ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກຕ້ອນ​ຮັບ​ ​ທູດກູ​ບາ ປະຈຳລາວ

ເຜີຍ​ແຜ່​ໂດຍ​: admin ເວ​ລາ: 11/03/2022 10:15:32 ຈຳ​ນວນ​​ຢ້ຽມ​ຊົມ 499 ຄັ້ງ ​

ສະ​ຫາຍ ທອງ​ສະຫວັນ ພົມວິຫານ ກຳ​ມ​ະ​ກາ​ນ​ສູນ​ກາງ​ພັກ ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄ​ຕ​ພ)​ ໄດ້​ຕ້ອນ​ຮັບການ​ເຂົ້າ​ຢ້ຽມຂໍ່ານັບ ຂອງສະ​ຫາຍ ປາໂບຣ ​ແອ​ງ​ໂຕ​ນີ​ໂອ ​​ໂຣດຣີ​ເກດ ເອກ​ອັກ​ຄະ​ລັດ​ຖະ​ທູດວິສາມັນ​ຜູ້​ມີ​ອຳນາດ​ເຕັມ ແຫ່ງ ສ​ ກູ​ບາ ປະ​ຈຳ​ ສ​ປ​ປ ລາວ ໃນ​ວັນ​ທີ 14 ກໍ​ລະ​ກົດ​ຜ່ານ​ມາທີ່ ຄ​ຕ​ພ. 

​ໃນ​ການ​ພົບ​ປະຄັ້ງ​ນີ້, ສະ​ຫາຍ ປາໂບຣ ​ແອ​ງ​ໂຕ​ນີ​ໂອ ​​ໂຣດຣີ​ເກດ ​​ໄດ້ສະ​ແດງ​ຄວາມຂອບໃຈ​ເປັນ​ຢ່າງ​ສູງ ທີ່​ໄດ້​ມີ​ໂອ​ກາດ​ພົບປະ​ກັບ ສະ​ຫາຍ​​ຫົວໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ແລະ ​ໄດ້​ສະ​ແດງ​ຄວາມ​ຊົມ​ເຊີຍ ​ເນື່ອງ​ໃນ​ໂອກາດ​ທີ່​ ສະຫາຍ ທອງ​ສະຫວັນ ພົມວິຫານ​ ໄດ້​ຮັບ​ການ​ເລືອກ​ຕັ້ງ​ເປັນ​ກຳມະການ​ສູນ​ກາງ​ພັກ ​ແລະ ​ໄດ້​ຮັບ​ການ​ແຕ່ງ​ຕັ້ງ​ເປັນ​ຫົວໜ້າຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ. ສະຫາຍ ປາ​ໂບຣ ​ແອ​ງ​ໂຕ​ນີ​ໂອ ໂຣດຣີເກດ ໄດ້​ຕີ​ລາຄາ​ສູງ​ຕໍ່​ການ​ຮ່ວມ​ມື​ສອງ​ຝ່າຍ ລະຫວ່າງກູ​ບາ-​ລາວ ​ແລະ ​ໄດ້ສະ​ແດງ​ຄວາມ​ຂອບ​ໃຈ​ ຕໍ່​ພັກ, ລັດຖະບານ ​ແລະ ປະຊາຊົນ​ລາວ​ ອ້າຍ​ນ້ອງ ທີ່​​ໃຫ້ການ​ຊ່ວຍ​ເຫຼືອສະໜັບສະໜູນກູບ​າ ​ໃນ​ເວທີ​ພາກ​ພື້ນ ​ແລະ ສາກົນ ມາ​​ໂດຍຕະຫຼອດ. ນອກຈາກ​ນັ້ນ, ສະຫາຍ​ທູດ ຍັງ​ໄດ້ແຈ້ງ​ສະພາບກ່ຽວ​ກັບ ເຫດການ​ປະ​ທ້ວງ​ໃນ​ວັນ​ທີ 11 ກໍລະກົດ​ 2021 ທີ່​ຜ່ານ​ມາ ຊຶ່ງ​ເປັນ​ການ​ປະຕິບັດ​ທີ່​ມີ​ການ​ແຊກ​ແຊງ​ຈາກ​ພາຍ​ນອກ.

