ວັນສ້າງຕັ້ງ ຄະນະສັນຕິພາບ ແລະ ສາມັກຄີ ຂອງ ລາວ ຄົບຮອບ 40 ປີ (1 ສິງຫາ 1983 - 1 ສິງຫາ 2023)
ເຜີຍແຜ່ໂດຍ: editor ເວລາ: 02/08/2023 08:49:46 ຈຳນວນຢ້ຽມຊົມ 549 ຄັ້ງ ໃນວັນທີ 1 ສິງຫາ 2023, ຄະນະສັນຕິພາບ ແລະ ສາມັກຄີ ຂອງ ລາວ ໄດ້ຈັດກອງ ປະຊຸມພົບປະ ເພື່ອຫວນຄືນມູນເຊື້ອວັນສ້າງຕັ້ງຄະນະສັນຕິພາບ ແລະ ສາມັກຄີ ຂອງລາວ ຄົບຮອບ 40 ປີ, ໂດຍການ ເລົ່າມູນເຊື້ອ ຂອງ ທ່ານ ສົມມາດ ພົລເສນາ, ກໍາມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີ ຂອງລາວ.
ຄະນະສັນຕິພາບ ແລະ ສາມັກຄີ ຂອງລາວ (Lao Committee for Peace and Solidarity) ແຕ່ກ່ອນເອີ້ນວ່າ ຄະນະກຳມະການລາວ ເພື່ອສັນຕິພາບ, ສາມັກຄີ ແລະ ມິດຕະພາບກັບປະຊາຊາດ (Lao Committee for Peace, Solidarity and Friendship with Peoples) ແມ່ນອົງການ ຈັດຕັ້ງສັງຄົມຂອງລາວ, ສ້າງຕັ້ງຂຶ້ນໃນວັນທີ 01 ສິງຫາ 1983 ໂດຍແມ່ນ ທ່ານ ສິງກະໂປ ສີໂຄດຈຸນລະມານີ ເປັນປະທານຜູ້ທຳອິດ. ໃນເວລານັ້ນ, ຄະນະກຳມະ ການນີ້ ມີຖານະເປັນອົງການຈັດຕັ້ງ ທີ່ມີງົບປະມານ ແລະ ກົງຈັກສະເພາະ. ມາຮອດປີ 1999, ກົມການເມືອງສູນກາງພັກ ໄດ້ຕົກລົງໂອນ ຄະນະກຳມະການລາວ ເພື່ອສັນຕິພາບ, ສາມັກຄີ ແລະ ມິດຕະພາບ ກັບປະຊາຊາດ ມາຂຶ້ນກັບຄະນະພົວ ພັນຕ່າງປະເທດສູນກາງພັກ ແລະ ປ່ຽນຊື່ມາ ເປັນ ຄະນະສັນຕິພາບ ແລະ ສາມັກຄີ ຂອງ ລາວ (Lao Committee for Peace and Solidarity) ແລະ ແຕ່ງຕັ້ງ ທ່ານ ດຣ. ສີໂຫ ບັນນະວົງ, ຮອງປະ ທານສູນກາງແນວລາວສ້າງ ຊາດ ໃນເວລານັ້ນເປັນປະທານ. ນັບແຕ່ນັ້ນມາ ຄະນະສັນຕິພາບ ແລະ ສາມັກ ຄີ ຂອງລາວ ໄດ້ມີການປັບປຸງກົງຈັກການຈັດຕັ້ງ 3 ຄັ້ງ. ຄັ້ງທີ 1 ແມ່ນ ທ່ານ ຄໍາພັນ ສິມມາລາວົງ (2008-2016), ນັກການທູດອາວຸໂສ ເປັນປະທານ, ຄັ້ງທີ 2 (2016-2022) ແມ່ນ ທ່ານ ສົມພັນ ແພງຄໍາມີ, ກໍາມະການສູນກາງພັກ, ຮອງປະທານສະພາແຫ່ງຊາດ (ໃນເວລານັ້ນ) ເປັນປະທານ ແລະ ຄັ້ງທີ 3 (2022-ປະຈຸບັນ) ແມ່ນ ທ່ານ ສົມມາດ ພົລເສນາ, ກໍາມະການສູນກາງພັກ, ຮອງປະທານສະພາ ແຫ່ງຊາດ ເປັນປະທານ ແລະ ປະກອບມີຮອງປະທານ, ເລຂາທິການ ແລະ ກໍາມະການ ລວມທັງໝົດ 9 ທ່ານ, ແຕ່ລະທ່ານບໍ່ໄດ້ປະຈໍາການ, ສ່ວນຫ້ອງການ ແລະ ກອງເລ ຂາທີ່ເຮັດວຽກແມ່ນກົມການທູດປະຊາຊົນ ຂອງ ຄະນະພົວພັນຕ່າງປະເທດສູນກາງພັກເປັນໃຈ ກາງປະສານງານ ແລະ ເຮັດວຽກປະຈຳ.
