ກອງປະຊຸມສະຫຼຸບການເຄື່ອນໄຫວວຽກງານຕ່າງປະເທດ ປະຈຳປີ 2023, ທິດທາງແຜນການ ປີ 2024 ແລະ ພິທີຍ້ອງຍໍຜົນງານຂອງຄະນະພົວພັນຕ່າງປະເທດສູນກາງພັກ

ເຜີຍ​ແຜ່​ໂດຍ​: editor ເວ​ລາ: 26/01/2024 14:37:39 ຈຳ​ນວນ​​ຢ້ຽມ​ຊົມ 273 ຄັ້ງ ​

        ໂດຍປະຕິບັດຕາມແຜນການປະຈໍາປີ 2023, ໃນຕອນເຊົ້າ​ ຂອງ ວັນທີ 12 ທັນ​ວາ 2023 ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຂອງຕົນໃນໄລ​ຍະ 1 ປີ ຜ່ານ​ມາ ແລະ ການ​ຍ້ອງ​ຍໍ​ປະ​ຈຳ​ປີ​ຂອງຕົນ, ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ຕິ່ງ ສຸກສັນ, ຮອງເລຂາຄະນະພັກ, ຮອງລັດຖະມົນຕີກະຊວງການຕ່າງປະເທດ ແລະ ມີຄະ​ນະ​ພັກ-ຄະນະນໍາ, ຄະນະກົມຈາກຄະນະພົວພັນຕ່າງປະເທດສູນກາງພັກ ແລະ ກະຊວງການຕ່າງປະເທດ, ພະນັກງານອາວຸໂສບໍານານ, ຜູ້ໃຫ້ການສະໜັບສະໜູນໃນການຈັດງານສະເຫຼີມສະຫຼອງ ຄຕພ ຄົບຮອບ 40 ປີ ຕະຫຼອດ​ເຖິງ ພະນັກງານສະ​ມາຊິ​ກ​ພັກທົ່ວຄະນະ ພົວພັນຕ່າງປະເທດສູນກາງພັກ ແລະ ແຂກ​ຖືກ​ເຊີນ ເຂົ້າຮ່ວມ.

        ກອງປະຊຸມໄດ້ຮັບ​ຟັງ​ການສະຫຼຸບຕີ​ລາ​ຄາ ກ່ຽວກັບ ການປະ​ຕິ​ບັດ​ວຽກ​ງານຂອງ ຄະນະພົວພັນຕ່າງປະເທດສູນກາງພັກ ໃນໄລຍະ 1 ປີ ຜ່ານ​ມາ, ໂດຍ​ໄດ້​ຍົກ​ໃຫ້​ເຫັນ​ຜົນ​ງານ​ທີ່​ຍາດ​ມາ​ໄດ້, ບາງດ້ານທີ່ຄົງຄ້າງ, ບົດຮຽນທີ່ຖອດຖອນໄດ້, ທິດທາງແຜນການ​ສຳ​ລັບ​ປີ 2024; ປະ​ກາດ​ເລື່ອນ​ຕຳ​ແໜ່​ງບໍ​ລິ​ຫານຂັ້ນພະ​ແນກ, ພ້ອມ​ທັງ​ຍ້ອງ​ຍໍພ​ະນັກ​ງານ​ພາຍ​ໃນຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ທີ່ມີ​ຜົນ​ງານ​ດີ​ເດັ່ນໃນການຈັດຕັ້ງປະຕິບັດໜ້າທີ່ຕະຫຼອດປີ 2023 ແລະ ບັນ​ດາ​ຜູ້​ສະ​ໜັບ​ສະ​ໜູນ​ໃນ​ການຈັດ​​ພິ​ທີ​ສະ​ເຫຼີມ​ສະຫຼອງວັນ​ສ້າງ​ຕັ້ງຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ຄົບ​ຮອບ 40 ປີ ເຊິ່ງໄດ້ຈັດຂຶ້ນໃນເດືອນສິງຫາ ທີ່ຜ່ານມາ.

