ຄະນະພົວພັນຕ່າງປະເທດສູນກາງພັກ ຈັດກອງປະຊຸມປາຖະກະຖາ ແລະ ປະກາດໜ່ວຍພັກ, ປອດໃສ, ເຂັ້ມແຂງ, ໜັກແໜ້ນ ປີ 2022

ເຜີຍ​ແຜ່​ໂດຍ​: editor ເວ​ລາ: 24/02/2023 14:48:18 ຈຳ​ນວນ​​ຢ້ຽມ​ຊົມ 416 ຄັ້ງ ​

ໃນວັນທີ 23 ກຸມ​ພ​າ 2023, ຄະນະພົວພັນຕ່າງປະເທດສູນກາງພັກ ໄດ້ຈັດການເຜີຍແຜ່ເອກະສານ ວັນ​ສ້າງ​ຕັ້ງ​ພັກ​ກອມ​ມູ​ນິດ​ຫວຽດ​ນາມ ຄົບ​ຮອບ 93 ປີ(03/02/1930-03/02/2023); ວັນ​ສ້າງ​ຕັ້ງ​ກຳ​ມະ​ບານ​ລາວ ຄົບ​ຮອບ 67 ປີ (01/02/1956-03/02/2023) ແລະ ປະ​ກາດ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ​, ໜັກ​ແໜ້ນ ປະ​ຈຳ​ປີ 2022 ເຊິ່ງ​ໃຫ້​ກຽດ​ເປັນ​ປະ​ທານໂດຍ ສະ​ຫາຍ ທອງ​ສະ​ຫວັນ ພົມ​ວິ​ຫານ, ກຳ​ມະ​ການ​ສູນ​ກາງ​ພັກ, ເລ​ຂາ​ຄະ​ນະ​ພ​ັກ, ຫົວ​ໜ້າ​ຄະ​ນະ​ພົວ​ພັນ​ຕ​່າ​ງ​ປະ​ເທດ​ສູນ​ກາງ​ພັກ, ມີ​ບັນ​ດາ​ຄະ​ນະ​ພັກ, ຄະ​ນະ​ກົມ, ພະ​ແນກ ແລະ ພະ​ນັກ​ງານ​ທົ່ວ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ເຂົ້າ​ຮ່ວມ​ຢ່າງ​ພ້ອມ​ພຽງ.

ການ​ປາ​ຖະ​ກະ​ຖາ​ຄັ້ງ​ນີ້ ປະ​ທານກອງ​ປະ​ຊຸມ​ ໄດ້​ຍົກ​ໃຫ້​ເຫັນ​ຕົ້ນ​ກຳ​ເນີດ ແລະ ປະ​ຫວັດ​ຄວາມ​ເປັນ​ມາ​ຂອງ​ພັກ ​ກອມ​ມູ​ນິດ​ຫວຽດ​ນາມ ​ນັບ​ຕັ້ງ​ແຕ່​ທ້າຍ​ສັດ​ຕະ​ວັດ​ທີ XIX ຫາ ຕົ້ນ​ສັດ​ຕະ​ວັດ​ທີ XX ທີ່ພວກ​ລ່າ​ເມືອງ​ຂຶ້ນ​ຝ​ຣັ່ງ​ ໄດ້ຢຶດ​ຄອງ ຫວຽດ​ນາມ​ ເປັນ​ຫົວ​ເມືອງ​ຂຶ້ນ, ແຕ່ດ້ວຍນ້ໍາໃຈຮັກຊາດ ແລະ ຄຽດແ​ຄ້ນຕໍ່ພວກລ່າເມືອງຂຶ້ນຜູ້ຮຸກຮານ ປະຊາຊົນຫວຽດນາມ ໄດ້ຈັບອາວຸດລຸກຂຶ້ນຕໍ່ສູ້​ບໍ່​ຍອມ​ຈຳ​ນົນ ຈົນ​ຮອດ ປີ 1911 ປະທານ ໂຮ່ຈີມິນ ( ເວລານັ້ນ ຊື່ ຫງວຽນອາຍກວັກ ) ໄດ້ຊອກຫາເສັ້ນທາງປົດປ່ອຍຊາດ ມາ​ຮອດ ປີ 1929 ຫງວຽນ ອາຍ ກວັກ ໄດ້ສ້າງຕັ້ງພັກກອມມູນິດອິນດູຈີນຂຶ້ນ ແລະ ຕໍ່ມາໂດຍໄດ້ຮັບການໝອບໝາຍຈາກສາກົນກອມມູນິດ ໃຫ້ຈັດຕັ້ງພັກກອມມູນິດຫວຽດນາມ ຂຶ້ນໃນວັນທີ 03/02/1930. ນອກ​ຈາກ​ນີ້ ສະ​ຫາຍ​ປະ​ທານກອງ​ປະ​ຊຸມ ​ຍັງ​ຍົກ​ໃຫ້​ເ​ຫັນຜົນງານການນໍາພາຂອງພັກກອມມູນິດ ຫວຽດນາມ ໃນ​ແຕ່​ລະ​ໄລ​ຍະ ແລະ ການພົວພັນຮ່ວມມື-ຄວາມສາມັກຄີພິເສດ-ການ​ຮ່ວມ​ມື​ຮອບ​ດ້ານ ກັບ ​ພັກ​ປະ​ຊາ​ຊົນ ປະ​ຕິ​ວັດ​ລາວ ເຊິ່ງ​ເປັນ​ຕົ້ນ​ກຳ​ເນີດ​ຮ່ວມ​ກັນຈາກ ພັກ​ກອມ​ມູ​ນິດ​ອິນ​ດູ​ຈີນ.

