ຄ​ຕ​ພ ສະຫຼຸບການເຄື່ອນໄຫວວຽກງານ ປະຈຳປີ 2022, ປະກາດການຈັດຕັ້ງ ແລະ ສະຫຼຸບຂະບວນການແຂ່ງຂັນຍ້ອງຍໍຜົນງານ 5 ປີ ແລະ ປະກາດເນື້ອໃນການແຂ່ງຂັນ ຮອດປີ 2025

ເຜີຍ​ແຜ່​ໂດຍ​: editor ເວ​ລາ: 21/02/2023 13:14:43 ຈຳ​ນວນ​​ຢ້ຽມ​ຊົມ 481 ຄັ້ງ ​

ຄະນະພົວພັນຕ່າງປະເທດສູນກາງພັກ ຈັດກອງປະຊຸມສະຫຼຸບການເຄື່ອນໄຫວວຽກງານ ປະຈຳປີ 2022, ປະກາດການຈັດຕັ້ງ ແລະ ສະຫຼຸບຂະບວນການແຂ່ງຂັນຍ້ອງຍໍຜົນງານ 5 ປີ (2016-2020) ແລະ ປະກາດເນື້ອໃນການແຂ່ງຂັນ ຮອດປີ 2025.

..............................

ໂດຍປະຕິບັດຕາມແຜນການປະຈໍາປີ 2022 ຂອງ ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ວັນທີ 17 ກຸມພາ 2023 ຄະນະພົວພັນຕ່າງປະເທດສູນກາງພັກ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານຂອງຕົນໃນໄລ​ຍະ 1 ປີ ຜ່ານ​ມາ, ໂດຍການເປັນປະທານ ຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ໄດ້ມີຄະ​ນະ​ພັກ-ຄະນະນໍາ, ຄະນະກົມ, ພະນັກງານອາວຸໂສບໍານານ ຕະຫຼອດ​ເຖິງ ພະນັກງານທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມ.

ກອງປະຊຸມໄດ້ຮັບ​ຟັງ​ການສະຫຼຸບຕີ​ລາ​ຄາ ກ່ຽວກັບ ການປະ​ຕິ​ບັດ​ວຽກ​ງານ ຂອງ ຄະນະພົວພັນຕ່າງປະເທດສູນກາງພັກ ໃນໄລຍະ 1 ປີ ຜ່ານ​ມາ, ໂດຍ​ໄດ້​ຍົກ​ໃຫ້​ເຫັນ​ຜົນ​ງານ​ທີ່​ຍາດ​ມາ​ໄດ້, ບາງດ້ານທີ່ຄົງຄ້າງ ແລະ ບົດຮຽນທີ່ຖອດຖອນໄດ້; ກອງ​ປະ​ຊຸມ​ຍັງ​ໄດ້​ເປີດ​ໂອ​ກາດ​ໃຫ້ບັນ​ດາ​ຜູ້​ເຂົ້າ​ຮ່ວມກອງປະຊຸມ​ປະ​ກອບ ຄວາມຄິດເຫັນເຂົ້າ​ໃສ່​ບົດ​ສະຫຼຸບ​ດັ່ງ​ກ່າວຢ່າງກົງໄປກົງມາ ແລະ ເປັນ​ເອ​ກະ​ພາບວາງທິດທາງແຜນການ ແລະ ຄາດ​ໝາຍ​ສູ້​ຊົນ​ສຳ​ລັບ​ປີ 2023;  ໃນໂອກາດດຽວກັນນີ້ ຄະນະພົວພັນຕ່າງປະເທດສູນກາງພັກ ກໍ່ໄດ້ມີການສະຫຼຸບຂະບວນການແຂ່ງຂັນຍ້ອງຍໍຜົນງານ 5 ປີ (2016-2020) ແລະ ປະກາດເນື້ອໃນການແຂ່ງຂັນ ຮອດປີ 2025, ພ້ອມກັນນັ້ນ ກໍ່ໄດ້ປະກາດການຈັດຕັ້ງພາຍໃນຄະນະພົວພັນຕ່າງປະເທດສູນກາງພັກຕື່ມອີກ.

