ທ່ານ ບຸນມີ ວັນມະນີ, ເອກອັກຄະລັດຖະທູດລາວ ປະຈຳ ອິນເດຍ ໄດ້ຕາງໜ້າພັກ ປປ ລາວ ເຂົ້າຮ່ວມກອງປະ ຊຸມໃຫຍ່ ຄັ້ງທີ XIX ຂອງພັກກຸ່ມກ້າວຫນ້າທົ່ວອິນເດຍ
ເຜີຍແຜ່ໂດຍ: editor ເວລາ: 06/03/2023 15:42:35 ຈຳນວນຢ້ຽມຊົມ 575 ຄັ້ງ ໂດຍຕອບສະຫນອງຕາມຈົດຫມາຍເຊີນ ຂອງ ພັກກຸ່ມກ້າວຫນ້າທົ່ວອິນເດຍ “ All India Forward Bloc”, ທ່ານ ບຸນມີ ວັນມະນີ, ເອກອັກຄະລັດຖະທູດລາວ ປະຈຳ ອິນເດຍ ໄດ້ຕາງໜ້າພັກ ປປ ລາວ ເຂົ້າຮ່ວມກອງປະ ຊຸມໃຫຍ່ ຄັ້ງທີ XIX ຂອງພັກກຸ່ມກ້າວຫນ້າທົ່ວອິນເດຍ ໃນວັນທີ 24 ກຸມພາ 2023 ທີ່ເມືອງ ໄຮເດີຣາບັດ, ລັດເຕລັນການາ, ປະເທດອິນເດຍ. ໃນກອງປະຊຸມດັ່ງກ່າວ, ທ່ານເອກອັກຄະລັດຖະທູດລາວ ໄດ້ປະກອບຄຳຄິດຄຳເຫັນ ໂດຍໄດ້ສະແດງຄວາມຊົມເຊີຍ ຕໍ່ກອງປະຊຸມ ແລະ ການຕ້ອນຮັບຢ່າງອົບອຸ່ນ, ພ້ອມທັງ ໄດ້ນຳເອົາຄຳຊົມເຊີຍ ແລະ ພອນໄຊອັນປະເສີດຂອງ ພັກປະຊາຊົນ ປະຕິວັດລາວ ສົ່ງໄປຍັງ ກອງປະຊຸມໃຫຍ່ ຄັ້ງທີ XIX ຂອງ ພັກກຸ່ມກ້າວຫນ້າທົ່ວອິນເດຍ ແລະ ຜ່ານກອງປະຊຸມໃຫຍ່ດັ່ງກ່າວ ໄປຍັງ ບັນດາສະມາຊິກພັກກ້າວຫນ້າທົ່ວອິນເດຍ ແລະ ຊາວຜູ້ອອກແຮງງານອິນເດຍທຸກທົ່ວຫນ້າ. ກອງປະຊຸມໃຫຍ່ ຄັ້ງທີ XIX ຂອງ ພັກກຸ່ມກ້າວຫນ້າທົ່ວອິນເດຍ ເປັນເຫດການການເມືອງທີ່ສໍາຄັນຂອງ ພັກກຸ່ມກ້າວຫນ້າທົ່ວອິນເດຍ ໃນການເຕົ້າໂຮມຄວາມສາມັກຄີ, ເພີ່ມທະວີການຮ່ວມມື ແລະ ແລກປ່ຽນບົດຮຽນທາງດ້ານທິດສະດີ, ການປະສານງານເພື່ອຄວາມເປັນເອກະພາບຂອງພັກ ກັບບັນດາຂະບວນການກ້າວຫນ້າ ແລະ ຊາວຜູ້ອອກແຮງງານໃນທົ່ວໂລກ ເພື່ອພາລະກິດສັນຕິພາບ ແລະ ການພັດທະນາໃນພາກພື້ນ ແລະ ໃນໂລກ.
