ຄະນະຜູ້ແທນພັກ ປປ ລາວ ສຳເລັດການເຂົ້າຮ່ວມກອງປະຊຸມ ອົງການຊາວໜຸ່ມໄອແຄັບ ຄັ້ງທີ 6 ແລະ ອົງການແມ່ຍິງໄອແຄັບ ຄັ້ງທີ 7 ທີ່ນະຄອນຫຼວງອູລານບາຕໍ, ປະເທດມົງໂກລີ

ເຜີຍ​ແຜ່​ໂດຍ​: editor ເວ​ລາ: 08/08/2023 12:38:45 ຈຳ​ນວນ​​ຢ້ຽມ​ຊົມ 334 ຄັ້ງ ​

      ຄະນະຜູ້ແທນພັກ ປປ ລາວ ນໍາໂດຍ ສະຫາຍ ຜູ້ຕາງໜ້າຈາກສະຖານເອກອັກຄະລັດຖະທູດ ແຫ່ງ ສປປ ລາວ ທີ່ ນະຄອນຫຼວງອູລານບາຕໍ, ປະເທດມົງໂກລີ, ໄດ້ເຂົ້້າຮ່ວມກອງປະຊຸມຂອງອົງການຊາວ ໜຸ່ມ ໄອແຄັບ ຄັ້ງທີ 6 ພາຍໃຕ້ຫົວຂໍ້: “ການເຮັດໃຫ້ຊາວໜຸ່ມມີສ່ວນຮ່ວມໃນການສົນທະນາທາງດ້ານ ການເມືອງ ແລະ ສັງຄົມ ເພື່ອຄວາມກ້າວ ໜ້າດ້ານເສດຖະກິດ ແລະ ສັງຄົມ ໃນໄລຍະຫຼັງໂຄວິດ-19” ແລະ ກອງປະຊຸມອົງການແມ່ຍິງໄອແຄັບ ຄັ້ງທີ 7 ພາຍໃຕ້ຫົວຂໍ້: “ການສົ່ງເສີມພາວະຄວາມເປັນຜູ້ນຳຂອງ ແມ່ຍິງ ເພື່ອໃຫ້ບັນລຸເປົ້າໝາຍຄວາມສະເໝີພາບຍິງ-ຊາຍ ໃນໄລຍະການຟື້ນຟູຫຼັງໂຄວິດ-19” ເຊິ່ງໄດ້ ຈັດຂຶ້ນ ຢູ່ ທີ່ນະຄອນຫຼວງອູລານບາຕໍ, ປະເທດມົງໂກລີ ໃນລະຫວ່າງວັນທີ 04-07 ສິງຫາ 2023 ພາຍໃຕ້ການ​ເປັນ​ເຈົ້າ​ພາບ​​ຂອງ​ ພັກປະຊາຊົນມົງໂກລີ, ໂດຍມີຜູ້ເຂົ້າຮ່ວມທັງໝົດ 115 ທ່ານ ຈາກ 24 ພັກການເມືອງ ທີ່ມາຈາກ 16 ປະເທດ.   