ໃນກອງ​ປະ​ຊຸມ ທີ່ມີຄວາມໝາຍສໍາຄັນ​ດັ່ງ​ກ່າວ, ສະ​ຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະ​ນະບໍ​ລິ​ຫານ​ງານພັກ, ຫົວໜ້າຄະນະພົວພັນຕ່າງປະເທດສູນກາງ ກໍ່​ໄດ້​ໃຫ້​ກຽດໂອ້​ລົ​ມ ໂດຍ​ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສຳເລັດ ທີ່ພະນັກງານຄະນະພົວພັນຕ່າງປະເທດສູນກາງພັກ ຍາດມາໄດ້ໃນຕະຫຼອດໄລຍະຜ່ານມາ, ໂດຍ​ສະ​ເພາະ​ແມ່ນ​ ການ​ເຮັດ​ສຳ​ເລັດ​ພາ​ລະ​ບົດ​ບາດ ເປັນ​ເສ​ນາ​ທິ​ການ​ໃຫ້​ແກ່ສູນ​ກາງ​ພັກ ໃນ​ການເຄື່ອນໄຫວຕ່າງປະເທດດ້ານພັກ ແລະ ການທູດປະຊາຊົນ ອັນ​ໄດ້​ເຮັດ​ໃຫ້​ບົດ​ບາດ​ອິດ​ທິ​ພົນ​ຂອງ​ພັກ-ລັດ​ ເຮົາໄດ້​ຮັບ​ການ​ຍົກ​ສູງໃນ​ເວ​ທີ​ພາກ​ພື້ນ ແລະ ສາກົນ, ເຊິ່ງໄດ້ເຮັດໃຫ້ຂັ້ນເທິງໃຫ້ການຍ້ອງຍໍປະເພດຕ່າງໆ ເຊັ່ນ: ຫຼຽນໄຊແຮງງານຊັ້ນ I ສໍາລັບ ກົມກອງລວມໝູ່ 1 ຫຼຽນ, ສໍາລັບບຸກຄົນແມ່ນ 7 ສະຫາຍ, ຍິງ 3 ສະຫາຍ;​ ຫຼຽນໄຊແຮງງານຊັ້ນ II 10 ສະຫາຍ, ຍິງ 3 ສະຫາຍ; ຫຼຽນໄຊແຮງງານຊັ້ນ III 28 ສະຫາຍ, ຍິງ 6 ສະຫາຍ; ຫຼຽນກາແຮງງານ 20 ສະຫາຍ, ຍິງ 7 ສະຫາຍ; ໄດ້ຮັບໃບຍ້ອງຍໍຂັ້ນລັດຖະບານ 35 ສະຫາຍ, ຍິງ 13 ສະຫາຍ; ຄຽງຄູ່ກັນນັ້ນ, ສະຫາຍ ຫົວໜ້າ ຄຕພ ຍັງໄດ້ຍົກໃຫ້ເຫັນ ໃນ​ປີ 2022 ເຖິງວ່າສະພາບການແຜ່ລະບາດຂອງພະຍາດໂຄວິດ-19 ໄດ້ຜ່ອນຄາຍລົງ, ບັນດາປະເທດກໍ່ໄດ້ເປີດໃຫ້ມີການໄປມາຫາສູ່ກັນຢ່າງເປັນປົກກະຕິ ແຕ່ສະພາບຂໍ້ຂັດແຍ່ງທາງດ້ານພູມິລັດຖະສາດການເມືອງ, ສະພາບຄວາມຫຍຸ້ງຍາກທາງດ້ານເສດຖະກິດ, ພະລັງງານ ແລະ ໄພເງິນເຟີ້ ຍັງເປັນບັນຫາກົດໜ່ວງການພົວພັນລະຫວ່າງ ພັກເຮົາ ກັບຕ່າງປະເທດ, ແຕ່ພາຍໃຕ້ການຊີ້ນໍາ ນໍາພາ ແລະ ຄວາມເອົາໃຈໃສ່ຂອງຂັ້ນເທິງ ເຮັດໃຫ້ພວກເຮົາ​ມີ​ວິ​ທີ​ການ​ເໝາະ​ສົມ​ໃນ​ການ​ເສີ​ມ​ຂະ​ຫຍາຍ​ການ​ພົວ​ພັນລະ​ຫວ່າງ​ພັກ​ເຮົາ​ກັບ​ຕ່າງ​ປະ​ເທດເລື້ອຍໆມາ. ໃນປີ 2023 ນີ້ ຄຕພ ຈະມີອາຍຸ ຄົບ 40 ປີ ແລະ ຕໍ່ໜ້າສະພາບການຂອງວຽກງານການທູດສາຍພັກ ແລະ ການທູດປະຊາຊົນ ນັບມື້ນັບຫຼາຍຂື້ນ, ຄະນະພັກ, ຄະນະນໍາ ຄຕພ ໄດ້ມີການປັບປຸງການຈັດຕັ້ງເພື່ອໃຫ້ແທດເໝາະກັບສະພາບການຕົວຈິງ ແລະ ຊີ້ນໍາໃຫ້ພະນັກງານສະມາຊິກພັກ ຄຕພ ທຸກຖ້ວນໜ້າສຸມໃສ່ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ II ພ້ອມທັງບັນດາແຜນງານໂຄງການ ຂອງ ອົງຄະນະພັກ ຄຕພ ໃຫ້ແຕກດອກອອກຜົນຍິ່ງໆຂື້ນ.

ໃນ​ຕອນ​ທ້າຍ, ສະ​ຫາຍ ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ສະ​ແດງ​ຄວາມ​ເຊື່ອ​ໝັ້ນ​ວ່າ​ດ້ວຍ​ຈິດ​ໃຈ​ມາ​ນະ​ບຸກບືນ, ຄວາມ​ສາ​ມັກ​ຄີ​ເປັ​ນ​ເອກ​ະ​ພາບ​ພາຍ​ໃນ ຈະ​ເຮັດ​ໃຫ້​ການ​ປະ​ຕິ​ບັດ​ໜ້າ​ທີ່​ ຂອງ ຄະ ນະພົວພັນຕ່າງປະເທດສູນກາງພັກ ​ສືບ​ຕໍ່​ຍາດ​ໄດ້​ຜົ​ນ​ສຳ​ເລັດໃໝ່ໃຫຍ່ກວ່າ​ເກົ່າ, ສືບ​ຕໍ່​ສ້າງ​ສະ​ພາບ​ແວດ​ລ້ອມ​​ທີ່​ອໍານວຍຄວາມສະ​ດວກ​ໃຫ້​ແກ່​ການ​ປົກ​ປັກ​ຮັກ​ສາ ແລະ ສ້າງ​ສາ​ປະ​ເທດ​ຊາດ​ໃນ​ຕໍ່​ໜ້າ.

---