ໃນໂອກາດດັ່ງກ່າວ, ທ່ານເອກອັກຄະລັດຖະທູດ ຍັງໄດ້ຍົກໃຫ້ເຫັນເຖິງການນຳພາຂອງ ພັກປະຊາຊົນ ປະຕິວັດລາວ ໃນການຕໍ່ສູ້ກູ້ຊາດຕ້ານຜູ້ຮຸກຮານ ຈົນສາມາດສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975. ປັດຈຸບັນ, ພັກປະຊາຊົນ ປະຕິວັດລາວ ກຳລັງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງຕົນ, ປະຕິບັດແຜນພັດທະນາເສດຖະກິດສັງຄົມ 5 ປີ ຄັ້ງທີ 9 (2021-2025) ແລະ ວິໃສທັດເຖິງ ປີ 2030 ເພື່ອແນ່ໃສ່ປັບປຸງຊິວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນ. ພັກປະຊາຊົນ ປະຕິວັດລາວ ຢືນຢັນສືບຕໍ່ຮ່ວມມືກັບບັນດາພັກການເມືອງໃນພາກພື້ນ ແລະ ສາກົນ, ລວມທັງ ພັກກຸ່ມກ້າວຫນ້າທົ່ວອິນເດຍ ເພື່ອສັນຕິພາບ, ສະຖຽນລະພາບ, ຄວາມຫມັ້ນຄົງ, ການຮ່ວມມືເພື່ອພັດທະນາ ແລະ ເພື່ອອຸດົມການສັງຄົມນິຍົມ. ພ້ອມດຽວກັນ, ທ່ານເອກອັກຄະລັດຖະທູດ ໄດ້ນຳສະເຫນີຈົດຫມາຍຊົມເຊີຍ ຂອງ ທ່ານ ທອງສະຫວັນ ພົມວິຫານ, ກຳມະ ການສູນກາງພັກ, ຫົວຫນ້າຄະນະພົວພັນຕ່າງປະເທດສູນກາງພັກ ຕໍ່ກອງປະຊຸມໃຫຍ່ ຄັ້ງທີ XIX ຂອງ ພັກກຸ່ມກ້າວຫນ້າທົ່ວອິນເດຍ ແລະ ອວຍພອນກອງປະຊຸມໃຫຍ່ດັ່ງກ່າວ ຈົ່ງປະສົບຜົນສໍາເລັດຢ່າງຈົບງາມ.
ທ່ານ DEBABRATA BISWAS, ເລຂາທິການໃຫຍ່ ພັກກຸ່ມກ້າວຫນ້າທົ່ວອິນເດຍ ໄດ້ຝາກຄວາມຂອບໃຈຢ່າງຈິງໃຈ ມາຍັງ ທ່ານ ທອງສະຫວັນ ພົມວິຫານ, ກຳມະການສູນກາງພັກ, ຫົວຫນ້າຄະນະພົວພັນຕ່າງປະເທດສູນກາງພັກ ແລະ ການນຳພັກປະຊາຊົນປະຕິວັດລາວ ທີ່ໄດ້ສົ່ງຕໍ່ຈົດຫມາຍຊົມເຊີຍ ພ້ອມທັງສົ່ງຕົວແທນເຂົ້າຮ່ວມກອງປະຊຸມໃຫຍ່ດັ່ງກ່າວ ພ້ອມຫວັງວ່າ ຈະໄດ້ຮັບການຮ່ວມມື ແລະ ສະຫນັບສະຫນູນຕື່ມໃນອະນາຄົດ.
ພັກກຸ່ມກ້າວຫນ້າທົ່ວອິນເດຍ “ All India Forward Bloc” ເປັນພັກດັ້ງເດີມຂອງອິນເດຍ, ສ້າງຕັ້ງຂຶ້ນໃນວັນທີ 3 ພຶດສະພາ 1939 ໂດຍ ທ່ານ Subhas Chandra Bose. ພັກກຸ່ມກ້າວຫນ້າທົ່ວອິນເດຍ ໄດ້ແຍກຈາກພັກ Congress (ເປັນພັກໃຫຍ່ ແລະ ເປັນພັກຝ່າຍຄ້ານໃນປະຈຸບັນ) ເນື່ອງຈາກມີແນວຄວາມຄິດທີ່ຕ່າງກັນໃນບັນດາແກນນຳພັກ, ທ່ານ Subhas Chandra Bose ມີຄວາມເຊືື່ອຫມັ້ນວ່າ ມີແຕ່ດຳເນີນການປະຕິວັດສັງຄົມນິຍົມ ຈຶ່ງຈະສາມາດນຳເອົາເອກະລາດຈາກ ການເປັນຫົວເມືອງຂຶ້ນອັງກິດ ມາສູ່ປະຊາຊົນອິນເດຍ ແລະ ໃນເວລານັ້ນ ທ່ານຍັງໄດ້ເດີນທາງໄປພົບປະກັບ ທ່ານ ສະຕາລິນ ທີ່ໂມສກູ ເປັນການສ່ວນຕົວ ແລະ ໄປຊອກຮູ້ບົດຮຽນດ້ານທິດສະດີ ທີ່ເຢັຽລະມັນ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20