      ສະ​ຫາຍ ທອງ​ສະຫວັນ ພົມວິຫານ ​ໄດ້ຕາງໜ້າ​ໃຫ້​​ພັກ, ລັດ​ ແລະ ປະຊາຊົນ​ບັນດາ​ເຜົ່າ ສະ​ແດງ​ຄວາມ​ຊົມ​ເຊີຍ​ຕໍ່​ສາຍ​ພົວພັນ​ຮ່ວມ​ມື​ທີ່​ເປັນ​ມູນ​ເຊື້ອ​ອັນ​ດີງາ​ມລະຫວ່າງ ລາວ-​ກູ​ບາ ຊຶ່ງ​ໄດ້​ຮັບ​ການ​ຊຸກຍູ້​ສົ່ງ​ເສີມ​ໃຫ້​ຂະຫຍາຍຕົວ​ຢ່າງ​ຕໍ່​ເນື່ອງ; ສະ​ແດງ​ຄວາມ​ຂອບ​ໃຈ ​ແລະ ຄວາມ​ຮູ້​ບຸນຄຸນ​ເປັນ​ຢ່າງ​ສູງ​ຕໍ່​ພັກ, ລັດ ​ແລະ ປະຊາຊົນ​ກູ​ບາ​ອ້າຍ​ນ້ອງທີ່​ໃຫ້ການ​ຊ່ວຍ​ເຫຼືອ ​ແລະ ສະໜັບສະໜູນ ສປປ ລາວ​ ຕະຫຼອດ​ໄລຍະ​ຜ່ານ​ມາ; ຕີ​ລາຄາ​ສູງ​ຕໍ່​ພັກ, ລັດ ​ແລະ ປະຊາຊົນ​ກູ​ບາ​ອ້າຍ​ນ້ອງ ​ໄດ້​ເດັດດ່ຽວ​ໜຽວ​ແໜ້ນ​ໃນ​ການ​ປົກ​ປັກ​ຮັກສາ​ໝາກຜົນ​ຂອງ​ການ​ປະຕິວັດທ່າມກາງ​ການ​ປິດ​ລ້ອມ ​ແລະ ການ​ຂວ້ຳ​ບາດ​ຂອງ​ຕາ​ເວັນ​ຕົກ​ຕັ້ງ 6 ທົດ​ສະ​ວັດ​ຜ່ານ​ມາ. ຕໍ່​ກັບ​ເຫດການ​ປະ​ທ້ວງ​ໃນ​ວັນ​ອາທິດ​ທີ່​ຜ່ານ​ມາ, ສະຫາຍ​ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​ໄດ້​ໃຫ້​ທັດສະນະ​ວ່າ ​ເປັນ​ການ​ປະພຶດ​ທີ່​ບໍ່​ຖືກຕ້ອງ, ບໍ່​ສະ​ແດງ​ເຖິງຜົນ​ປະ​ໂຫຍ​ດຂອງ​ປະຊາຊົນ​ກູ​ບາ​ສ່ວນ​ໃຫຍ່ ​ແລະ ​ເປັນ​ການ​ແຊກ​ແຊງ​ຈາກ​ພາຍ​ນອກ. ພັກ​ ປປລາວ ຕີ​ລາຄາ​ສູງ ຕໍ່​ນ້ຳ​ໃຈ​ສາກົນ​ຂອງ​ກູ​ບາ, ຕ້ານ​ທຸກ​ຮູບ​ແບບ​ຂອງ​ການ​ປິດ​ລ້ອມ ​ແລະ ຂວ້ຳ​ບາດ​ຈາກ​ພາຍ​ນອກ, ສະໜັບສະໜູນ​ໝາກຜົນ​ຂອງ​ການ​ປະຕິວັດ​ກູ​ບາ​ທີ່​ຍາດ​ມາ​ໄດ້; ຢືນຢັນ​ຄືນ​ແນວທາງ​ນະ​ໂຍບາຍ​ອັນ​ສະ​ເໝີ​ຕົ້ນ​ສະ​ເໝີ​ປາຍ​ຂອງ ​ພັກ ​ປປລາວ ​ໃນ​ການ​ສະໜັບສະໜູນ​ພັກ​ກອມ​ມູນິດ​ກູ​ບາ​ຕ້ານ​ການ​ກະທຳ​ທຸກ​ຮູບ​ແບບ​ທີ່​ບໍ່​ເປັນ​ທຳ ​ໂດຍ​ສະ​ເພາະການ​ປິດ​ລ້ອມ​ທາງ​ດ້ານ​ເສດຖະກິດ, ການ​ຄ້າ ​ແລະ ການ​ເງິນ​ຂອງ​ຕາ​ເວັນ​ຕົກ​ຕໍ່​ກູ​ບາ.

      ການ​ພົບ​ປະ​ຄັ້ງ​ນີ້ ດຳ​ເນີນ​ໄປ​ດ້ວຍ​ບັນຍາກາດ​ອັນ​ສະໜິດສະໜົມ ​ແລະ ​ໄດ້​ຮັບ​ຜົນສຳ​ເລັດ​ຢ່າງ​ຈົບງາມ. ສະຫາຍ ທອງ​ສະຫວັນ ພົມວິຫານ​ ໄດ້​ອວຍພອນ​ແດ່ ສະຫາຍປາໂບຣ ​ແອ​ງ​ໂຕ​ນີ​ໂອ ​​ໂຣດຣີເກດ ຈົ່ງ​ມີ​ສຸຂະພາບ​ເຂັ້ມ​ແຂງ ​ແລະ ປະສົບ​ຜົນສຳ​ເລັດ​ໃນ​ໜ້າ​ທີ່​ການ​ທູດ​ອັນ​ມີ​ກຽດ​ຂອງ​ຕົນ. ພ້ອມ​ທັງ ຢືນຢັນ​ວ່າ: ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ຍິນ​ດີ​ສືບ​ຕໍ່​ສະໜັບສະໜູນ ​ແລະ ຮ່ວມ​ມື​ເພື່ອ​ເສີມ​ຂະຫຍາຍ​ສາຍ​ພົວພັນ​ສາຍ​ພັກ ກໍ​ຄືການ​ທູດ​ປະຊາຊົນ ​ໃຫ້​ກ້າວ​ເຂົ້າ​ສູ່​ລວງ​ເລິກ​ຢ່າງ​ຕໍ່​ເນື່ອງ​ເພື່ອ​ນຳ​ເອົາ​ຜົນ​ປະ​ໂຫຍ​ດຕົວ​ຈິງ​ມາສູ່​ປະຊາຊົນ​ສອງ​ຊາດ​ລາວ-​ກູ​ບາ.

ຂ່າວ-ພາບ: ຄ​ຕ​ພ

---