ກອງປະຊຸມສໍາມະນາທິດສະດີ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ຄັ້ງທີ 10

ເຜີຍ​ແຜ່​ໂດຍ​: editor ເວ​ລາ: 04/04/2023 15:26:40 ຈຳ​ນວນ​​ຢ້ຽມ​ຊົມ 766 ຄັ້ງ ​

 “ກອງປະຊຸມສໍາມະນາທິດສະດີ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ຄັ້ງທີ 10”

     ເພື່ອເປັນການຜັນຂະຫຍາຍແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ແລະ ປະຕິບັດຕາມແຜນການຮ່ວມມື ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ, ໃນຕອນເຊົ້າຂອງວັນທີ 04 ເມສາ 2023 ທີ່ໂຮງແຮມດອນຈັນພາເລດ, ສະພາທິດສະດີສູນກາງພັກ ປປ ລາວ, ຄະນະພົວພັນຕ່າງປະເທດສູນກາງພັກ ສົມທົບກັບພາກສ່ວນກ່ຽວຂ້ອງຂອງລາວ ໄດ້ຮ່ວມກັບ ຄະນະໂຄສະນາສູນກາງພັກກອມມູນິດຈີນ ແລະ ຄະນະພົວພັນຕ່າງປະເທດສູນກາງພັກກອມມູນິດຈີນ ຈັດກອງປະຊຸມສໍາມະນາທິດສະດີ ລະຫວ່າງ ສອງພັກ ລາວ-ຈີນ ຄັ້ງທີ X ຜ່ານວິດີໂອທາງໄກ ພາຍໃຕ້ຫົວຂໍ້: “ບົດຮຽນໃນການຄຸ້ມຄອງສັງຄົມແບບປະດິດສ້າງໃໝ່ ໃນຍຸກສະໄໝແຫ່ງຂໍ້ມູນຂ່າວສານ” ໂດຍການເປັນປະທານຮ່ວມ ຂອງ ສະຫາຍ ນາງ ສີໃສ ລືເດດມູນສອນ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ປປ ລາວ ແລະ ສະຫາຍ ຫຼີ ຊູເລີ້ຍ, ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນ; ເຂົ້າຮ່ວມກອງປະຊຸມຍັງມີ ສະຫາຍ ຄໍາພັນ ເຜີຍຍະວົງ, ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ ປປ ລາວ ພ້ອມດ້ວຍບັນດາສະຫາຍພະນັກງານການນໍາຂັ້ນສູງ, ບັນດານັກວິທະຍາສາດ, ນັກທິດສະດີ ຂອງ ສອງຝ່າຍເຂົ້າຮ່ວມ.

     ກອງປະຊຸມຄັ້ງນີ້, ປະທານກອງປະຊຸມ, ບັນດານັກວິທະຍາສາດ, ນັກທິດສະດີ ຂອງທັງສອງຝ່າຍ ໄດ້ຜັດປ່ຽນກັນຂຶ້ນສະເໜີບົດຄໍາເຫັນຫຼາຍຫົວຂໍ້. ຝ່າຍລາວ ໄດ້ນໍາສະເໜີບັນດາບົດຮຽນ ກ່ຽວກັບ ພັກປະຊາຊົນ ປະຕິວັດລາວ ນຳພາ ການຄຸ້ມຄອງສັງຄົມແບບປະດິດສ້າງໃໝ່, ການປະຕິບັດບົດບາດຂອງລັດ ໃນການຄຸ້ມຄອງສັງຄົມ, ການຄຸ້ມຄອງສັງຄົມໃນເງື່ອນໄຂການປະຕິວັດອຸດສາຫະກໍາ ຄັ້ງທີ 4, ການຫັນເປັນທັນສະໄໝໃນການຄຸ້ມຄອງພົນລະເມືອງ ຢູ່ ສປປ ລາວ. ສໍາລັບຝ່າຍຈີນ, ໄດ້ສະເໜີບົດ ກ່ຽວກັບ ແນວຄວາມຄິດພື້ນຖານ ແລະ ໜ້າທີ່ຕົ້ນຕໍ ໃນການປັບປຸງລະບົບການຄຸ້ມຄອງສັງຄົມໃນຍຸກສະໄໝແຫ່ງຂໍ້ມູນຂ່າວສານ, ການຍົກສູງລະດັບການຄຸ້ມຄອງດ້ວຍກົດໝາຍໃນການຄຸ້ມຄອງສັງຄົມ ແລະ ວຽກງານມະຫາຊົນ ໃນຍຸກສະໄໝໃໝ່. ບັນດານັກວິທະຍາສາດ ແລະ ແຂກເຂົ້າຮ່ວມກອງປະຊຸມ ໄດ້ແລກປ່ຽນບົດຮຽນຢ່າງກົງໄປກົງມາ ທັງໃນແງ່ທິດສະດີວິທະຍາສາດ ແລະ ພຶດຕິກຳຕົວຈິງຢ່າງເລິກເຊິ່ງ, ກວມລວມ, ທັງສະແດງໃຫ້ເຫັນເຖິງບັນຫາທີ່ເປັນພື້ນຖານ ໃນການປະຕິບັດໜ້າທີ່ການເມືອງຂອງສອງພັກ ແລະ ສອງປະເທດ ລາວ-ຈີນ ໃນຍຸກສະໄໝແຫ່ງຂໍ້ມູນຂ່າວສານ.

     ການຈັດກອງປະຊຸມສໍາມະນາທິດສະດີ ລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ເປັນກົນໄກການຮ່ວມມື ລະຫວ່າງ ສອງພັກ ໃນການແລກປ່ຽນບົດຮຽນດ້ານທິດສະດີ ແລະ ພຶດຕິກຳຕົວຈິງ ເຊິ່ງກັນແລະກັນ ກ່ຽວກັບ ການກໍ່ສ້າງ-ການຄຸ້ມຄອງພັກ, ການບໍລິຫານລັດ-ປົກຄອງປະເທດ ແລະ ອື່ນໆ, ເຊິ່ງເປັນການປະກອບສ່ວນເພີ່ມພູນຄັງສາງທິດສະດີ ລະຫວ່າງ ສອງພັກ, ສອງລັດ ໃຫ້ນັບມື້ນັບສົມບູນຂຶ້ນຢ່າງບໍ່ຢຸດຢັ້ງ ແລະ ເປັນການປະກອບສ່ວນຊຸກຍູ້ໃຫ້ ສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການສ້າງເປັນຄູ່ຮ່ວມຊະຕາກໍາດຽວກັນ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

---