ຄະນະພົວພັນຕ່າງປະເທດສູນກາງພັກ ຈັດປາຖະກະຖາ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ວັນເກີດປະທານ ຄຳໄຕ ສີພັນດອນ ຄົບຮອບ 100 ປີ

ເຜີຍ​ແຜ່​ໂດຍ​: editor ເວ​ລາ: 19/01/2024 11:25:48 ຈຳ​ນວນ​​ຢ້ຽມ​ຊົມ 259 ຄັ້ງ ​

        ໃນວັນທີ 18 ມັງກອນ 2023, ຄະນະພົວພັນຕ່າງປະເທດສູນກາງພັກ (ຄ​ຕ​ພ) ໄດ້ຈັດກອງ​ປະ​ຊຸມເຜີຍແຜ່​ເອ​ກະ​ສານ ວັນ​ສ້າງ​ຕັ້ງ​ກອງ​ທັບ​ປະ​ຊາ​ຊົນ​ລາວ ຄົບ​ຮອບ 75 ປີ (20 ມັງກອນ 1949-20 ມັງກອນ 2024) ແລະ ວັນ​ເກີ​ດ​ປະ​ທານ ຄຳ​ໄຕ ສີ​ພັນ​ດອນ ຄົບ​ຮອບ 100 ປີ (08 ກຸມພາ 1924-08 ກຸມພາ 2024) ​ມີ​ບັນ​ດາ​ຄະ​ນະ​ພັກ, ຄະ​ນະ​ກົມ, ພະ​ແນກ ແລະ ພະ​ນັກ​ງານ​ທົ່ວ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ເຂົ້າ​ຮ່ວມ.

        ການປາຖະກະຖາຄັ້ງນີ້ ໄດ້ເຊື້ອເຊີນເອົາ ສະຫາຍ ​ພົ.ວ ຜາ​ລົມ ລິນ​ທອງ, ​ອະ​ດີດກຳ​ມະ​ການຄະ​ນະ​ປະ​ຈຳ​ພັກ​ກະ​ຊວງ​ປ້ອງ​ກັນ​ປະ​ເທດ, ອະ​ດີດ​ຮອງ​ຫົວ​ໜ້າ​ກົມ​ໃຫຍ່​ການ​ເມືອງກອງ​ທັບ, ​ປະ​ທານສະ​ຫະ​ພັນ​ນັກ​ຮົບ​ເກົ່າ​ນະ​ຄອນ​ຫຼວງ​ວຽງ​ຈັນ ມາໃຫ້ກຽດເຜີຍແຜ່ ເຊິ່ງ ສະຫາຍ ໄດ້ຍົກເຫັນເຖິງ ສະພາບແວດລ້ອມກ່ອນການສ້າງຕັ້ງກອງທັບ, ການກຳເນີດ, ຄວາມຈຳເປັນພາວະວິໄສ ແລະ ຄວາມສຳຄັນຂອງການສ້າງຕັ້ງກອງທັບປະຊາຊົນລາວ, ເຊິ່ງກາ​ນ​ສ້າງ​ຕັ້ງກອງ​ທັບ​ປະ​ຊາ​ຊົນ​ລາວ ​ເປັນ​ເຫດ​ການ​ປະ​ຫວັດ​ສາດ​ໜຶ່ງ​ທີ່​ສຳ​ຄັນ, ເປັນ​ບາດ​ກ້າວ​ແຫ່ງ​ການ​ຂະ​ຫຍາຍ​ຕົວ​ຂອງ​ການ​ປະ​ຕິ​ວັດ, ແມ່ນ​ບາດ​ກ້າວ​ເຕີບ​ໃຫຍ່​ເຂັ້ມ​ແຂງ​ຂອງ​ກຳ​ລັງ​ປະ​ກອບ​ອາ​ວຸດ​ປະ​ຕິ​ວັດ ແລະ ເປັນ​ກຳ​ລັງ​ຫຼັກ​ແຫຼ່ງ​ໃຫ້​ຂະ​ບວນ​ການ​ຕໍ່​ສູ້​ຂອງ​ປະ​ຊາ​ຊົນ​ລາວ​ເພື່ອ​ຄວາມ​ເປັນ​ເອ​ກະ​ລາດ​ແຫ່ງ​ຊາດ. ຕະຫຼອດໄລຍະ 75 ປີ ກອງ​ທັບໄດ້ຕັ້ງໜ້າປຸກລະດົມທົ່ວປວງຊົນເຂົ້າຮ່ວມວຽກງານ ປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວປະເທດ ມີຄວາມສະຫງົບຢ່າງໜັກແໜ້ນ ດ້ວຍຍຸດທະສາດ ຫັນລົງກໍ່ສ້າງຮາກຖານການເມືອງ ສ້າງທ່າສະໜາມປ້ອງກັນຊາດ-ປ້ອງກັນຄວາມສະຫງົບ 3 ຂັ້ນທົ່ວປວງຊົນຮອບດ້ານ ຕິດພັນກັບວຽກງານ 3 ສ້າງ ແລະ ແກ້ໄຂໜໍ່ແໜງ ຄວາມບໍ່ສະຫງົບໃຫ້ເດັດຂາດ ແລະ ທັນກັບຄວາມຮຽກຮ້ອງຕ້ອງການ ຂອງສະພາບການໃໝ່. ກອງທັບປະຊາຊົນລາວ ໄດ້ເປັນກຳລັງຫຼັກແຫຼ່ງໃນການປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ເຮັດໃຫ້ປະເທດຊາດ ໄດ້​ຮັບ​ການ​ປົດ​ປ່ອຍ, ມີ​ເອ​ກະ​ລາດ, ອຳ​ນາດ​ອະ​ທິ​ປະ​ໄຕ ແລະ ຜືນ​ແຜ່ນ​ດິນ​ອັນ​ຄົບ​ຖ້ວນ. ຍ້ອນຜົນງານ ແລະ ການ​ເສຍ​ສະ​ຫຼະ​ເລືອດ​ເນື້ອອັນຍິ່ງໃຫຍ່ຂອງກອງທັບທີ່ຍາດມາໄດ້ນັ້ນ ພັກ-ລັດຖະບານ ຈຶ່ງໄດ້ຕົກລົງມອບຫຼຽນຄຳແຫ່ງຊາດ ຊຶ່ງເປັນຫຼຽນສູງສຸດຂອງຊາດລາວ ໃຫ້ແກ່ກອງທັບປະຊາຊົນລາວ ຈຳນວນ 5 ໜ່ວຍ, ມອບນາມມະຍົດໃຫ້ແກ່ກອງພັນວິລະຊົນ 07 ກອງພັນ, ກອງຮ້ອຍວິລະຊົນ 37 ກອງຮ້ອຍ, ວິລະຊົນແຫ່ງຊາດ 68 ສະຫາຍ ແລະ ນັກຮົບແຂ່ງຂັນ 415 ສະຫາຍ.

