢູ່ຂອງປະຊາຊົນ ໄດ້ຮັບການປັບ​ປຸງ​ດີ​ຂຶ້ນເປັນກ້າວໆ, ການພົວພັນຮ່ວມມືກັບຕ່າງປະເທດໄດ້ຮັບການເປີດກວ້າງ, ຖາ​ນະບົດບາດອິດທິພົນຂອງ ພັກກອມມູນິດຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ.

     ສະຫາຍ ວາ​ລະ​ໄຊ ເລັ່ງ​ສະ​ຫວັດ ໄດ້ສະແດງຄວາມພາກພູມໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລາວ-ຫວຽດນາມ ທີ່ໄດ້ຮັບການກໍ່ຕັ້ງໂດຍ ປະທານ ໂຮ່ຈິມິນ ຜູ້​ຍິ່ງ​ໃຫຍ່, ປະທານ ໄກສອນ ພົມວິຫານ, ປະທານ ສຸພານຸວົງ ທີ່ແສນເຄົາລົບຮັກ ແລະ ສືບຕໍ່ໄດ້ຮັບການຖະນຸຖະໜອມ ແລະ ​ເພີ່ມ​ພູນ​ຄູນ​ສ້າງ ຈາກບັນດາຮຸ່ນການນຳຂອງສອງປະເທດ ໂດຍຜ່ານການທົດສອບບົນແປວໄຟປະຕິວັດ ເປັນເວລາຫຼາຍທົດສະວັດນັ້ນ ໄດ້ກາຍເປັນມໍລະດົກອັນລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ, ເປັນໜຶ່ງໃນປັດໄຈຕັດສິນໄຊຊະນະ ຂອງການປະຕິວັດ ໃນແຕ່ລະປະເທດ, ເຊິ່ງມາເຖິງປັດຈຸບັນຍິ່ງ​ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍເຂົ້າສູ່ລວງເລິກໃນທຸກຂົງເຂດວຽກງານ ແລະ ແຕກດອກອອກຜົນຢ່າງບໍ່ຢຸດຢັ້ງ, ນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຫວຽດນາມ, ພ້ອມ​ທັງ​ຢືນ​ຢັນ​ວ່າ​ຈະ​ຮ່ວມ​ກັບສະ​ຫາຍຫວຽດ​ນາມພ້ອມກັນສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີພິເສດ ລາວ-ຫວຽດນາມ ໃຫ້ໝັ້ນຄົງ ແລະ ເກີດດອກອອກຜົນຍິ່ງໆຂຶ້ນຕະຫຼອດໄປ, ປະກອບສ່ວນເຂົ້າໃນພາລະກິດ ເສີມສ້າງສັນຕິພາບ, ມິດຕະພາບ, ການຮ່ວມມື ແລະ ການພັດທະນາ ໃນພາກພື້ນ ແລະ ໃນໂລກ.

        ໃນ​ໂອ​ກາດດັ່ງກ່າວ, ສະ​​ຫາຍເອກ​ອັກ​ຄະ​ລັດ​ຖະ​ທູດ ຫງວຽນບ໋າຮຸ່ງ ໄດ້​ສະ​ແດງ​ຄວາມ​ຂອບ​ໃຈ ​ຕໍ່ສະ​ຫາຍ ວາ​ລະ​ໄຊ ເລັ່ງ​ສະ​ຫວັດ ທີ່​ໄດ້​ນຳ​ພາ​ຄະ​ນະມາ​ອວຍ​ພອນ​ໃນ​ຄັ້ງ​ນີ້, ​ພ້ອມ​ທັງຕີ​ລາ​ຄາ​ສູ​ງຕໍ່ການພົວພັນຮ່ວມມື ລະຫວ່າງ ພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວ ທີ່ນັບມື້ນັບກ້າວເຂົ້າສູ່ລວງເລິກ​ຢ່າງ​ບໍ່​ຢຸດ​ຢັ້ງ ແລະ ເປັນພື້ນຖານອັນສຳຄັນ ໃຫ້ແກ່ການພົວພັນຮ່ວມມືໃນຂົງເຂດຕ່າງໆ ລະຫວ່າງ ສອງປະເທດ ກໍ່ຄືຕີລາຄາສູງຕໍ່ການຮ່ວມມືປະສານສົມທົບຢ່າງແໜ້ນແຟ້ນ ລະຫວ່າງ ສະຖານທູດຫວຽດນາມ ​ກັບ ຄະນະພົວພັນຕ່າງປະເທດສູນກາງ ພັກ ປປ ລາວ ໃນການເປັນຂົວຕ່ໍ່, ເປັນເສນາທິການໃຫ້ແກ່ສອງພັກ, ອັນໄດ້ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດ​ຕະ​ພາ​ບ​ອັນ​ຍິ່ງ​ໃຫຍ່, ຄວາມສາມັກຄີ​ແບບ ພິເສດ ລາວ-ຫວຽດນາມ; ຊົມເຊີຍບັນດາ​ຜົນ​ສຳ​ເລັດ​ຂອງ​ ພັກ, ລັດລາວ ​ພາຍ​ໃຕ້​ການ​ນຳ​ພາ​ຂອງ ​ພັກປະ​ຊາ​ຊົນ ປະ​ຕິ​ວັດ​ລາວ ທີ່ຍາດມາໄດ້ໃນການສ້າງສາ ພັດທະນາປະເທດຊາດ ແລະ ຍິນດີສືບຕໍ່ປະສານສົມທົບຢ່າງແໜ້ນແຟ້ນກັບ ຄະນະພົວພັນຕ່າງປະເທດສູນກາງ ພັກ ປປ ລາວ ໃນການຊຸກຍູ້ການຈັດຕັ້ງຜັນຂະຫຍາຍ ບັນດາຂໍ້ຕົກລົງຂອງ ການນໍາຂັ້ນສູງສອງພັກ, ສອງລັດ ກໍ່​ຄື ສອງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ລາວ-ຫວຽດນາມ ໃຫ້ບັນລຸຕາມເປົ້າໝາຍ, ມີປະສິດທິຜົນສູງ, ປະກອບສ່ວນເຂົ້າໃນການເພີ່ມພູມຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