ຫຼັງ​ຈາກນັ້ນ, ສະ​ຫາຍ ວາ​ລະ​ໄຊ ເລັ່ງ​ສະ​ຫວັດ, ຮອງ​ຫົວ​ໜ້າ ຄ​ຕ​ພ ກໍ່​ໄດ້​ສືບ​ຕໍ່​ເຜີຍ​ແຜ່​ເອ​ກະ​ສານ​ວັນ​ສ້າງ​ຕັ້ງ​ສະ​ຫະ​ພັນ​ກຳ​ມະ​ບານ​ລາວ ຄົບ​ຮອບ 67 ປີ (01 ກຸມ​ພາ 1956-01 ກຸມ​ພາ 2023) ເຊິ່ງໄດ້​ຍົກ​ໃຫ້​ເຫັນຕົ້ນ​ກຳ​ເນີດ ແລະ ການ​ເຕີ​ບໃຫຍ່​ຂະ​ຫຍາຍ​ຕົວ, ຜົນ​ງານ​ທີ່​ພົ້ນ​ເດັ່ນ ແລະ ທິດ​ທາງ​​ໃນ​ການ​ພັດ​ທະ​ນາ​ວຽກ​ງານ​ກຳ​ມະ​ບານ​ລາວ​ໃນ​​ຕໍ່​ໜ້າ.

​ໃນ​ວັນ​ດຽວ​ກັນ, ຄະ​ນະ​ພົວ​ພັນ​ຕ່າງ​ປະ​ເທດ​ສູນກາງ​ພັກ ໄດ້ຈັດ​​ພິ​ທີປະ​ກາດ​ໜ່ວຍ​ພັກ ​ຫ້ອງ​ການ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ເປັນ​ໜ່ວຍ​ພັກ​ປອດ​ໃສ, ​ເຂັ້ມ​ແຂງ, ໜັກ​ແໜ້ນ ປະ​ຈຳ​ປີ 2022 ເຊິ່ງ​ເປັນຄັ້ງ​ທີ 6. ໃນ​ຕອນ​ທ້າຍ ສະ​ຫາຍ ທອງ​ສະ​ຫວັນ ​ພົມ​ວິ​ຫານ, ​ກຳ​ມະ​ການ​ສູນ​ກາງ​ພັກ, ເລ​ຂາ​ຄະ​ນະ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ກໍ່​ໄດ້​ໃຫ້​ຄຳ​ໂອ້​ລົມ ແລະ ​ຊີ້​ນຳ​ໃຫ້ບັນ​ດາ​ໜ່ວຍ​ພັກ​ ຈົ່ງເອົາ​ໃຈ​ໃສ່​ໃນ​ການ​ປົກ​ປັກ​​ຮັກ​ສາ​ນາມ​ມະ​ຍົດ​ດັ່ງ​ກ່າວ ແລະ ​ເປັນ​ເຈົ້າ​ການ​ສືບ​ຕໍ່​ກໍ່​ສ້າງ​ໜ່ວຍ​ພັກ​ຕົນ​ໃຫ້​ກາຍ​ເປັນ​ໜ່ວຍ​ພັກ ​ປອດ​ໃສ, ເຂັ້ມ​ແຂງ, ໜັກ​ແໜ້ນ ໃຫ້​ມີ​ຈຳ​ນວນ​ເພີ່ມ​ຂື້ນ​ໄປ​ເລື້ອຍໆ.

---