ຄະນະສັນຕິພາບ ແລະ ສາມັກຄີ ຂອງລາວ ມີພາລະບົດບາດປະກອບສ່ວນສະໜັບສະໜູນເພື່ອ ສ້າງເງື່ອນໄຂ, ສະພາບແວດລ້ອມທີ່ເອື້ອອຳນວຍໃຫ້ແກ່ສັນຕິພາບ, ມິດຕະພາບ ແລະ ການພັດທະນາ ເພື່ອພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຜົນ ປະໂຫຍດແຫ່ງສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ຂອງພາກພື້ນ ແລະ ຂອງໂລກ, ເຄື່ອນໄຫວພາຍ ໃຕ້ແນວທາງ ຂອງພັກ, ນະໂຍບາຍ ຂອງລັດ ໃນແຕ່ລະໄລຍະ ເປັນຕົ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ, ການຮ່ວມມື ເພື່ອການພັດທະນາ ແລະ ຂະຫຍາຍການພົວພັນຮ່ວມ ມືຫຼາຍທິດ, ຫຼາຍຝ່າຍ, ຫຼາຍຮູບແບບ, ຫຼາຍລະດັບ ບົນພື້ນຖານເຄົາລົບເອກະລາດ, ອໍານາດອະທິປະໄຕ ເຊິ່ງກັນແລະກັນ,ຕ່າງຝ່າຍຕ່າງ ມີຜົນປະໂຫຍດ. ເຄື່ອນໄຫວປະກອບສ່ວນສ້າງສະພາບແວດລ້ອມເອື້ອອໍານວຍໃຫ້ແກ່ການສ້າງ ສັນຕິພາບ, ມິດຕະພາບ ແລະ ການພັດທະນາ ທັງພາຍໃນ ກໍ່ຄືພາກພື້ນ ແລະ ໃນໂລກ.
ຜົນສຳເລັດອັນພົ້ນເດັ່ນໃນໄລຍະຜ່ານມາ ຂອງຄະນະສັນຕິພາບ ແລະ ສາມັກຄີ ຂອງລາວ ແມ່ນການປະກອບສ່ວນເຄື່ອນໄຫວສ້າງສະພາບແວດລ້ອມເອື້ອອໍານວນໃຫ້ແກ່ການສ້າງສັນຕິ ພາບ ແລະ ການພັດທະນາ ທັງພາຍໃນ ແລະ ຕ່າງປະເທດ ເຮັດໃຫ້ສາກົນຮັບຮູ້ບົດບາດ ຂອງຄະ ນະສັນຕິພາບ ແລະ ສາມັກຄີ ຂອງ ລາວ ກໍ່ຄືບົດບາດ ຂອງ ສປປ ລາວ. ສະນັ້ນ, ໃນປີ ໃນປີ 2008, ຄະນະກຳມະການຄ້ອງສັນຕິພາບ ສັນຕິພາບໂລກ ອິນໂດເນເຊຍ ໄດ້ມອບລາງວັນ ອັນຊົງກຽດຄື "ຄອ້ງສັນຕິພາບໂລກ (world Peace Gong)" ໃຫ້ແກ່ ສປປ ລາວ ເຊິ່ງເປັນ ປະເທດທໍາອິດໃນບັນດາປະເທດອາຊຽນ ແລະ ເປັນປະເທດທີ່ 4 ໃນໂລກ (ຖັດຈາກ ຈີນ, ອິນເດຍ, ໂມຊໍາບິກ) ທີ່ໄດ້ຮັບລາງວັນອັນຊົງກຽດດັ່ງກ່າວຈາກຄະນະກໍາມະການສັນຕິພາບໂລກອິນໂດເນ ເຊຍ. ປະຈຸບັນຄ້ອງດັ່ງກ່າວປະດິດສະຖານໄວ້ຢູ່ສວນປະຕູໄຊ. ນອກນັ້ນ, ຜົນງານການເຄື່ອນ ໄຫວອັນພົ້ນເດັ່ນ ໄດ້ຈັດກິດຈະກຳລະດົມປັດໄຈ ເພື່ອຊ່ວຍເຫລືອຜູ້ປະສົບໄພທຳມະຊາດທັງຢູ່ ພາຍໃນ ແລະ ຕ່າງປະເທດ ເຊັ່ນ: ຈັດຄອນເສີດລະດົມທຶນ ເພື່ອຊ່ວຍເຫລືອປະຊາຊົນ ທີ່ໄດ້ຮັບ ຜົນກະທົບຈາກໄພນໍ້າຖວ້ມ ຢູ່ 3 ແຂວງພາກໃຕ້ ຂອງ ລາວ ປີ 2009 ໄດ້ 