      ຄະນະຜູ້ແທນພັກ ປປ ລາວ ໄດ້ປະກອບຄຳເຫັນໃນວາລະກອງປະຊຸມອົງການຊາວໜຸ່ມໄອແຄັບ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຂອງ ພັກປະຊາຊົນມົງໂກລີ; ຍົກໃຫ້ເຫັນແນວທາງ ນະໂຍບາຍຂອງພັກ-ລັດ ສປປ ລາວ ທີ່ໄດ້ຖືສໍາຄັນວຽກງານຊາວໜຸ່ມ ແລະ ເຍົາວະຊົນ ຍ້ອນເຫັນໄດ້ບົດ ບາດສຳຄັນຂອງຊາວໜຸ່ມ ແລະ ເຍົາວະຊົນ ລາວ ໃນພາລະກິດປົກປັກຮັກສາ ແລະ ​ສ້າງສາ​ປະ​ເທດ​ຊາດ; ຍຸດທະສາດການພັດທະນາຊາວໜຸ່ມ ແຕ່ປີ 2021-2030, ເຊິ່ງໄດ້ກວມເອົາການຈັດຕັ້ງປະຕິບັດແຜນ ດຳເນີນງານແຫ່ງຊາດທີ່ຕິດພັນກັບການສ້າງຄວາມເຂັ້ມແຂງດ້ານການຈັດຕັ້ງຊາວໜຸ່ມ ແລະ ເຍົາວະຊົນ ເພື່ອຮັບປະກັນສິດເທົ່າທຽມກັນ, ສົ່ງເສີມການລົງທຶນຂອງທຸກພາກສ່ວນເຂົ້າໃນການພັດທະນາຮອບດ້ານ, ສົ່ງເສີມການມີສ່ວນຮ່ວມຂອງຊາວໜຸ່ມ, ເຍົາວະຊົນໃນຂົງເຂດຕ່າງໆຢ່າງທົ່ວເຖິງ; ຄວາມຈຳເປັນໃນການ ຊຸກຍູ້ການມີສ່ວນຮ່ວມຢ່າງຕັ້ງໜ້າ ແລະ ກວ້າງຂວາງຂອງ  ຊາວໜຸ່ມ ໂດຍສະເພາະໃນດ້ານການເມືອງ ແລະ ສັງຄົມ, ເສີມຂະຫາຍບົດບາດຂອງຊາວໜຸ່ມໃນຂະບວນການຕັດສິນໃນຂັ້ນຕ່າງໆ, ໃນການພັດ ທະນານະໂຍບາຍ; ການສຶກສາ ແລະ ປູກຈິດສໍານຶກພົນລະເມືອງ; ສ້າງສະພາບແວດລ້ອມທີ່ ເໝາະສົມ ສຳລັບການສົ່ງເສີມການມີສ່ວນຮ່ວມຂອງຊາວໜຸ່ມ-ເຍົາວະຊົນ ແຕ່ສູນກາງຮອດທ້ອງຖິ່ນ ໃນຂະບວນ ການພັດທະນາຮອບດ້ານ ແລະ ບັນຫາທີ່ມີຜົນກະທົບຕໍ່ຊີວິດຂອງເຂົາເຈົ້າ; ສົ່ງເສີມການມີສ່ວນຮ່ວມ ຂອງຊາວໜຸ່ມ-ເຍົາວະຊົນ ໃນບັນດາກອງປະຊຸມລະດັບຊາດ, ສາກົນ ແລະ ໂຄງການແລກປ່ຽນຂອງຊາວ ໜຸ່ມ ເພື່ອເປີດກວ້າງການປຶກສາຫາລື ແລະ ແລກປ່ຽນບົດຮຽນລະຫວ່າງຊາວໜຸ່ມ; ການສ້າງໂອກາດ ສະແດງອອກຂອງຊາວໜຸ່ມໃຫ້ຫຼາຍຂື້ນ ແລະ ຮັບປະກັນເສລີພາບໃນການສະແດງຄຳຄິດເຫັນ; ສົ່ງເສີມ ການຈັດຕັ້ງທີ່ລິເລີ່ມ ແລະ ນຳພາໂດຍຊາວໜຸ່ມ ເພື່ອຂະຫຍາຍໂອກາດໃນການປະກອບສ່ວນເຂົ້າໃນ ຂະບວນການຂັບເຄື່ອນການພັດທະນາເສດຖະກິດ-ສັງຄົມ ໃນໄລຍະຫຼັງໂຄວິດ-19 ເພື່ອໃຫ້ຊາວໜຸ່ມກາຍ ເປັນກ້ອນກໍາລັງແຮງສືບທອດ​ອະນາຄົດຂອງ​ຊາດ.

      ຄະນະຜູ້ແທນພັກ ປປ ລາວ ຍັງໄດ້ເນັ້ນໜັກເຖິງບົດບາດຂອງ ສູນກາງຊາວໜຸ່ມ ປປ ລາວ ໃນຖານະ ເປັນອົງການຈັດຕັ້ງມະຫາຊົນໜຶ່ງຂອງພັກ ປປ ລາວ ໃນການປຸກລະດົມ, ເຕົ້າໂຮມຄວາມສາມັກຄີ ຊາວໜຸ່ມລາວບັນດາເຜົ່າເປັນປຶກແຜ່ນ, ຈັດຕັ້ງນຳພາການຈັດຕັ້ງ ແລະ ການເຄື່ອນໄຫວຂອງຊາວ ໜຸ່ມ-ເຍົາວະຊົນແຕ່ສູນກາງລົງຮອດທ້ອງຖິ່ນ, ເປັນຕົວແທນປົກປ້ອງສິດ ແລະ ຜົນປະໂຫຍດອັນຊອບ ທຳຂອງຊາວໜຸ່ມ ໂດຍເປັນອົງການການເມືອງທີ່ເຂັ້ມແຂງເພື່ອຊ່ວຍເຫຼືອສັງຄົມ ແລະ ເປັນພື້ນຖານດ້ານ ການຈັດຕັ້ງໃຫ້ແກ່ຊາວໜຸ່ມໄດ້ພັດທະນາຕົນເອງ ແລະ ເຕີບໃຫຍ່, ຊ່ວຍໃຫ້ຊາວໜຸ່ມໄດ້ປະກອບສ່ວນ ໂດຍກົງເຮັດໃຫ້ສັງຄົມກ້າວໜ້າ; ສະແດງເຈດຈຳນົງໃນການສືບຕໍ່ຮ່ວມມືກັບບັນດາພັກການເມືອງໃນ ອາຊີ ແລະ ອົງການຈັດຕັ້ງຊາວໜຸ່ມໃນພາກພື້ນ ກໍ່ຄື ອາຊຽນ ເພື່ອບັນລຸເປົ້າໝາຍການພັດທະນາເສດຖະ ກິດ-ສັງຄົມ ຫຼັງໂຄວິດ-19.

---