ພິທີເປີດຊຸດການຝຶກອົບຮົມ E-Office

ເຜີຍ​ແຜ່​ໂດຍ​: editor ເວ​ລາ: 04/05/2023 15:43:47 ຈຳ​ນວນ​​ຢ້ຽມ​ຊົມ 379 ຄັ້ງ ​

       ໃນ​ວັນ​ທີ 02-05 ພຶດ​ສະ​ພາ 2023 ທີ່​ສຳ​ນັກ​ງານ ຫ້ອງ​ການ ຄ​ຕ​ພ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ເປີດ​ຊຸດ​ຝຶກ​ອົບ​ຮົມ ໃຫ້​ແກ່​ນັກ​ຝຶກ​ອົບ​ຮົມ (TOT) ກ່ຽວ​ກັບ ລະ​ບົບ​ບ​ຈໍ​ລະ​ຈອນ ແລະ ຄຸ້ມ​ຄອງ​ເອ​ກະ​ສານ​ດ້ວຍ​ລະ​ບົບ​ທັນ​ສະ​ໄໝ ​(E-Office) ພາຍ​ໃຕ້​ການ​ເປັນ​ປະ​ທານ​ຮ່ວມ ຂອງທ່ານ ​ບຸນ​ຍາ​ເດດ ໄຊ​ຍ​ະວົງ​ ຫົວ​ໜ້າ​ຫ້ອງ​ການ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ທ່ານ ປອ ທະ​ວີ​ສັກ ມະ​ໂນ​ທັມ, ຫົວ​ໜ້າ​ສູນ​ບໍ​ລິ​ຫານ​ລັດ ດີ​ຈີ​ຕ​ຣອນ ມີ​ຫົວ​ໜ້າ​ພະ​ແນກ​, ຮອງ​ພະ​ແນກ, ວິ​ທະ​ຍາ​ກອນ ຮັບ​ເຊີນ ຈາກ​ກະ​ຊວງ​ເຕັກ​ໂນ​ໂລ​ຊີ ແລະ ການ​ສື່​ສານ ແລະ ນັກ​ສຳ​ມະ​ນາ​ກອນ​ ຈາກ​ຄະ​ນະ​ພົວ​ພັນ​ຕ່າ​ງ​ປະ​ເທດ​ສູນ​ກາງ​ພັກ ທັງ​ໝົດ 45 ສະ​ຫາຍ.

       ຈຸດປະສົງ ຂອງ​ການ​ຝຶກ​ອົບ​ຮົມ​ດັ່ງ​ກ່າວ, ແມ່ນເພື່ອປະ​ຕິ​ບັດການຜັນ​ຂະ​ຫຍາຍ​ 05 ແຜນ​ງານ 28 ໂຄງ​ການ ຂອງ ຄ​ຕ​ພ ໃຫ້​ປະ​ກົດ​ຜົນ​ເປັນ​ຈິງ; ໂດຍ​ສະ​ເພາະ ເພື່ອເສີມສ້າງຄວາມຮູ້ ແລະ ຄວາມເຂົ້າໃຈ ໃນ​ການ​ນຳ​ໃຊ້​​ລະ​ບົບຫ້ອງ​ການ​ທັນ​ສະ​ໄຫມ ໃຫ້ຖືກຕ້ອງ ແລະ ຄວາມສອດຄ່ອງ ຕາມລະບຽບຫລັກການຂອງວຽກງານການ​ຄຸ້ມ​ຄອງ  ເອ​ກະ​ສານແບບທັນ​ສະ​ໄຫມ.

       ພາຍຫຼັງ​ທີ່​ຝຶກ​ສຳ​ເລັດ​ນັກ​ສຳ​ມະ​ນາ​ກອນ​ຈະ​ໄດ້​ນຳ​ໄປ​ຝຶກ​ຕໍ່​ໃຫ້​ພະ​ນັກ​ງານ​ພາຍ​ໃນ​ກົມ​ກອງຂອງ​ຕົນ. ​ແລ້ວ​ຈະ​ໝູນ​ໃຊ້​ຄວາມ​ຮູ້​ກ່ຽວ​ກັບ E-Office ເຂົ້າ​ໃນ​ວຽກ​ງານ​ຕົວ​ຈິງ​ຂອງ​ຕົນ​ໃຫ້​ມີ​ປະ​ສິດ​ທິ​ພາບ ໃນ​ຍຸກ​ສະ​ໄໝ​ແຫ່ງ​ການ​ຫັນ​ເປັນ​ອຸດ​ສະ​ຫະ​ກຳ 4.0 ເວົ້າ​ລວມ, ເວົ້າ​ສະ​ເພາະ​ແມ່ນ​ການ​ຫັນ​ລັດ​ແບບ​ດີ​ຈີ​ຕອນ​ຕາມ​ແນວ​ທາງ​ທີ່​ ພັກ-ວາງ​ອອກ.

 

---