300 ກວ່າລ້ານກີບ, ຈັດຄອນເສີດລະດົມປັດໄຈຊ່ວຍເຫລືອ ປະຊາຊົນປະເທດໄຮຕິ ປະສົບແຜ່ນດິນໄຫວ ປີ 2010 ມູນຄ່າ 15,000 ໂດລາສະຫະລັດ ແລະ ຈັດຄອນເສີດລະດົມປັດໄຈຊ່ວຍເຫລືອປະຊາຊົນຍີ່ປຸ່ນ ປະສົບ ໄພສຶນາມິ ໃນເດືອນມີນາ ປີ 2011 ໄດ້ 500 ລ້ານກວ່າກີບ, ເປັນເຈົ້າພາບຈັດກອງປະຊຸມ ຂົງເຂດອາຊີ - ປາຊີຟິກ ແລະ ກອງປະຊຸມຄະນະເລຂາຂອງສະພາສັນຕິພາບໂລກ ໃນປີ 2019. ນອກນັ້ນ, ຍັງໄດ້ຂົນຂວາຍທຶນ ຮອນນໍາຄູ່ຮ່ວມມືມາສ້າງສາພັດທະນາ ສປປ ລາວ, ນັບແຕ່ປີ 2013-2022 ໄດ້ລະດົມ ຂົນຂວາຍທຶນ ຈາກອົງການສັນຕິພາບເພື່ອນມິດ ມາສ້າງສາພັດທະນາຢູ່ ສປປ ລາວ ເປັນຕົ້ນແມ່ນສ້າງພື້ນຖານໂຄງລ່າງ ດ້ານການສຶກສາ, ເຊິ່ງໄດ້ສ້າງໂຮງຮຽນປະຖົມ ແລະ ມັດທະຍົມໄດ້ທັງໝົດ 17 ຫຼັງ ແລະ ອຸປະກອນການ ຮຽນການສອນ ລວມມູນຄ່າ 3 ລ້ານກວ່າໂດລາສະຫະລັດ ແລະ 15 ລ້ານກວ່າຢວນ. ພ້ອມນັ້ນ ຍັງໄດ້ ເຂົ້າຮ່ວມກອງປະຊຸມສາກົນ ເພື່ອຕ້ານການຊ່ວງເສັງການປະກອບອາວຸດ, ຕ້ານການໃຊ້ກຳລັງທະຫານ ແລະ ສະໜັບສະໜູນ ຖະແຫຼງການຕ່າງໆ ຂອງ ສະພາສັນຕິພາບໂລກ, ອົງການຈັດຕັ້ງສັນຕິພາບພາກ ພື້ນຕ່າງໆ.
ສຳລັບທິດທາງແຜນການເຄື່ອນໄຫວໃນຕໍ່ໜ້າ ຄະນະສັນຕິພາບ ແລະ ສາມັກຄີ ຂອງລາວ ຈະສືບ ຕໍ່ປະຕິບັດຕາມພາລະບົດບາດ ໃນການໂຄສະນາ, ເຜີຍແຜ່ ກ່ຽວກັບສັນຕິພາບ ແລະ ການພັດທະນາ ແລະ ຜົນຮ້າຍ ຂອງສົງຄາມ, ສືບຕໍ່ປະກອບສ່ວນສ້າງສະພາບແວດລ້ອມອັນເອື້ອ ອໍານວຍໃນການສ້າງສັນຕິພາບ ໃນພາກພື້ນ ແລະ ໃນໂລກ ຕາມເງື່ອນໄຂ ແລະ ຄວາມສາມາດ ຕົວຈິງ ຂອງຕົນ, ສືບຕໍ່ພົວພັນຮ່ວມມືຢ່າງ ໃກ້ຊິດກັບສະພາສັນຕິພາບໂລກ, ອົງການສັນຕິພາບ ເພື່ອນມິດຍຸດທະສາດ, ອົງການສັນຕິພາບພາກພື້ນ ປະກອບສ່ວນເຂົ້າໃນການສົ່ງເສີມສັນຕິພາບ ແລະ ຄວາມໝັ້ນຄົງໃນພາກພື້ນ ແລະ ສາກົນ, ສືບຕໍ່ເຂົ້າ ຮ່ວມກອງປະຊຸມສາກົນຕ່າງໆ ແລະ ສະໜັບສະໜູນວຽກງານສັນຕິພາບ ເພື່ອເສີມຂະຫຍາຍບົດບາດ ຂອງ ອົງການສັນຕິພາບ ຂອງ ລາວ ໃຫ້ເດັ່ນຂຶ້ນຕື່ມໃນເວທີສາກົນ ແລະ ສືບຕໍ່ລະດົມຂົນຂວາຍທຶນ ມາສ້າງສາ ພັດທະນາ ສປປ ລາວ ໃຫ້ນັບມື້ກວ້າງຂວາງ ແລະ ຫຼາຍຂຶ້ນກວ່າເກົ່າ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20