        ຫຼັງຈາກນັ້ນ ສະຫາຍ ສະຫາຍ ​ພົ.ວ ຜາ​ລົມ ລິນ​ທອງ ກໍ່ໄດ້ຍົກໃຫ້ເຫັນເຖິງຊີວິດການກໍາເນີດ ແລະ ການເຕີບໃຫຍ່ໃນແປວໄຟແຫ່ງການປະຕິວັດ ຂອງ ປະທານ ຄຳໄຕ ສີພັນດອນ, ແບບແຜນຊີ້ນຳ-ນຳພາ, ການອຸທິດຕົນຢ່າງສຸດກົກສຸດປາຍ ເພື່ອປະເທດຊາດ, ເພື່ອປະຊາຊົນ, ເພື່ອຄວາມມັ່ງຄັ່ງເຂັ້ມແຂງ ແລະ ຄວາມຈະເລີນວັດທະນາຂອງປະເທດຊາດ, ເພື່ອຄວາມຢູ່ດີກິນດີ ແລະ ຄວາມຮັ່ງມີຜາສຸກຂອງປະຊາຊົນລາວບັນດາເຜົ່າ. ເພີ່ນເປັນ​ໜຶ່ງ​ໃນຜູ້ນໍາຮຸ່ນກໍໍ່ຕັັ້ງຂະບວນການ ແລະ ບຸກເບີກເສັ້ນທາງການປະຕິ ວັດຢູ່ປະເທດເຮົາ ຊຶ່ງຍາມໃດເພິ່ນກໍມີຄວາມໜັກແໜ້ນທາງດ້ານການເມືອງ, ມີສະຕິຕໍ່ການຈັດຕັັ້ງ, ມີຄວາມຮັບຜິດຊອບສູງຕໍ່ໜ້າທີີ່ມອບໝາຍ, ເລີີ່ມຈາກພະນັກງານທໍາມະດາກາຍເປັນຜູ້້ຊີ້ນໍາ-ບັນຊາ ແລະ ນໍາພາຂະບວນການຕໍ່ສູ້ປົດປ່ອຍຊາດ ຮ່ວມກັບປະທານ ໄກສອນ ພົມວິຫານ, ປະທານ ສຸພານຸວົງ ແລະ ທ່ານອື່ນໆ ຂອງແນວລາວສ້າງຊາດໄດ້ຮັບໄຊຊະນະ, ສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ ປີ 1975. ຫຼັງຈາກນັັ້ນ ເພີ່ນກໍໄດ້ສືບຕໍ່ປະກອບສ່ວນຄົ້ນຄວ້າ ແລະ ກໍານົດທິດທາງໜ້າທີີ່ຍຸດທະສາດ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງແນວທາງປ່ຽນແປງໃໝ່ອອກຢ່າງຖືກຕ້ອງ, ສອດຄ່ອງ ທັງໄດ້ສືບຕໍ່ນໍາພາ-ຊີ້ນໍາການຈັດຕັັ້ງປະຕິບັດ ໃຫ້ໄດ້ຮັບຜົນສໍາເລັດອັນສໍາຄັນຫຼາຍດ້ານ.

         ສະນັ້ນ, ພະ​ນັກ​ງານ-ສະມາຊິກພັກ ຈະ​ຕ້ອງກຳແໜ້ນ ແລະ ຮັບຮູ້​ຄວາມ​ພິ​ລະ​ອາດ​ຫານ ແລະ ຜົນງານອັນຍິ່ງໃຫຍ່ຂອງກອງທັບປະຊາຊົນລາວ ໃນພາລະກິດ ປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ ພ້ອມທັງຮຳຮຽນເອົາແບບຢ່າງອັນລ້ຳເລີດຂອງປະທານ ຄຳໄຕ ສີພັນດອນ  ເພື່ອນໍາໄປພັດທະ ນາຕົນເອງ ກໍຄືການໝູນໃຊ້ເຂົ້າໃນແບບແຜນການດຳລົງຊີວິດ ແລະ ການປະຕິບັດໜ້າທີ່ວຽກງານຕົວຈິງໃຫ້ມີປະສິດທິຜົນດີຂຶ້ນໄປເລື້ອຍໆ.

---