       ສະ​ຫາຍ ວາ​ລະ​ໄຊ ເລັ່ງ​ສະ​ຫວັດ ຕາງ​ໜ້າ​ຄະ​ນະ​ພັກ, ຄະ​ນະ​ນຳ ຄະ​ນະ​ພົວ​ພັນ​ຕ່າງ​ປະ​ເທ​ດ​ສູນ​ກາງ​ພັກ ໄດ້​ກ່າວອວຍ​ພອນ​ສະ​ຫາຍ ຫງວຽນບ໋າຮຸ່ງ, ເອກ​ອັກ​ຄະ​ລັດ​ຖະ​ທູດ​ວິ​ສາ​ມັນ​ຜູ້​ມີ​ອຳ​ນາດ​ເຕັມ​ ສ​ສ ຫວຽດ​ນາມ ປະ​ຈຳ ສ​ປ​ປ ລາວ, ພະ​ນັກ​ງານ​ສະ​ຖານ​ທູດ ແລະ ຫ້ອງ​ການ​ຜູ້​ຕາງ​ໜ້າ​ຫວຽດ​ນາມ ປະ​ຈຳລາວ ຈົ່​ງ​ມີ​ສຸ​ຂະ​ພາບ​ເຂັ້ມ​ແຂງ, ມີ​ຄວາມ​ຜາ​ສຸກ, ປະ​ສົບ​ຜົນ​ສຳ​ເລັດ​ໃນ​ໜ້າ​ທີ່​ວຽກ​ງານ ອັນ​ມີ​ກຽດ​ຂອງ​ຕົນ ແລະ ຕ້ອນ​ຮັບ​ປີ​ໃໝ່​ຫວຽດ​ນາມ ດ້ວຍ​ຄວາມ​ເບີກ​ບານ​ມ່ວນ​ຊື່ນ ແລະ ມີ​ຄວາມ​ສຸກ​ຈະ​ເລີນ​ຕະຫຼອດ​ໄປ.

        ໃນໂອກາດດັ່ງກ່າວ, ສະຫາຍ ວາ​ລະ​ໄຊ ເລັ່ງ​ສະ​ຫວັດ ຍັງໄດ້ສົ່ງຜ່ານ​ສະ​ຖານ​ທູດ ສານອວຍພອນ​ວັນ​ສ້າງ​ຕັ້ງ ພັກ​ກອມ​ມູ​ນິດ​ຫວຽດ​ນາມ ຄົບ​ຮອບ 94 ປີ ແລະ ອວຍ​ພອນ ປີ​ໃໝ່ ປະ​ຈຳ​ຊາດ ຫວຽດ​ນາມ ຈາກ ຄະນະບໍລິຫານງານສູນກາງພັກ ປປ ລາວ ເຖິງ ຄະນະບໍລິຫານງານສູນກາງພັກກອມມູນິດຫວຽດນາມ ແລະ ສານອວຍພອນ ຈາກ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ເຖິງ ຫົວໜ້າຄະນະພົວພັນຕ່າງປະເທດສູນກາງ ພັກກອມມູນິດຫວຽດນາມ.

---