ຫົວຫນ້າຄະນະພົວພັນຕ່າງປະເທດສູນກາງພັກ ຕ້ອນຮັບຄະນະຜູ້ແທນພັກກອມມູນິດຈີນ
ເຜີຍແຜ່ໂດຍ: editor ເວລາ: 12/09/2023 08:35:28 ຈຳນວນຢ້ຽມຊົມ 201 ຄັ້ງ ໂດຍຕອບສະຫນອງຕາມຄຳເຊີນຂອງຫົວໜ້າຄະນະພົວພັນຕ່າງປະເທດສູນກາງພັກປະຊາຊົນປະຕິວັດລາວ, ຄະນະຜູ້ແທນຂັ້ນສູງຂອງຄະນະພົວພັນຕ່າງປະເທດສູນກາງພັກກອມມູນິດຈີນ ນຳໂດຍ ສະຫາຍ ຫຼິວ ຈ້ຽນຊາວ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ແຕ່ວັນທີ 6-8 ກັນຍາ 2023.
ໃນຕອນບ່າຍ ຂອງວັນທີ 07 ກັນຍາ 2023, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກ ກັບ ສະຫາຍ ຫລິວ ຈ້ຽນຊາວ ພ້ອມດ້ວຍຄະນະ ໃນໂອກາດດັ່ງກ່າວ.
ສະຫາຍ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ສປປ ລາວ ຂອງ ຄະນະຜູ້ແທນພັກກອມມູນິດຈີນ ໃນຄັ້ງນີ້ ເຊິ່ງເປັນການປະຕິບັດຕາມແຜນການຮ່ວມມື ລະຫວ່າງ ສອງພັກ ລາວ-ຈີນ ກໍຄື ແຜນການພົບປະແລກປ່ຽນປະຈຳປີ ລະຫວ່າງ ສອງ ຄະນະພົວພັນຕ່າງປະເທດສູນກາງພັກ ຂອງສອງສູນກາງພັກ ລາວ-ຈີນ; ເປັນຄະນະທຳອິດ ທີ່ມາຢ້ຽມຢາມລາວ ພາຍຫລັງການລະບາດຂອງພະຍາດໂຄວິດ-19 ແລະ ເປັນການຢ້ຽມຢາມ ສປປ ລາວ ຄັ້ງທໍາອິດ ຂອງ ສະຫາຍ ຫລິວ ຈ້ຽນຊາວ ພາຍຫຼັງທີ່ໄດ້ຮັບການແຕ່ງຕັ້ງ ເປັນຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນຄົນໃຫມ່.
ສອງຝ່າຍ ໄດ້ແຈ້ງໃຫ້ກັນຊາບສະພາບການພົວພັນພາຍໃນຂອງແຕ່ລະຝ່າຍ, ຕີລາຄາສູງ ຕໍ່ ຫມາກຜົນຂອງການພົວພັນຮ່ວມມື ລະຫວ່າງສອງພັກ ແລະ ປະຊາຊົນສອງຊາດ ລາວ-ຈີນ ໃນໄລຍະຜ່ານມາ, ແລກປ່ຽນຄຳຄິດເຫັນນຳກັນ ກ່ຽວກັບ ການເສີມຂະຫຍາຍສາຍພົວພັນຮ່ວມມື ລະຫວ່າງ ສອງພັກ, ສອງຄະນະພົວພັນຕ່າງປະເທດສູນກາງພັກ, ບັນຫາພາກພື້ນ ແລະ ສາກົນ ຈຳນວນໜຶ່ງ ທີ່ສອງຝ່າຍໃຫ້ຄວາມສົນໃຈ.
ສອງຝ່າຍເຫັນດີເອກະພາບ ໃນການສືບຕໍ່ຮັດແຫນ້ນການປະສານສົມທົບກັນ ໃນການເຮັດຫນ້າທີ່ເປັນເສນາທິການໃຫ້ແກ່ສູນກາງພັກ, ຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ ແລະ ສອງຄະນະພົວພັນຕ່າງປະເທດສູນກາງພັກ ໃຫ້ເກີດດອກອອກຜົນ ກໍຄື ຈັດຕັ້ງຜັນຂະຫຍາຍເນື້ອໃນຈິດໃຈທີ່ເປັນເອກະພາບກັນ ລະຫວ່າງ ການນຳສູງສຸດຂອງ ສອງພັກ, ສອງລັດ ໃນການສືບຕໍ່ເພີ່ມພູນຄູນສ້າງ ສາຍພົວພັນຄູ່ຮ່ວມມືຍຸດທະສາດຮອບດ້ານ ຫມັ້ນຄົງຍາວນານ ຕາມທິດ 4 ດີ ໃຫ້ເຂົ້າສູ່ລວງເລິກ, ຊຸກຍູ້ການສ້າງຄູ່ຮ່ວມຊາຕາກຳ ລາວ-ຈີນ ດ້ວຍມາດຕະຖານສູງ, ຄຸນນະພາບສູງ ແລະ ລະດັບສູງກວ່າເກົ່າ.
ໃນຕອນເຊົ້າຂອງວັນດຽວກັນ, ສະຫາຍ ຫລິວ ຈ້ຽນຊາວ ຍັງໄດ້ປາຖະກະຖາ ໃຫ້ການນຳຂັ້ນສູງພັກ, ລັດ ແລະ ພະນັກງານຫລັກແຫລ່ງຂັ້ນຕ່າງໆຂອງລາວ ໃນຫົວຂໍ້ສະເພາະ: “ຈັບມືຮ່ວມກັນຈັດຕັ້ງປະຕິບັດ 3 ຂໍ້ລິເລີ່ມກວມລວມທົ່ວໂລກ, ຮ່ວມກັນເປີດສັງກາດໃໝ່ ຂອງ ຄູ່ຮ່ວມຊາຕາກຳ ລາວ-ຈີນ” ທີ່ຫ້ອງປະຊຸມໃຫຍ່, ຫ້ອງວ່າການສູນກາງພັກ ໂດຍມີ ສະຫາຍ ບຸນທອງ ຈິດມະນີ, ກຳມະການກົມການເມືອງ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ແລະ ບັນດາການນຳຂັ້ນສູງ ເປັນກຽດເຂົ້າຮ່ວມໃນພິທີດັ່ງກ່າວ; ຫລັງຈາກນັ້ນ ຄະນະໄດ້ຢ້ຽມຢາມ ຫໍພິພິຕະພັນ ໄກສອນພົມວິຫານ, ຢ້ຽມຢາມ ເຂດພັດທະນາເສດຖະກິດກວມລວມໄຊເຊດຖາ, ບໍລິສັດການລົດໄຟລາວ-ຈີນ ແລະ ສະຖານທີ່ສຳຄັນ ຢູ່ ນະຄອນຫລວງວຽງຈັນ ຈຳນວນຫນຶ່ງ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20