ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບທູດຫວຽດນາມ ເຂົ້າອວຍພອນ ວັນສ້າງຕັ້ງຄະນະພົວພັນຕ່າງປະເທດສູນກາງພັກ ຄົບຮອບ 40 ປີ (29/06/1983-29/06/2023)

ເຜີຍ​ແຜ່​ໂດຍ​: editor ເວ​ລາ: 29/06/2023 09:02:02 ຈຳ​ນວນ​​ຢ້ຽມ​ຊົມ 368 ຄັ້ງ ​

ໃນຕອນເຊົ້າຂອງວັນ​ທີ 28 ມິຖຸນາ 2023, ສະ​ຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກປະຊາຊົນ ປະຕິວັດລາວ ພ້ອມ​ດ້ວຍພະ​ນັກ​ງານ​ຫຼັກແຫຼ່ງ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກປ​ະ​ຊາ​ຊົນ ປະ​ຕິ​ວັດລາວ ​ໄດ້​ຕ້ອນຮັບ​ ສະຫາຍ  ຫງວຽນບ໋າຮຸ່ງ, ​ເອກ​ອັກ​ຄະ​ລັດ​ຖະ​ທູດວິສາມັນຜູ້ມີອໍານາດເຕັມ ແຫ່ງ ສາ​ທາ​ລະ​ນະ​ລັດ ສັງ​ຄົມ​ນິ​ຍົມ ຫວຽດ​ນາມ ປະ​ຈຳ ສາ​ທາ​ລະ​ນະ​ລັດ​ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ພ້ອມດ້ວຍພະນັກງານຂອງສະຖານທູດ ເຂົ້າອວຍພອນ ເນື່ອງໃນໂອກາດວັນສ້າງຕັ້ງຄະນະພົວພັນຕ່າງປະເທດສູນກາງພັກ ຄົບຮອບ 40 ປີ (29/06/1983-29/06/2023).

ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂອບໃຈຕໍ່ສະຫາຍ ຫງວຽນບ໋າຮຸ່ງ ພ້ອມດ້ວຍຄະນະ ທີ່ມາອວຍພອນ ໃນໂອກາດວັນສ້າງຕັ້ງຄະນະພົວພັນຕ່າງປະເທດສູນກາງພັກ ຄົບຮອບ 40 ປີເຊິ່ງເປັນການສະແດງເຖິງການຖືສໍາຄັນ ແລະ ມິດຈິດມິດໃຈແຫ່ງການພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍ່ຄື ລະຫວ່າງ ຄະນະພົວພັນຕ່າງປະເທດສູນກາງພັກ ແລະ ສະຖານເອກອັກຄະລັດຖະທູດຫວຽດນາມ.

 ສະຫາຍ ຫງວຽນບ໋າຮຸ່ງ ໄດ້​ສະ​ແດງ​ຄວາມ​ຊົມ​ເຊີຍ ແລະ ຕີ​ລາ​ຄາ​ສູງຕໍ່​ບັນ​ດາ​ຜົນ​ສຳ​ເລັດ ແລະ ຜົນ​ງານ​ອັນ​ໃຫຍ່​ຫລວງ​ຂອງ ຄະນະພົວພັນຕ່າງປະເທດສູນກາງພັກ ປປ ລາວ  ຍາດ​ມາ​ໄດ້ຕະຫຼອດໄລຍະ 40 ປີ ທີ່ຜ່ານມາ ໂດຍຍຶດໝັ້ນແນວທາງນະໂຍບາຍການຕ່າງປະເທດ ທີ່ກອງປະຊຸມໃຫຍ່ ແຕ່ລະສະໄໝຂອງພັກ ໄດ້ວາງອອກ, ໂດຍສືບຕໍ່ເສີມຂະຫຍາຍສາຍພົວພັນທີ່ເປັນມູນເຊື້ອກັບບັນດາພັກການເມືອງໃນພາກພື້ນຕ່າງໆຂອງໂລກ ບົນພື້ນຖານ 5 ຫຼັກການຢູ່ຮ່ວມກັນໂດຍສັນຕິ, ບໍ່ຈຳແນກລະບອບການເມືອງທີ່ ແຕກຕ່າງກັນໂດຍ ພັກ ປປ ລາວ ໄດ້ສືບຕໍ່ເປີດກວ້າງການພົວພັນກັບບັນດາພັກອ້າຍນ້ອງປະເທດສັງຄົມນິຍົມ, ບັນດາພັກກອມມູນິດ, ພັກກຳມະກອນ, ພັກການເມືອງທີ່ກ້າວໜ້າ, ບັນດາພັກກຳອຳນາດໃນປະເທດຕ່າງໆ; ມາເຖິງປັດຈຸບັນ ພັກ ປປ ລາວ ໄດ້ມີການພົວພັນດ້ານພັກກັບ 140 ພັກການເມືອງ ຈາກ 85 ປະເທດ ໃນທົ່ວໂລກ. ໃນນັ້ນ ໄດ້ສືບຕໍ່ໃຫ້ບູລິມະສິດໃນການພົວພັນ ກັບບັນດາພັກເພື່ອນມິດຍຸດທະສາດຄື: ພັກກອມມູນິດ ຫວຽດນາມ, ພັກກອມມູນິດຈີນ, ພັກກອມມູນິດກູບາ ແລະ ພັກແຮງງານເກົາຫຼີ ໂດຍ ສືບຕໍ່ເສີມຂະຫຍາຍສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມື ຮອບດ້ານກັບ ສສ ຫວຽດນາມ.

ສອງຝ່າຍ ໄດ້ຕີລາຄາສູງການພົວພັນຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຕະຫຼອດໄລຍະທີ່ຜ່ານມາ ເວົ້າລວມ, ເວົ້າສະເພາະ ແມ່ນການປະສານສົມທົບ, ການພົວພັນຮ່ວມມື ລະຫວ່າງ ຄະນະພົວພັນຕ່າງປະເທດສູນກາງພັກ ແລະ ສະຖານທູດ, ສອງຝ່າຍ ຢືນຢັນສືບຕໍ່ເພີ່ມທະວີການຮ່ວມມື, ປະກອບສ່ວນເພີ່ມພູມຄູນສ້າງສາຍພົວພັນພິເສດ ລາວ-ຫວຽດນາມ ໃຫ້ນັບມື້ໄດ້ຮັບເສີມຂະຫຍາຍຍິ່ງໆຂຶ້ນ.

---