ຄະນະຜູ້ແທນຂັ້ນສູງຂອງຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ເຂົ້າຢ້ຽມຂ່ຳນັບ ການນຳຂັ້ນສູງ ພັກ, ລັດ ສສ ຫວຽດນາມ
ເຜີຍແຜ່ໂດຍ: editor ເວລາ: 21/04/2023 10:16:53 ຈຳນວນຢ້ຽມຊົມ 662 ຄັ້ງ ໃນວັນທີ 20 ເມສາ 2023 ທີ່ສໍານັກງານປະທານປະເທດ ຫວຽດນາມ, ສະຫາຍ ຫວໍວັນເຖື້ອງ, ປະທານປະເທດແຫ່ງ ສສ ຫວຽດນາມ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ຄະນະຜູ້ແທນຂັ້ນສູງຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ນຳໂດຍ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ເນື່ອງໃນໂອກາດທີ່ຄະນະເດີນທາງໄປຢ້ຽມຢາມເຮັດວຽກ ແລະ ເຂົ້າຮ່ວມງານພົບປະມິດຕະພາບຄັ້ງທິີ X ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ ແລະ ແຂວງເທືອທຽນເຫວ, ສສ ຫວຽດນາມ.
ໂອກາດນີ້, ສະຫາຍ ຫວໍວັນເຖື້ອງ, ປະທານປະເທດ ແຫ່ງ ສສ ຫວຽດນາມ ໄດ້ສະແດງຄວາມປິຕິຍິນດີໃນການຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າ ຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ພ້ອມດ້ວຍຄະນະ ທີ່ໄດ້ເດີນທາງຢ້ຽມຢາມ ສສ ຫວຽດນາມ ແລະ ເຮັດວຽກກັບ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເປັນຄັ້ງທໍາອິດພາຍຫຼັງໄດ້ຮັບໜ້າທີ່ ໃໝ່ ໃນບັນຍາກາດທີ່ສອງພັກ ກໍາລັງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ. ສະຫາຍປະທານປະເທດຫວຽດນາມ ໄດ້ສະແດງຄວາມດີໃຈ ແລະ ຕີລາຄາສູງຕໍ່ຜົນສຳເລັດໃນໂອກາດຢ້ຽມຢາມລາວຢ່າງເປັນທາງການໃນຕົ້ນເດືອນເມສານີ້ ແລະ ຝາກຄວາມຂອບໃຈຕໍ່ການຕ້ອນຮັບຂອງການນໍາລາວ ຢ່າງອົບອຸ່ນ ຖານມິດສະຫາຍ ແລະ ສົມກຽດ; ສະແດງຄວາມຊົມເຊີຍຕໍ່ຜົນສຳເລັດທີ່ ສປປ ລາວ ຍາດມາໄດ້ໃນການປົກປັກຮັກສາ ແລະ ສ້າງສາພັດທະນາປະເທດ, ສືບຕໍ່ຍາດໄດ້ບັນດາຜົນສໍາເລັດອັນໃໝ່ໃຫຍ່ຫຼວງກວ່າເກົ່າ ໃນພາລະກິດປົກປັກຮັກສາ ແລະ ສ້າງສາປະເທດຊາດ. ສະຫາຍປະທານປະເທດ ຍັງໄດ້ມີຄໍາເຫັນເປັນທິດນໍາໃຫ້ແກ່ ສອງຄະນະພົວພັນຕ່າງປະເທດສູນກາງພັກ ລາວ ແລະ ຫວຽດນາມ ສືບຕໍ່ເພີ່ມທະວີການປະສານສົມທົບ ແລະ ຮ່ວມມືເພື່ອຊຸກຍູ້ການຜັນຂະຫຍາຍບັນດາຂໍ້ຕົກລົງທີ່ ສອງພັກ, ສອງລັດຖະບານ ໄດ້ຕົກລົງກັນໃຫ້ໄດ້ຮັບຜົນສໍາເລັດ, ພ້ອມທັງຢືນຢັນວ່າ ສສ ຫວຽດນາມ ຈະສືບຕໍ່ຮ່ວມກັບ ສປປ ລາວ ເພື່ອເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ - ລາວໃຫ້ເກີດດອກອອກຜົນ ຍືນຍົງຕະຫຼອດໄປ.
ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ໄດ້ສະແດງຄວາມປິຕິຊົມຊື່ນເປັນຢ່າງຍິ່ງທີ່ໄດ້ນໍາພາຄະນະມາຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ແລະ ໄດ້ສະແດງຄວາມຂອບອົກຂອບໃຈຢ່າງຈິງໃຈ ມາຍັງ ສະຫາຍ ຫວໍວັນເຖື້ອງ, ປະທານປະເທດແຫ່ງ ສສ ຫວຽດນາມ ທີ່ໄດ້ໃຫ້ການຕ້ອນຮັບອັນອົບອຸ່ນແກ່ຄະນະ; ສະແດງຄວາມຊົມເຊີຍຕໍ່ສະຫາຍ ຫວໍວັນເຖື້ອງ ທີ່ໄດ້ຮັບການແຕ່ງຕັ້ງເປັນປະທານປະເທດແຫ່ງ ສສ ຫວຽດນາມ ແລະ ໄດ້ລາຍງານວ່າ ຝ່າຍລາວ ຕີລາຄາສູງຕໍ່ຜົນສໍາເລັດໃນການຢ້ຽມຢາມລາວຂອງສະຫາຍ ໃນຕົ້ນເດືອນເມສາຜ່ານມາ ເຊິ່ງເປັນປະເທດທຳອິດ ພາຍຫຼັງຮັບຕໍາແໜ່ງເປັນປະທານປະເທດ; ຂໍນຳເອົາຄໍາຢື້ຢາມຖາມຂ່າວຈາກ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ມາຍັງ ສະຫາຍ ຫວໍວັນເຖື້ອງ, ປະທານປະເທດແຫ່ງ ສສ ຫວຽດນາມ. ສະຫາຍ ທອງສະຫວັນ ພົມວິຫານ ໄດ້ລາຍງານໂດຍສັງເຂບຂອງຈຸດປະສົງການມາຢ້ຽມຢາມ ຫວຽດນາມ ໃນຄັ້ງນີ້, ເຊິ່ງເປັນການສືບຕໍ່ປະຕິບັດ ກົນໄກການຮ່ວມມື - ແລກປ່ຽນການຢ້ຽມຢາມ ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຫວຽດນາມ ແລະ ທັງເປັນກິດຈະກໍາ ສະເຫຼີມ ສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022 ຜ່ານມາ. ສະຫາຍ ໄດ້ຢືນຢັນວ່າ ພັກ, ລັດ ແລະ ປະຊາຊົນລາວ ພ້ອມກັບ ປະຊາຊົນຫວຽດນາມ ອ້າຍນ້ອງ ຈະສືບຕໍ່ປົກປັກຮັກສາ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.
ຕອນແລງຂອງວັນດຽວກັນ, ສະຫາຍ ນາງ ເຈືອງຖິມາຍ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ໄດ້ຕ້ອນຮັບການຢ້ຽມຂໍ່ານັບຂອງຄະນະເຊັ່ນກັນ. ສະຫາຍ ນາງ ເຈືອງຖິມາຍ ໄດ້ຕີລາຄາສູງຕໍ່ການຢ້ຽມຢາມ ແລະ ເຮັດວຽກຂອງຄະນະ ຢູ່ ສສ ຫວຽດນາມ ໃນຄັ້ງນີ້, ເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນພິເສດ ຫວຽດນາມ-ລາວ; ຕີລາສູງການພົວພັນຮ່ວມມື ລະຫວ່າງ ສອງພັກ, ສອງລັດ ກໍຄືສອງ ຄະນະພົວພັນຕ່າງປະເທດສູນກາງພັກ ຂອງສອງພັກ ໃນໄລຍະທີ່ຜ່ານມາ; ຕີລາຄາສູງທີ່ສອງຝ່າຍ ໄດ້ພ້ອມກັນຈັດຕັ້ງການສະເຫຼີມສະຫຼອງປີສາມັກຄີມິດຕະພາບ ຫວຽດນາມ-ລາວ ປະຈຳປີ 2022 ທີ່ຜ່ານມາດ້ວຍຜົນສໍາເລັດຢ່າງຈົບງາມ; ຕີລາຄາສູງທີ່ສອງຝ່າຍ ໄດ້ປະສານສົມທົບກັນໃນການຈັດຕັ້ງຜັນຂະຫຍາຍ ບັນດາຂໍ້ຕົກລົງຮ່ວມມືຂອງການນຳຂັ້ນສູງຂອງ ສອງພັກ, ສອງລັດ ໃນໄລຍະທີ່ຜ່ານມາ; ຝາກຄວາມຢ້ຽມຢາມຖາມຂ່າວເຖິງ ສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ; ສະແດງຄວາມອວຍພອນໃຫ້ແກ່ຄະນະຢ້ຽມຢາມ ແລະ ເຮັດວຽກຢູ່ ສສ ຫວຽດນາມ ໃນຄັ້ງນີ້ປະສົບຜົນສຳເລັດຢ່າງຈົບງາມ.
ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ໄດ້ສະແດງຄວາມຂອບອົກຂອບໃຈຢ່າງຈິງໃຈຕໍ່ ສະຫາຍ ນາງ ເຈືອງຖິມາຍ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກກອມມູນິດຫວຽດນາມ ທີ່ໄດ້ໃຫ້ການຕ້ອນຮັບອັນອົບອຸ່ນແກ່ຄະນະ; ສະແດງຄວາມຊົມເຊີຍຕໍ່ ສະຫາຍ ນາງ ເຈືອງຖິມາຍ ທີ່ໄດ້ຮັບການແຕ່ງຕັ້ງເປັນ ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ແລະ ເຊື່ອໝັ້ນວ່າດ້ວຍບົດຮຽນອັນດົມສົມບູນ ແລະ ດ້ວຍມູນເຊື້ອແຫ່ງຄວາມສາມັກຄີຮັກແພງອັນສະໜິດສະໜົມ ແລະ ການພົວພັນຮ່ວມມືຢ່າງໃກ້ຊິດຂອງສະຫາຍທີ່ມີຕໍ່ ສປປ ລາວ, ສະຫາຍ ນາງ ເຈືອງຖິມາຍ ຈະສືບຕໍ່ຊີ້ນໍາ, ຊຸກຍູ້ໃນການເສີມຂະຫຍາຍສາຍພົວພັນມິດຕະພາບພິເສດ ລາວ-ຫວຽດນາມ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນ; ຂໍນຳເອົາຄໍາຢື້ຢາມຖາມຂ່າວຈາກ ສະຫາຍ ບຸນທອງ ຈິດມະນີ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ມາຍັງ ສະຫາຍ ເຈືອງຖິມາຍ; ສະຫາຍ ທອງສະຫວັນ ພົມວິຫານ ຍັງໄດ້ລາຍງານໃຫ້ຊາບກ່ຽວກັບສະພາບການພົ້ນເດັ່ນພາຍໃນປະເທດຂອງລາວ; ຕີລາຄາສູງຕໍ່ກັບການພົວພັນຮ່ວມມືລະຫວ່າງ ສອງພັກ, ສອງລັດ ໃນໄລຍະທີ່ຜ່ານມາ; ສະແດງຄວາມຮູ້ບຸນຄຸນຕໍ່ການສະໜັບສະໜູນ ແລະ ຊ່ວຍເຫຼືອອັນລໍ້າຄ່າແກ່ ພັກ, ລັດ ແລະ ປະຊາຊົນລາວ ໃນສະໄໝຕໍ່ສູ້ກູ້ຊາດ ກໍ່ຄືສະໄໝປົກປັກຮັກສາປະເທດຊາດໃນປະຈຸບັນ; ສະແດງຄວາມຢືນຢັນຈະຮ່ວມກັບ ຄະນະພົວພັນຕ່າງປະເທດສູນກາງພັກກອມມູນິດຫວຽດນາມ ເພີ່ມພູນຄູນສ້າງ ສາຍພົວພັນມິດຕະພາບ ລາວ-ຫວຽດນາມ ໃຫ້ນັບມື້ໄດ້ຮັບການຂະຫຍາຍຕົວຍິ່ງໆຂຶ້ນ.
ເຂົ້າຮ່ວມໃນການພົບປະຢ້ຽມຂໍ່ານັບຄັ້ງນີ້ ຍັງມີ ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ ລາວ ປະຈໍາ ສສ ຫວຽດນາມ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20