        ໃນກອງ​ປະ​ຊຸມ​ດັ່ງ​ກ່າວ, ສະ​ຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະ​ນະບໍ​ລິ​ຫານ​ງານພັກ, ຫົວໜ້າຄະນະພົວພັນຕ່າງປະເທດສູນກາງ ​ໄດ້​ໃຫ້​ກຽດໂອ້​ລົ​ມ ໂດຍ​ໄດ້ສະແດງຄວາມຊົມເຊີຍຕໍ່ ບັນດາຜົນສຳເລັດ ແລະ ຜົນ​ງານທີ່ພະນັກງານຄະນະພົວພັນຕ່າງປະເທດສູນກາງພັກ ຍາດມາໄດ້ໃນຕະຫຼອດ ໄລຍະ 1 ປີ ຜ່ານມາ, ໂດຍ​ສະ​ເພາະ​ແມ່ນ​ ການເຮັດ​ສຳ​ເລັດ​ພາ​ລະ​ບົດ​ບາດ ເປັນ​ເສ​ນາ​ທິ​ການ​ໃຫ້​ແກ່ສູນ​ກາງ​ພັກ ໃນ​ການເຄື່ອນໄຫວຕ່າງປະເທດດ້ານພັກ ແລະ ການທູດປະຊາຊົນ ອັນ​ໄດ້​ເຮັດ​ໃຫ້​ບົດ​ບາດ​ອິດ​ທິ​ພົນ​ຂອງ ​ພັກ-ລັດ​ ເຮົາໄດ້​ຮັບ​ການ​ຍົກ​ສູງໃນ​ເວ​ທີ​ພາກ​ພື້ນ ແລະ ສາກົນ; ການຈັດຕັ້ງປະຕິບັດວຽກງານໃນປີ 2023 ເຖິງຈະຢູ່ທ່າມກາງສະພາບການພາກພື້ນ ແລະ ສາກົນມີຄວາມຫຍຸ້ງຍາກສັບສົນ ບວກກັບຄວາມ​ຫຍຸ້ງ​ຍາກ​ຕ່າງໆພາຍໃນປະເທດເຮົາ ແຕ່ກໍ່​ໄດ້​ຫາ​ວິ​ທີ​ການ​ເໝາະ​ສົມ​ໃນ​ການ​ເສີ​ມ​ຂະ​ຫຍາຍ​ການ​ພົວ​ພັນລະ​ຫວ່າງ​ພັກ​ເຮົາ​ກັບ​ຕ່າງ​ປະ​ເທດ ໂດຍຍຶດໜັ້ນແນວທາງການຕ່າງປະເທດຂອງພັກ, ເປັນເຈົ້າການຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດບັນດາຂໍ້ຕົກລົງຮ່ວມມືກັບພັກເພື່ອນມິດຍຸດທະສາດ ໃຫ້ປະສິດທິຜົນ. ພິເສດ ໃນປີ 2023 ຄະນະພົວພັນຕ່າງປະເທດສູນກາງພັກ ໄດ້ສໍາເລັດການຈັດກອງປະຊຸມກາງ​ສະ​ໄໝສະມາຊິກພັກ ຄັ້ງທີ II ຂອງ ອົງຄະນະພັກ ຂອງຕົນຢ່າງຈົບງາມ; ພ້ອມທັງໄດ້ມີຄໍາເຫັນ ຊີ້ນໍາໃຫ້ພະນັກງານສະມາຊິກພັກ ຄຕພ ທຸກຖ້ວນໜ້າສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ II ຂອງ ອົງຄະນະພັກ ຄຕພ ແລະ ແຜນພັດທະນາ ຄຕພ ແຕ່ປີ 2021-2025 ໃຫ້ແຕກດອກອອກຜົນຍິ່ງໆຂຶ້ນ, ເອົາໃຈໃສ່ພັດທະນາຕົນເອງທາງດ້ານການເມືອງ-ແນວຄິດ, ວິຊາສະເພາະ ແລະ ພາສາຕ່າງປະເທດ, ສືບຕໍ່ກໍ່ສ້າງ ແລະ ຮັກສານາມມະຍົດໜ່ວຍພັກປອດໃສ, ເຂັ້ມແຂງ, ໜັກແໜ້ນຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ.

        ໃນໂອກາດດັ່ງກ່າວ, ສະຫາຍ ຫົວໜ້າ ຄຕພ ຍັງໄດ້ໃຫ້ຄຳໂອວາດຕໍ່ພະນັກງານ ທີ່ໄດ້ເລື່ອນຕຳແໜ່ງບໍລິຫານ, ພ້ອມທັງໄດ້ສະແດງຄວາມຂອບໃຈ ຢ່າງຈິງໃຈຕໍ່ພາກສ່ວນບຸກຄົນ ແລະ ນິຕິບຸກຄົນທີ່ໃຫ້ການສະໜັບສະໜູນ ໃນການຈັດງານສະເຫຼີມສະຫຼອງວັນສ້າງຕັ້ງ ຄຕພ ຄົບຮອບ 40 ປີທີ່ຜ່ານມາ.

       ໃນ​ຕອນ​ທ້າຍ, ສະ​ຫາຍ ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ​ດ້ວຍ​ຈິດ​ໃຈ​ມາ​ນະ​ບຸກ ບືນ, ຄວາມ​ສາ​ມັກ​ຄີ​ເປັ​ນ​ເອກ​ະ​ພາບ​ພາຍ​ໃນ ຈະ​ເຮັດ​ໃຫ້​ການ​ປະ​ຕິ​ບັດ​ໜ້າ​ທີ່​ ຂອງ ຄະນະພົວພັນຕ່າງປະເທດສູນກາງພັກ ​ສືບ​ຕໍ່​ຍາດ​ໄດ້​ຜົ​ນ​ສຳ​ເລັດໃຫຍ່ກວ່າ​ເກົ່າ ໃນການເຄື່ອນໄຫວວຽກງານຕ່າງປະເທດຂອງພັກເພື່ອສືບ​ຕໍ່​ສ້າງ​ສະ​ພາບ​ແວດ​ລ້ອມ​​ທີ່​ອໍານວຍຄວາມສະ​ດວກ​ໃຫ້​ແກ່​ການ​ປົກ​ປັກ​ຮັກ​ສາ ແລະ ສ້າງ​ສາ​ປະ​ເທດ​ຊາດ​ໃນ​ຕໍ່​ໜ້າ.

---